ດ້ວຍຄວາມເປັນຫ່ວງເປັນໃຍຕໍ່ບັນດາທ່ານຜຸ້ທີ່ມີຄຸນງາມຄວາມດີໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ທ່ານ ປອ. ສິນລະວົງ ຄຸດໄພທູນ ກຳມະການກົມການ ເມືອງສູນກາງພັກ ເຈົ້າຄອງນະຄອນຫຼວງວຽງຈັນ ໄດ້ຕາງໜ້າ ໃຫ້ການນຳພັກ-ລັດເຂົ້າຮ່ວມ ພົບປະ ແລະ ບາສີສູ່ຂວັນ ເພື່ອເປັນການສົ່ງ ທ້າຍປີເກົ່າ- ຕ້ອນຮັບປີໃໝ່ ພສ 2559 ຂອງສະມາຄົມຜູ້ອາຍຸສູງ ຊຶ່ງ ຈັດຂຶ້ນໃນວັນທີ 23 ເມສາ ຜ່ານມານີ້ ທີ່ພັດຕະຄານແມ່ຂອງ, ນະຄອນຫຼວງວຽງຈັນໂດຍມີທ່ານ ສົມພົງ ມົງຄົນວິໄລ ປະທານສະມາຄົມຜູ້ອາຍຸສູງ, ແຂກຖືກເຊີນ ພ້ອມດ້ວຍ ແລະ ສະມາຊິກສະມາຄົມຜຸ້ສູງອາຍຸເຂົ້າຮ່ວມຢ່າງພ້ອມພຽງ.
  ທ່ານ ຈະເລີນ ສຸວົງ ຮອງປະທານສະມາຄົມ ໄດ້ກ່າວໃນ ພິທີວ່າ: ເພື່ອຮັກສາໄດ້ຮີດຄອງປະເພນີອັນດີງາມຂອງຊາດ ບໍ່ໃຫ້ລະຮີດໝອງຄອງເສົ້າ ສະມາຄົມຜູ້ອາຍຸສູງ ຈຶ່ງໄດ້ຈັດພິທີບາສີສູ່ຂວັນ ເພື່ອສົ່ງທ້າຍປີເກົ່າ - ຕ້ອນ ຮັບປີໃໝ່ຂຶ້ນ ເພື່ອໃຫ້ຜູ້ອາຍຸສູງມີສຸຂະພາບຈິດໃຈທີ່ມ່ວນຊື່ນ ແຂງແຮງປາສະຈາກຄວາມຫງ່ວມເຫງົາ; ປັດຈຸບັນສະມາ ຄົມມີສະມາຊິກເປັນຈຳນວນ ຫຼວງຫຼາຍ ຊຶ່ງໃນແຕ່ລະເດືອນ ແມ່ນໄດ້ພົບປະສັງສັນກັນ 1 ຄັ້ງ ໂດຍຖືເອົາວັນ ສຸກເປັນ ມື້ທີ່ນັດໝາຍ, ສ່ວນກິດຈະກຳທີ່ ໄດ້ປະຕິບັດຜ່ານມາແມ່ນການ ສະຫຼອງວັນເກີດ, ການນັດກິນ ເຂົ້າສາມັກຄີ, ການ ມ່ວນຊື່ນ, ການທ່ອງທ່ຽວ ແລະ ອື່ນໆ.

ໃນ​ວັນ​ທີ 11 ເມສາ 2016 ທີ່ຫ້ອງ​ວ່າການ​ປົກຄອງ​ນະຄອນຫຼວງ​ວຽງ​ຈັນ ໄດ້​ຈັດ​ພິທີ​ບາສີ ແລະ ອວຍພອນ​ເຊິ່ງ​ກັນ ແລະ ກັນ​ຂຶ້ນ​ເນື່ອງ​ໃນ​ໂອກາດ​ສົ່ງ​ທ້າຍປີ​ເກົ່າ​ຕ້ອນຮັບ​ປີ​ໃໝ່​ລາວ ​ພສ 2559 ໂດຍ​ເປັນ​ປະທານ​ຂອງທ່ານ ​ດຣ. ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ບຸນ​ຍັງ ວໍລະ​ຈິດ ຮອງ​ປະທານປະເທດ ມີບັນດາ​ການ​ນຳ​ນະຄອນຫຼວງ ພ້ອມ​ດ້ວຍ​ພັນ​ລະ​ຍາ ອະດີດ​ການ​ນຳນະຄອນຫຼວງວຽງຈັນ ພະນັກງານ​ອາວຸໂສ ບຳນານ ພະນັກງານ​ຫຼັກ​ແຫຼ່ງ ນັກທຸລະກິດ ແລະ ນາງ​ສາວ​ນະຄອນ​ຫຼວງ​ເຂົ້າ​ຮ່ວມ.

ງານ​ປະຕິມາ​ກຳ​ຊາຍ​ທີ່​ຫາດດອນ​ຈັນ ເມືອງ​ຈັນທະ​ບູ​ລີ ນະຄອນ​ຫຼວງ​ວຽງ​ຈັນ ແມ່ນ​ໜຶ່ງ​ໃນກິດຈະກຳ​ໃນ​ການ​ສະເຫຼີມ​ສະຫຼອງ​ ບຸນປີໃໝ່​ລາວ​ຢ່າງ​ມີ​ຄວາມເບີກບານ​ມ່ວນຊື່ນ ທີ່​ຈະ​ມີ​ຂຶ້ນ​ລະຫວ່າງ​ວັນ​ທີ 13-16 ເມສາ 2016 ກິດຈະກຳ​ດັ່ງກ່າວ​ປີ​ນີ້​ເປັນ​ຄັ້ງ​ທີ 2 ເພື່ອ​ເປັນ​ການ​ໂຄສະນາ​ເຜີຍແຜ່ ແລະ ສົ່ງເສີມ​ຮີດຄອງ​ປະເພນີ​ອັນດີງາມ​ຂອງ​ຊາດ ​ຕໍ່​ກັບ​ພາກ​ພື້ນ ແລະ ສາກົນ ເຊິ່ງ​ຈະ​ສົ່ງ​ຜົນ​ດີ​ຕໍ່ການທ່ອງທ່ຽວ​ຂອງ​ລາວ​ອີກດ້ວຍ.