ຫ້ອງການພາສີປະຈໍາເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ສໍາເລັດການກໍ່ສ້າງ ພ້ອມເປີດນໍາໃຊ້ຢ່າງເປັນທາງການໃນວັນທີ 23 ກຸມພາ 2022 ພາຍໃຕ້ການເຂົ້າຮ່ວມ ຂອງ ທ່ານ ບຸນເກີດ ສຸວັນນະເສນ ຫົວໜ້າພະແນກຈັດຕັ້ງ, ບໍລິຫານ ແລະ ການເງິນ ກົມພາສີ; ທ່ານ ຂຽງຄໍາ ພຸດຈັນທະວົງສາ ຮອງອໍານວຍການບໍລິສັດ ຮ່ວມທຶນລາວ-ຈີນ ຈໍາກັດ, ທ່ານ ໄກນະຄອນ ທໍາມະວອນ ຮອງຫົວໜ້າຄະນະຄຸ້ມຄອງ ເຂດເສດຖະກິດພິເສດ ນະຄອນຫຼວງວຽງຈັນ ແລະ ແຂກຮັບເຊີນເຂົ້າຮ່ວມ.

     ທ່ານ ຂຽງຄໍາ ພຸດຈັນທະວົງສາ ໄດ້ກ່າວວ່າ: ເຂດພັດທະນາກວມລວມໄຊເຊດຖານະຄອນຫຼວງວຽງຈັນ (ຂພຊ) ເປັນໂຄງການຮ່ວມມືລະຫວ່າງລັດ ຖະບານລາວ-ຈີນ, ຝ່າຍລາວແມ່ນຕາງໜ້າໃຫ້ລັດຖະບານໂດຍອົງການປົກຄອງນະຄອນຫຼວງວຽງຈັນຖືຮຸ້ນ 25% ແລະ ຝ່າຍຈີນຕາງໜ້າລັດຖະບານໂດຍ ບໍລິສັດລົງທຶນ ຕ່າງປະເທດແຂວງຢູນນານທີ່ຂຶ້ນກັບກຸ່ມບໍລິສັດ ກໍ່ສ້າງ ແລະ ລົງທຶນ ແຂວງຢຸນນານ ຫຸ້ນສ່ວນຈໍາກັດ ຖືຮຸ້ນ 75%.

     ຂພຊ ໄດ້ຮັບອະນຸມັດສ້າງຕັ້ງຫ້ອງການພາສີປະຈໍາເຂດພັດທະນາກວມລວມໄຊເຊດຖາ ຈາກກະຊວງການເງິນຕາມຂໍ້ຕົກລົງສະບັບເລກທີ 3984/ກງ, ລົງວັນທີ 23 ສິງຫາ 2021. ຫ້ອງການພາສີປະຈໍາເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ມີເນື້ອທີ່ທັງໝົດ 28.000 ຕາແມັດ, ເນື້ອທີ່ປຸກສ້າງກວມເອົາ 3.450 ຕາແມັດ ປະກອບມີຕຶກອາຄານຫ້ອງການ 01 ຫຼັງ (ມີສອງຊັ້ນ), ຕຶກອາຄານຫໍພັກ 01 ຫຼັງ (ມີສອງຊັ້ນ), ຈຸດກວດກາສິນຄ້າໃນຮົ່ມ 03 ຈຸດ, ປະຕູທາງເຂົ້າ-ອອກ ແລະ ຕາຊັ່ງ, ສະຖານທີ່ຈອດລົດ, ລະບົບໄຟຟ້າ, ລະບົບນໍ້າປະປາ, ລະບົບອິນເຕີເນັດສາຍໄຍແກ້ວ ແລະ ສິ່ງອໍານວຍຄວາມສະດວກອື່ນໆ. ໃນຂະນະດຽວກັນກໍໄດ້ສໍາເລັດການຈັດຊື້, ຕິດຕັ້ງເຄື່ອງອຸປະກອນ ແລະ ລະບົບຕ່າງໆທີ່ຮັບໃຊ້ພາຍໃນຫ້ອງການພາສີ, ມາຮອດປັດຈຸບັນ ຫ້ອງການພາສີປະຈໍາເຂດພັດທະນາກວມ ລວມໄຊເຊດຖາ ນະຄອນຫຼວງວຽງຈັນ ແມ່ນຖືວ່າມີຄວາມພ້ອມໃນການເປີດນໍາໃຊ້ຢ່າງຮອບດ້ານ.

     ທ່ານ ໄກນະຄອນ ທໍາມະວອນ ໄດ້ກ່າວວ່າ: ນະຄອນຫຼວງວຽງຈັນ ປັດຈຸບັນປະກອບມີເຂດເສດຖະກິດພິເສດ 05 ເຂດຄື: ເຂດພັດທະນາກວມລວມໄຊເສດຖາ, ເຂດເສດຖະກິດພິເສດ ບຶງທາດຫຼວງ, ເຂດເສດຖະກິດພິເສດລ່ອງແທ່ງ-ວຽງຈັນ, ເຂດເສດຖະກິດພິເສດ ດົງໂພສີ ແລະ ເຂດໂລຊິດສະຕິກ ນະຄອນຫຼວງວຽງຈັນ.

     ການສ້າງຕັ້ງຫ້ອງການພາສີປະຈໍາເຂດ ບໍ່ພຽງແຕ່ເປັນການຄຸ້ມຄອງ, ອໍານວຍຄວາມສະດວກ ແຕ່ຍັງເປັນການສ້າງຄວາມພ້ອມໃນການຄຸ້ມຄອງ, ການບໍລິການ ແລະ ເຕົ້າໂຮມຄ່ຽນຖ່າຍສິນຄ້າ ທີ່ຈະເກີດຂຶ້ນໃນອະນາຄົດ, ການຢັ້ງຢືນແຫຼ່ງກໍາເນີດສິນຄ້າ ແລະ ອື່ນໆ.

     ຂພຊ ເປັນເຂດໜຶ່ງທີ່ມີການພັດທະນາຢ່າງວ່ອງໄວ ມີບັນດາຜູ້ລົງທຶນສ່ວນໃຫຍ່ທີ່ເຂົ້າມາດໍາເນີນທຸລະກິດທາງດ້ານອຸດສາຫະກໍາຕາມເປົ້າໝາຍແຜນພັດທະນາຂອງເຂດ ມາຮອດປັດຈຸບັນມີຫຼາຍບໍລິສັດ, ຫຼາຍໂຮງງານທໍາການຜະລິດ, ຈໍາໜ່າຍເຮັດໃຫ້ວຽກງານນໍາເຂົ້າ-ສົ່ງອອກ ພາຍໃນເຂດນັບມື້ມີການເພີ່ມຂຶ້ນ ສະນັ້ນ, ບໍລິສັດ ຮ່ວມທຶນລາວ-ຈີນ ຈໍາກັດ ໃນນາມຜູ້ພັດທະນາເຂດເຫັນໄດ້ຄວາມສໍາຄັນດັ່ງກ່າວ ຈິ່ງໄດ້ສ້າງຫ້ອງການພາສີປະຈໍາເຂດຂຶ້ນມາ ເພື່ອອໍານວຍຄວາມສະດວກແກ່ການລົງທຶນ, ມີຄວາມວ່ອງໄວທາງດ້ານບໍລິການ ຕາມກົນໄກການບໍລິການລົງທຶນປະຕູດຽວ.

     ທ່ານ ບຸນເກີດ ສຸວັນນະເສນ ໄດ້ກ່າວວ່າ: ສະເພາະເຂດເສດຖະກິດກວມລວມໄຊເຊດຖາ ເປັນເຂດເສດຖະກິດໜຶ່ງ ທີ່ພັກ ແລະ ລັດຖະບານໄດ້ເອົາໃຈໃສ່ຊຸກຍູ້ ແລະ ສົ່ງເສີມ; ປັດຈຸບັນກໍໄດ້ເປັນເຂດທີ່ພັດທະນາ ແລະ ລົງທຶນສູງ; ໄລຍະຜ່ານມາກົມພາສີ ກໍໄດ້ເອົາໃຈໃສ່ປະສານສົມທົບກັບຄະນະຜູ້ພັດທະນາເຂດ ແລະ ພາກສ່ວນກ່ຽວຂ້ອງເພື່ອປຶກສາຫາລືຫຼາຍບັນຫາຮ່ວມກັນ.  

​    ເນື່ອງໃນໂອກາດນີ້ ຂ້າພະເຈົ້າ ອະນຸຍາດຕາງໜ້າກົມພາສີ ຂໍສະແດງຄວາມຂອບໃຈຢ່າງສູງ ມາຍັງຄະນະບໍລິຫານເຂດເສດຖະກິດກວມລວມໄຊເສດຖາ ທີ່ໄດ້ໃຫ້ການສະໜັບສະໜູນ ແລະ ຮ່ວມມື ໃນການກໍ່ສ້າງຫ້ອງການ ແລະ ສະໜອງອຸປະກອນຈໍາເປັນ ໃຫ້ແກ່ລັດຖະການພາສີຂອງພວກເຮົາໃນຄັ້ງນີ້ ຕໍ່ໄປ ຂ້າພະເຈົ້າຂໍສະເໜີມອບຫ້ອງການ ແລະ ອຸປະກອນຕ່າງໆໃຫ້ແກ່ທ່ານຫົວໜ້າຫ້ອງການພາສີ ແລະ ອ້າຍ,ນ້ອງພະນັກງານຜູ້ປະຈໍາການ ເພື່ອສືບຕໍ່ນໍາໃຊ້ ແລະ ຈົ່ງເອົາໃຈໃສ່ນໍາໃຊ້ໃຫ້ເກີດຜົນປະໂຫຍດສູງສຸດ ເພື່ອຮັບປະກັນໃຫ້ແກ່ການເຄື່ອນໄຫວວຽກງານວິຊາສະເພາະຢູ່ເຂດດັ່ງກ່າວນີ້ມີຜົນສໍາເລັດ ສາມາດສະໜັບສະໜູນໃຫ້ແກ່ຜູ້ລົງທຶນ ແລະ ຜູ້ພັດທະນາເຂດ ມີຜົນສໍາເລັດໃນການດໍາເນີນທຸລະກິດ ແລະ ການຂະຫຍາຍຕົວຂຶ້ນໄປເລື້ອຍໆ.

ຄົ້ນຫາ

ປະຕິທິນ

July 2022
S M T W T F S
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 37

ຈຳນວນຜູ້ເຂົ້າຊົມວານນີ້ 54

ຈຳນວນຜູ້ເຂົ້າຊົມອາທິດນີ້ 291

ຈຳນວນຜູ້ເຂົ້າຊົມເດືອນນີ້ 37

ຈຳນວນຜູ້ເຂົ້າຊົມທັງໝົດ 100442

Currently are 10 guests and no members online