ວັນ​ທີ 13 ກັນຍາ 2016 ທ່ານ ພຸດ​ທະ​ກອນ ບຸ​ຜາ​ສວັນ ພ້ອມດ້ວຍ​ຄອບຄົວ ໄດ້​ນຳ​ຄຳ 5 ບາດ ມູນ​ຄ່າ 27,37 ລ້ານ​ກີບ ແລະ ທ່ານ ສິລິ​ລາດ​ທົງ​ສິນ ທອງ​ເພັງ ພ້ອມ​ດ້ວຍ​ຄອບຄົວ ນຳ​ຄຳ 4 ບາດ ມູນ​ຄ່າ 21,89 ລ້ານ​ກີບ ໄປມອບ​ໃຫ້​ຄະນະ​ຮັບຜິດຊອບ​ໂຄງການ​ປະຕິສັງຂອນ​ພະ​ທາດຫຼວງ ຄັ້ງ​ທີ IV ເພື່ອ​ປະກອບສ່ວນ​ເປັນເຈົ້າ​ສັດທາ​ໃນ​ໂຄງການ​ດັ່ງກ່າວ ຂຶ້ນ​ທີ່​ຫ້ອງ​ວ່າການ​ປົກຄອງ​ນະຄອນ​ຫຼວງ​ວຽງ​ຈັນ (ນວ) ກ່າວຮັບໂດຍ ​ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ ນວ ຜູ້​ຮັບຜິດຊອບວຽກ​ງານ​ວັດທະນະທຳ-ສັງຄົມ ທັງ​ເປັນ​ຜູ້​ປະຈຳການ ມີ​ທ່ານ ພູ​ວົງ ວົງ​ຄຳ​ຊາວ ຫົວໜ້າ​ຫ້ອງວ່າການ ນວ ທ່ານ ໂຄຈອນ ແກ້ວ​ມະນີ​ວົງ ຮອງ​ຫົວໜ້າ​ພະແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນວ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ສປປ ລາວ ໄດ້​ຮັບ​ກຽດ​ເປັນປະທານ​ອາ​ຊຽນ ແລະ ເປັນ​ເຈົ້າພາບ​ຈັດ​ກອງ​ປະຊຸມ​ສຸດ​ຍອດອາຊຽນ ຄັ້ງ​ທີ 28-29 ພ້ອມ​ກັບ​ບັນດາ​ກອງ​ປະຊຸມ​ປິ່ນ​ອ້ອມ ໃນ​ປີ 2016 ເຊິ່ງ​ກອງ​ປະຊຸມ​ທີ່​ມີ​ຄວາມໝາຍ​ຄວາມ​ສຳຄັນ​ນີ້ ຖື​ເປັນ​ເວທີ​ແຫ່ງ​ການ​ແລກປ່ຽນ ແລະ ເຊື່ອມ​ໂຍງ 10 ປະເທດ​ສະມາຊິກອາ​ຊຽນ​ດ້ວຍ​ກັນ ໃຫ້​ມີ​ຄວາມ​ໃກ້ຊິດ​ທາງ​ດ້ານ​ການເມືອງ-ຄວາມໝັ້ນຄົງ ເສດຖະກິດ ວັດທະນະທຳ-ສັງຄົມ ຄຽງ​ຄູ່​ກັບ​ການ​ເສີມສ້າງ​ສາຍ​ພົວພັນ​ຮ່ວມ​ມື​ກັບ ​ບັນດາ​ປະເທດ​ມະຫາ​ອຳນາດ ແລະ ຄູ່​ຮ່ວມ​ເຈລະຈາ ເພື່ອ​ນຳ​ມາ​ຜົນປະໂຫຍດ​ສູງ​ສຸດ​ ໃນ​ການ​ພັດ​ທະນາ​ທີ່​ເຂັ້ມແຂງ-ຍືນ​ຍົງ​ຂອງ​ພາກພື້ນ ແລະ ສາກົນ.

ໃນ​ຍຸກ​ປະຊາ​ຄົມ​ເສດຖະກິດອາ​ຊຽນ 10 ປະເທດ​ສະມາຊິກ ໄດ້​ເອົາໃຈໃສ່​ຢ່າງ​ຕັ້ງໜ້າ ເຂົ້າໃນ​ການ​ປັບປຸງ ແລະ ຍົກ​ລະດັບຂີດ​ຄວາມ​ສາມາດ​ການ​ບໍລິການ-ຂົນສົ່ງ ໃຫ້​ມີ​ຄວາມ​ວ່ອງໄວ ຮັບປະກັນ​ໄດ້​ຄວາມ​ປອດ​ໄພ​ຮອບດ້ານ ສຳລັບ​ລັດຖະບານ​ລາວ ກໍ່ໄດ້​ຊຸກຍູ້​ບັນດາ​ຫົວໜ່ວຍ​ທຸລະ​ກິດພາກ​ເອກະ​ຊົນ ປະກອບສ່ວນຢ່າງ​ຕັ້ງໜ້າ ​ເຂົ້າ​ໃນ​ການ​ປັບປຸງສະຖານີ​ຂົນສົ່ງ​ ໃຫ້​ມີ​ຄຸນະພາບ ຮອງ​ຮັບ​ການ​ຂະຫຍາຍຕົວ​ທາງດ້ານ​ເສດຖະກິດ- ສັງຄົມ ໃນ​ຍຸກປະຊາ​ຄົມ​ເສດຖະກິດ​ອາ​ຊຽນ AEC ຊຶ່ງ​ໃນ​ປີ 2013 ຜູ້​ປະກອບການ​ທຸລະ​ກິດ​ສະຖານີ​ຂົນສົ່ງໂດຍສານ​ສາຍ​ໃຕ້ ໄດ້​ໃຊ້​ງົບ​ປະມານກວ່າ 40 ຕື້​ກີບ ສ້າງ​ສະ​ຖານີ​ຂົນສົ່ງ​ແຫ່ງ​ໃໝ່​ຂຶ້ນ ເພື່ອ​ອຳນວຍ​ຄວາມ​ສະດວກ ກໍ່​ຄືກັນ​ຫຼຸດຜ່ອນ​ຄວາມ​ແອ​ອັດ​ຂອງ​ລົດ​ໂດຍສານ ​ໃນ​ເສັ້ນທາງ​ຫຼັກ​ໃຫ້​ນະຄອນ​ຫຼວງ​ວຽງ​ຈັນ.

ການແຂ່ງຂັນກີລາກ໊ອຟ ການກຸສົນ ເພື່ອລະດົມທຶນສ້າງຕຶກປິ່ນປົວ ແລະບຳບັດຜູ້ຕິດຢາເສບຕິດ ສົມສະຫງ່ານະຄອນຫຼວງວຽງຈັນ ຈັດຂຶ້ນວັນທີ 20 ສິງຫາ 2016 ທີ່ສະໜາມກີລາກ໊ອຟລ່ອງແທງ (ຫຼັກ 18 ທ່າເດື່ອ) ໂດຍການເປັນປະທານຂອງທ່ານສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ມີທ່ານ ສອນໄຊ ສີພັນດອນຮອງນາຍົກລັດຖະມົນຕີ ພ້ອມດ້ວຍບັນດານັກກີລາມາຈາກຂະແໜງການຕ່າງໆ ແລະ ນັກກີລາສະໜັກຫຼິ້ນ ເຂົ້າຮ່ວມ 170 ກວ່າທ່ານ.