ກອງ​ປະຊຸມ​ເຜີຍແຜ່​ມະຕິ​ຕົກລົງ​ຂອງ​ຄະນະ​ປະຈຳ​ພັກ ແລະ ຂໍ້​ຕົກລົງ​ຂອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ກ່ຽວ​ກັບ​ວຽກ​ງານ 3 ສ້າງ ຈັດ​ຂຶ້ນ​ວັນ​ທີ 12 ມິຖຸນາ 2018 ທີ່​ຫ້ອງ​ວ່າການ​ປົກຄອງ ນວ ໂດຍ​ເປັນ​ປະທານ​ຂອງ​ທ່ານ ສີ​ຫຸນ ​ສິດທິ​ລື​ໄຊ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ມີ​ບັນດາ​ເຈົ້າເມືອງ​ຫົວໜ້າ​ພະແນກການ ຫ້ອງການ​ພາຍ​ໃນ​ເມືອງ ແລະ ຂະແໜງການ​ກ່ຽວຂ້ອງ​ເຂົ້າ​ຮ່ວມ.

       ໂອກາດ​ນີ້ ທ່ານ ບຸນ​ໜາ ຜາ​ທຸມ​ມະ​ວົງ ຫົວໜ້າ​ພະ​ແນກ​ພາຍ​ໃນ​ນະຄອນຫຼວງ​ວຽງ​ຈັນ ໄດ້​ຂຶ້ນ​ຜ່ານ​ເນື້ອ​ໃນ ແລະ ຍົກ​ໃຫ້​ເຫັນ​ຄວາມ​ສຳຄັນ​ຂອງ​ມະຕິ​ຕົກລົງ​ດັ່ງກ່າວ​ວ່າ: ວຽກ​ງານ 3 ສ້າງ​ແມ່ນ​ຂະ​ບວນ​ປັບປຸງ​ກົນ​ໄກ​ການ​ບໍລິຫານ​ການ​ຄຸ້ມ​ຄອງ​ລັດ-ຄຸ້ມ​ຄອງ​ສັງຄົມ ​ດ້ວຍ​ລະບຽບ​ກົດໝາຍ ເພື່ອ​ຍົກ​ສູງ​ບົດບາດ​ຄວາມ​ສາມາດ​ນຳພາ​ຮອບດ້ານ​ຂອງ​ພັກ ຄື: ສ້າງ​ນະຄອນຫຼວງ​ວຽງຈັນ​ ເປັນ​ຫົວໜ່ວຍ​ຍຸດ​ທະ​ສາດ​ໜຶ່ງ​ຂອງ​ປະເທດ ຕາມ​ມະຕິ VI ຂອງ​ອົງຄະ​ນະ​ພັກ ນວ ແຕ່​ນີ້​ຮອດ​ປີ 2020 ນະຄອນຫຼວງ​ໄດ້​ວາງ​ເປົ້າ​ໝາຍ​ການ​ພັດທະນາ​ໃນ​ແຕ່​ລະ​ດ້ານ ເຊິ່ງ​ປະກອບ​ມີ 6 ວິໄສ​ທັດ 6 ຍຸດ​ທະ​ສາດ 18 ຄາດໝາຍ ແລະ 22 ໂຄງການ​ບຸກ​ທະລຸ ເມື່ອ​ຢາກ​ເຮັດ​ໄດ້​ຕາມ​ແຜນການ​ທີ່​ວາງ​ໄວ້ ຕ້ອງ​ມອບ​ສິດ ມອບ​ຄວາມ​ຮັບຜິດຊອບ ແລະ ຜົນ​ປະໂຫຍດ​ໃຫ້​ແກ່​ເມືອງ ບ້ານ ໃຫ້​ຖືກຕ້ອງ​ຕາມ​ລະບຽບ​ການ​ຫຼາຍ​ຂຶ້ນ​ເສີມ​ຂະຫຍາຍ​ມູນເຊື້ອ ແລະ ທ່າແຮງ​ບົ່ມ​ຊ້ອນ​ດ້ານ​ເສດຖະກິດ​ຂອງ​ເມືອງ ບ້ານ ເຂົ້າ​ໃນ​ການ​ຄຸ້ມ​ຄອງ-ບໍລິຫານ ບົນ​ຈິດໃຈ​ເປັນ​ເຈົ້າ​ຕົນ​ເອງ ເພິ່ງ​ຕົນ​ເອງ ແລະ ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ບັດ​ດາ​ເຜົ່າ ແລະ ມີ​ລາຍ​ຮັບ​ລະດັບ​ປານ​ກາງ​ຂຶ້ນ​ໄປ ແນໃສ່​ສ້າງ​ນະຄອນຫຼວງ ມີ​ພື້ນຖານ​ເສດຖະກິດ​ທີ່​ເຂັ້ມແຂງ ເມືອງ​ເຂັ້ມແຂງ​ຮອບດ້ານ 2-4 ເມືອງ ແລະ ສ້າງ​ບ້ານ​ພັດທະນາ​ໃຫ້​ໄດ້ 2 ສ່ວນ 3 ຂອງ​ຈຳນວນ​ບ້ານ​ທັງ​ໝົດ​ໃນ​ປີ 2020 ໃຫ້​ປາກົດ​ຜົນ​ເປັນ​ຈິງ​ເທື່ອ​ລະ​ກ້າວ.

ທີ່ມາຂໍ້ມູນ: ໜັງສືພີມວຽງຈັນໃໝ່