ກອງປະຊຸມອົງການປົກຄອງນະຄອນຫຼວງວຽງຈັນ ຄັ້ງທີ 7 ໄດ້ໄຂຂຶ້ນໃນວັນທີ 31 ທັນວາ 2021 ທີ່ຫ້ອງປະຊຸມສໍານັກງານປົກຄອງນະຄອນຫຼວງວຽງຈັນ ຊັ້ນ 3, ໂດຍພາຍໃຕ້ການເປັນປະທານຂອງທ່ານ ອາດສະພັງທອງ ສີພັນດອນ ກໍາມະການສູນກາງພັກ, ຮອງເລຂາຄະນະພັກ, ເຈົ້າຄອງນະຄອນຫຼວງວຽງຈັນ, ໂດຍມີບັນດາທ່ານຮອງເຈົ້າຄອງ ແລະ ສະມາຊິກອົງການປົກຄອງນະຄອນຫຼວງວຽງຈັນ, ບັນດາທ່ານຫົວໜ້າພະແນກການ-ອົງການທຽບເທົ່າ ແລະ ເມືອງ (ຜ່ານລະບົບກອງປະຊຸມທາງໄກ) ເຂົ້າຮ່ວມທັງໝົດ 31 ທ່ານ, ຍິງ 4 ທ່ານ; ກອງປະຊຸມໄດ້ຮັບຟັງການລາຍງານ ແລະ ຮ່ວມກັນພິຈາລະນາ 5 ບັນຫາສໍາຄັນ ຂອງອົງການປົກຄອງນະຄອນຫຼວງວຽງຈັນ ດັ່ງນີ້:

ກອງປະຊຸມໄດ້ພິຈາລະນາ ແລະ ໄດ້ຮັບຮອງເອົາ 5 ບັນຫາສໍາຄັນ ດັ່ງນີ້:

  1. ກອງປະຊຸມໄດ້ຮັບຮອງເອົາບົດລາຍງານສະພາບພົ້ນເດັ່ນປະຈໍາເດືອນທັນວາ 2021 ຂອງນະຄອນຫຼວງວຽງຈັນ, ໂດຍຕີລາຄາວ່າ:
  • ໃຫ້ຕີລາຄາການເຄື່ອນໄຫວປີຜ່ານມາໃນແຕ່ລະດ້ານໃຫ້ມີອັນພົ້ນເດັ່ນ, ຄວາມໝັ້ນຄົງ, ຄວາມສະຫງົບ ແລະ ການເຄື່ອນ ໄຫວທີ່ສໍາຄັນຂອງພັກ-ລັດ ສະແດງອອກແມ່ນສາມາດຮັກສາຄວາມສະຫງົບໄດ້ດີ ໂດຍສະເພາະແມ່ນໄລຍະການເປີດນໍາໃຊ້ເສັ້ນທາງລົດໄຟ ລາວ-ຈີນ.
  • ດ້ານການພັດທະນາເສດຖະກິດ-ສັງຄົມ ແມ່ນໄດ້ຮັບຜົນກະທົບຈາກການແພ່ລະບາດຂອງພະຍາດໂຄວິດ-19, ແຕ່ກໍ່ສາມາດປະຄັບປະຄອງດ້ານການເຄື່ອນໄຫວເສດຖະກິດໄດ້, ເຊິ່ງສະແດງອອກແມ່ນສາມາດເກັບລາຍຮັບໄດ້ເກີນແຜນຫຼາຍກວ່າທຸກໆປີ.
  • ທິດທາງແຜນພັດທະນາຕົວເມືອງ ສ ສະຫວ່າງ, ສ ສີຂຽວ ທີ່ຍັງບໍ່ໄດ້ຮັບການຈັດຕັ້ງປະຕິບັັັັັັດ ລວມທັງ ສ ສະອາດ ບໍ່ໄດ້ມີແຜນປະກາດເປັນວຽງຈັນສະອາດ
  1. ພິຈາລະນາ ແລະ ຮັບຮອງເອົາແຜນຜັນຂະຫຍາຍ ມະຕິກອງປະຊຸມຄົບຄະນະບໍລິຫານງານພັກ ນະຄອນຫຼວງວຽງຈັນ ຄັ້ງທີ 5 ສະໄໝທີ VII ກ່ຽວກັບການຈັດຕັ້ງປະຕິບັດມາດຕະການຕ້ານ ແລະ ຄວບຄຸມການແຜ່ລະບາດຂອງພະຍາດ (COVID-19) (ເນັ້ນການຕີລາຄາຈຸດອ່ອນ ແລະ ທິດທາງການແກ້ໄຂ ທີ່ແມ່ນຄວາມຮັບຜິດຊອບ ຂອງອົງການປົກຄອງນະຄອນຫຼວງວຽງຈັນ).
    • ໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19, ບັນດາອົງການປົກຄອງເມືອງ, ບ້ານ, ກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງ ໃຫ້ຍົກສູງຄວາມຮັບຜິດຊອບໜ້າທີ່ການເມືອງ ໃນການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານພັກ ນະຄອນຫຼວງວຽງຈັນ, ຄັ້ງທີ 5, ສະໄໝທີ VII, ຄັ້ງວັນທີ 27-29 ທັນວາ 2021 ກ່ຽວກັບການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ອອກເປັນແຜນວຽກລະອຽດ ແລະ ມີການແບ່ງຄວາມຮັບຜິດຊອບກັນ ຢ່າງຊັດເຈນ ໂດຍສຸມໃສ່ແກ້ໄຂບັນຫາການລະບາດຂອງພະຍາດ ໃຫ້ຫຼຸດໜ້ອຍຖອຍລົງ ແລະ ສາມາດແກ້ໄຂໃຫ້ໄດ້ຢ່າງຂາດຕົວ. ພ້ອມທັງສືບຕໍ່ແກ້ໄຂບັນດາຂໍ້ຄົງຄ້າງ, ປັບປຸງບັນດານິຕິກໍາ, ກໍານົດມາດຕະການຕ່າງໆຄືນໃໝ່ ໃຫ້ສອດຄ່ອງກັບສະພາບຕົວຈິງ ໃນການຈັດຕັ້ງປະຕິບັດຢ່າງມີປະສິດທິຜົນ.
    • ສໍາລັບແຜນວຽກສະເພາະໜ້າ ມອບໃຫ້ບັນດາເມືອງ ສົມທົບກັບກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ຂຶ້ນແຜນກໍາລັງພົນ ແລະ ແຜນງົບປະມານ ລົງລາດຕະເວນຕິດຕາມກວດກາການປະຕິບັດມາດຕະການທາງບໍລິຫານລັດ ແລະ ສັງຄົມ ທີ່ຄະນະສະເພາະກິດກໍານົດອອກໃນໄລຍະກະກຽມສົ່ງທ້າຍປີເກົ່າ ແລະ ຕ້ອນຮັບປີໃໝ່ 2022 ແລະ ເທດສະການສໍາຄັນຕ່າງໆທີ່ຈະມາເຖິງນີ້ ຢ່າງເຂັ້ມງວດ, ພ້ອມທັງຕິດຕາມກວດກາ ແລະ ສະກັດກັ້ນການຫຼິ້ນ ແລະ ການຈໍາໜ່າຍທາດແຕກຕ່າງໆ, ຖ້າເກີດມີການລະເມີດ ອົງການປົກຄອງເມືອງ ແລະ ບ້ານ ຕ້ອງມີສ່ວນຮັບຜິດຊອບ ຕໍ່ຄວາມບົກຜ່ອງໃນການບໍລິຫານລັດ ແລະ ຄຸ້ມຄອງສັງຄົມ ໃນຂອບເຂດພື້ນທີ່ຂອງຕົນ.
  2. ພິຈາລະນາ ແລະ ຮັບຮອງເອົາແຜນຜັນຂະຫຍາຍມະຕິກອງປະຊຸມຄົບຄະນະບໍລິຫານງານພັກ ນະຄອນຫຼວງວຽງຈັນ ຄັ້ງທີ 5 ສະໄໝທີ VII ກ່ຽວກັບບົດສະຫຼູບການຈັດຕັ້ງຜັນຂະຫຍາຍ 2 ວາລະແຫ່ງຊາດ ຢູ່ນະຄອນຫຼວງວຽງຈັນ (ເນັ້ນການຕີລາຄາຈຸດອ່ອນ ແລະ ທິດທາງການແກ້ໄຂ ທີ່ແມ່ນຄວາມຮັບຜິດຊອບຂອງອົງການປົກຄອງນະຄອນຫຼວງວຽງຈັນ): ທີ່ຕິດພັນກັບການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການສະກັດກັ້ນ ແລະ ແກ້ໄຂຢາເສບຕິດ ຢູ່ນະ ຄອນຫຼວງວຽງຈັນ.
  • ໃຫ້ພະແນກແຜນການ ແລະ ການລົງທຶນ ແລະ ກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ເປັນໃຈກາງ ນໍາເອົາມະຕິກອງປະຊຸມຄົບຄະນະບໍລິຫານງານພັກ ນະຄອນຫຼວງວຽງຈັນ ຄັ້ງທີ 5 ສະໄໝທີ VII ມາຜັນຂະຫຍາຍ ແລະ ຈັດຕັ້ງປະຕິບັດຢ່າງເປັນຮູບປະທໍາ ແລະ ໃຫ້ສົມທົບກັບສະມາຊິກອົງການປົກຄອງ ລວມທັງອົງການປົກຄອງເມືອງ ແລະ ພາກສ່ວນທີ່ກ່ຽວຂ້ອງ ສະຫຼຸບລາຍງານການຈັດຕັ້ງຜັນຂະຫຍາຍສອງວາລະແຫ່ງຊາດ ໃນໄລຍະ 4 ເດືອນ ນັບແຕ່ເລີ່ມຈັດຕັ້ງປະຕິບັດ ໃນເດືອນສິງຫາ ເຖິງເດືອນທັນວາ ເພື່ອສັງລວມລາຍງານຕໍ່ທ່ານນາຍົກລັດຖະມົນຕີ ພາຍໃນວັນທີ 15 ມັງກອນ 2022. ສໍາລັບເນື້ອໃນຂອງບົດລາຍງານ ແມ່ນກໍານົດໃຫ້ມີ 3 ພາກ ເປັນຕົ້ນ ຍົກໃຫ້ເຫັນບັນຫາພົ້ນເດັ່ນ ທີ່ນະຄອນຫຼວງວຽງຈັນ ໄດ້ຈັດຕັ້ງປະຕິບັດສໍາເລັດ, ບັນຫາທີ່ຍັງຄົງຄ້າງ ແລະ ການສະເໜີຕໍ່ລັດຖະບານ, ສ່ວນແຜນງານລະ ອຽດອື່ນໆ ໃຫ້ເປັນເອກະສານຕິດຄັດ. ພ້ອມນີ້, ການສະຫຼຸບລາຍງານ ແມ່ນໃຫ້ໄປຕາມເນື້ອໃນແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1047/ຫສນຍ, ລົງວັນທີ 20 ສິງຫາ 2021 ໂດຍສະເພາະສ່ອງແສງໃຫ້ເຫັນຕົວເລກທີ່ພົ້ນເດັ່ນທາງດ້ານການເກັບລາຍຮັບ, ການສ້າງແຜນລາຍຮັບໃໝ່, ການກະກຽມໃສ່ແລວທາງລົດໄຟ ລາວ-ຈີນ, ຂະບວນການສ້າງບ້ານພັດທະນາ ແລະ ບ້ານປອດຢາເສບຕິດ. ສໍາລັບບົດສະຫຼຸບການຈັດຕັ້ງຜັນຂະຫຍາຍສອງວາລະແຫ່ງຊາດ ປະຈໍາເດືອນທັນວາ ໃຫ້ນໍາສົ່ງເປັນບົດເຖິງຫ້ອງວ່າການນະຄອນຫຼວງວຽງຈັນ.
  1. ພິຈາລະນາ ແລະ ຮັບຮອງເອົາ “ຮ່າງ” ຂໍ້ຕົກລົງ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະມານ ປະຈໍາປີ 2022 ຂອງນະຄອນຫຼວງວຽງຈັນ.
  • ຮັບຮອງເອົາ “ຮ່າງ” ຂໍ້ຕົກລົງ ວ່າດ້ວຍການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ແລະ ງົບປະມານ ປະຈໍາປີ 2022 ຂອງນະຄອນຫຼວງວຽງຈັນ.
  1. ພິຈາລະນາ ແລະ ຮັບຮອງເອົາການເປີດການທ່ອງທ່ຽວຢູ່ນະຄອນຫຼວງວຽງຈັນ ແລະ ການກະກຽມຄັດເລືອກເມືອງທ່ອງທ່ຽວສະອາດອາຊຽນ ແລະ ລາງວັນການທ່ອງທ່ຽວແບບຍືນຍົງອາຊຽນ ສໍາລັບປີ 2022-2023.
  • ພື້ນຖານເຫັນດີ ຕາມແຜນການກະກຽມຄັດເລືອກເມືອງທ່ອງທ່ຽວສະອາດອາຊຽນ ແລະ ລາງວັນການທ່ອງ ທ່ຽວແບບຍືນຍົງອາຊຽນ ສຳລັບປີ 2022-2023 ທີ່ພະແນກຖະແຫຼງຂ່າວວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ກຳນົດ, ແຕ່ໃຫ້ສືບຕໍ່ປັບປຸງແຜນງານ ແລະ ການແບ່ງຄວາມຮັບຜິດຊອບໃຫ້ລະອຽດຊັດເຈນຄືນໃໝ່ ດັ່ງນີ້:
  • ກໍານົດແຜນຮັບນັກທ່ອງທ່ຽວທີ່ຈະເຂົ້າມານະຄອນຫຼວງວຽງຈັນ ເປັນກຣຸບ ໃຫ້ລະອຽດຊັດເຈນຄືນໃໝ່.
  • ກໍານົດໃຫ້ເຫັນກົນໄກການປະສານງານ ແລະ ໜ້າທີ່ຮັບຜິດຊອບ ຂອງແຕ່ລະຂະແໜງການກ່ຽວຂ້ອງ ໂດຍສະ ເພາະຂະແໜງການຂັ້ນນະຄອນຫຼວງວຽງຈັນ ແລະ ຂັ້ນສູນກາງ.
  • ຂັ້ນນະຄອນຫຼວງວຽງຈັນ ໃຫ້ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ກໍານົດຄວາມຮັບຜິດຊອບຂອງແຕ່ລະຂະແໜງການ ໃຫ້ຊັດເຈນ ໃຫ້ເບິ່ງມາດຕະການແຕ່ລະດ້ານໃນການຈັດຕັ້ງປະຕິບັດ ທີ່ຕິດພັນກັບຫຼາຍວຽກງານ ເຊັ່ນ: ຜູ້ບໍລິການ-ບໍລິຫານ ຈະເຮັດແນວໃດ ?, ຜູ້ສະໜອງວັດຖຸອຸປະກອນຕ່າງໆ ຈະເຮັດແນວໃດ ? ໂຮງແຮມຈະຊື້ວັດຖຸອຸປະກອນທາງການແພດຈາກພາກສ່ວນໃດ ແລ້ວຈຶ່ງໃຊ້ມາດຕະການດ້ານການແພດ; ໂຮງແຮມມີຄວາມພ້ອມໃນການບໍລິການ ແລະ ສາມາດຕອບສະໜອງຄົນທີ່ມາພົວພັນ ມີພາກສ່ວນໃດແນ່ ?, ມີຂະແໜງ ການໃດແນ່ທີ່ສາມາດສະໜອງວັດຖຸອຸປະກອນທັງໝົດໃຫ້ແກ່ການບໍລິການ; ສຳລັບສະຖານທີ່ ຖ້າເປັນສະຖານທີ່ທ່ອງທ່ຽວຈະສາມາດພົວພັນກັບພາກສ່ວນໃດໄດ້ແນ່ ?, ບໍລິສັດທ່ອງທ່ຽວ ທີ່ຈະກຳນົດເອົາເປັນຜູ້ຮັບນັກທ່ອງທ່ຽວ ມີບໍລິສັດໃດແນ່ ?, ຈະເອົາສະຖານທີ່ໃດ, ເມືອງໃດ ເປັນບ່ອນຈຳກັດຜູ້ທີ່ຕິດເຊື້ອພະຍາດໂຄວິດ-19, ນອກຈາກນີ້ ໃຫ້ມີແຜນກໍານົດພາລະບົດບາດໜ້າທີ່ລະອຽດ ຂອງອົງການປົກຄອງບ້ານ, ເມືອງ ມີໜ້າທີ່ຮັບຜິດຊອບຫຍັງແນ່ໃນການຮັບນັກທ່ອງທ່ຽວ ?.
  • ການກະກຽມຄັດເລືອກເມືອງທ່ອງທ່ຽວສະອາດອາຊຽນ ແລະ ລາງວັນການທ່ອງທ່ຽວແບບຍືນຍົງອາຊຽນ ສຳລັບປີ 2022-2023 ມອບໃຫ້ທ່ານຮອງເຈົ້າຄອງນະຄອນຫຼວງວຽງຈັນ ຊີ້ນຳກ່ຽວກັບຮ່າງຂໍ້ຕົກລົງວ່າດ້ວຍການແຕ່ງຕັ້ງຄະນະກຳມະການປະເມີນຜົນມາດຕະຖານເມືອງທ່ອງທ່ຽວສະອາດອາຊຽນ ແລະ ການທ່ອງທ່ຽວແບບຍືນຍົງອາຊຽນ ຂັ້ນນະຄອນຫຼວງວຽງຈັນ ໃຫ້ສຳເລັດ ແລະ ສາມາດດຳເນີນການໄດ້ ໂດຍໄວ ແລະ ເພື່ອໃຫ້ໄປຕາມແຜນງານຂອງອາຊຽນໄດ້ກຳນົດ ຖ້າໂຮງແຮມໃດບໍ່ສາມາດໄປຕໍ່ໄດ້ ແມ່ນໃຫ້ຢັ້ງຢືນເຫດຜົນມາ ແລະ ໃຫ້ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ເປັນເຈົ້າການ ສົມທຽບງົບປະມານ ຄືນໃໝ່.

ນອກນັ້ນ, ປະທານກອງປະຊຸມ ຍັງໄດ້ເນັ້ນໜັກໃສ່ແຜນວຽກຈຸດສຸມໃນຕໍ່ໜ້າ ດັ່ງນີ້:

ປີ 2022 ເປັນປີທີ່ມີສິ່ງທ່ວງຫຼາຍ ເຮັດໃຫ້ນະຄອນຫຼວງວຽງຈັນ ພວກເຮົາສ້າງບາດກ້າວບຸກທະລຸ ໃນການຫັນ ປ່ຽນຫຼາຍດ້ານ ສະນັ້ນແຕ່ລະຂະແໜງການຕ້ອງຫັນເປັນທິດທາງ, ແຜນການ ແລະ ເປັນມາດຕະການຕົວຈິງໃນການຈັດຕັ້ງປະຕິບັດວຽກງານຂອງພວກເຮົາ ໃຫ້ມີແຜນວຽກຈຸດສຸມ ແລະ ລະອຽດຕາມແຕ່ລະໜ້າວຽກທີ່ໄດ້ກໍານົດ. ພ້ອມນີ້ກໍ່ໃຫ້ກໍານົດທິດທາງແຜນວຽກ ດັ່ງນີ້:

  1. ສືບຕໍ່ສ້າງຄວາມເຂັ້ມແຂງ, ຄວາມໝັ້ນຄົງ ແລະ ຄວາມເປັນລະບຽບຮຽບຮ້ອຍຂອງສັງຄົມຢ່າງໜັກແໜ້ນ ແລະ ສືບຕໍ່ຊຸກຍູ້ການຜະລິດ, ການບໍລິການຂອງນະຄອນຫຼວງວຽງຈັນ ໃຫ້ມີລັກສະນະແກ້ໄຂຂໍ້ຫຍຸ້ງຍາກ, ກ້າວກະໂດດ ແລະ ມີກົນໄກການປະສານງານໃຫ້ຄ່ອງຕົວ.
  2. ສືບຕໍ່ຈັດຕັ້ງຜັນຂະຫຍາຍມະຕິຂອງພັກ ແລະ ມະຕິຂອງອົງຄະນະພັກນະຄອນຫຼວງວຽງຈັນ, ມະຕິຂອງສະພາປະຊາຊົນນະຄອນຫຼວງວຽງຈັນ ທີ່ໄດ້ຮັບຮອງໃນກອງປະຊຸມ ລວມທັງບົດລາຍງານລັດຖະມົນຕີ ໃຫ້ເປັນຮູບປະທໍາ ແລະ ແບ່ງຄວາມຮັບຜິດຊອບທີ່ຊັດເຈນ ມີກົນໄກໃນການຕິດຕາມກວດກາ, ມີກໍານົດເວລາການຈັດຕັ້ງປະຕິບັດແຕ່ລະໜ້າວຽກ.
  3. ໃຫ້ແຕ່ລະຂະແໜງການ ສືບຕໍ່ເປັນເຈົ້າການປະຕິບັດໃນການຊຸກຍູ້ມາດຕະການຄວບຄຸມການແພ່ລະບາດຂອງພະຍາດໂຄວິດ-19 ໃນຊຸມຊົນ ຢູ່ນະຄອນຫຼວງວຽງຈັນ ຢ່າງແຂງແຮງ, ເຮັດແນວໃດໃຫ້ຈໍານວນຜູ້ຕິດເຊືື້ອຫຼຸດລົງຢ່າງຊັດເຈນ, ບັນຫາໃດທີ່ຍັງຄົງຄ້າງ, ທີ່ຍັງປະຕິບັດບໍ່ໄດ້ ຕ້ອງໄດ້ຄົ້ນຄວ້າວິທີການຮ່ວມກັນ ເພື່ອກໍານົດທິດທາງຢ່າງລະອຽດ, ຊັດເຈນ ແລະ ຈະແຈ້ງ ໂດຍສະເພາະການໃຫ້ວັກຊີນ ຕ້ອງໄດ້ບຸກທະລຸ ແລະ ເປັນບູລິມະສິດ ສະນັ້ນຕ້ອງມີການແບ່ງຄວາມຮັບຜິດຊອບ, ແບ່ງງານກັນໃນການຕິດຕາມກວດກາ. ເພາະເຫັນວ່າການໃຫ້ວັກຊີນແມ່ນຍັງບໍ່ທັນໂລ່ງລ່ຽນ ຍັງມີປະກົດການຫຍໍ້ທໍ້ໃນຕົວ ແລະ ນອກຕົວ ແລະ ມີຫາງສຽງສັງຄົມຕໍ່ກັບການໃຫ້ວັກຊີນຢູ່ນະຄອນຫຼວງວຽງຈັນ, ນອກນັ້ນ ມາດຕະການອື່ນໆ ກໍ່ຮຽກຮ້ອງໃຫ້ສັງຄົມມີສ່ວນຮ່ວມ ສະນັ້ນໃຫ້ຂະແໜງການ ແລະ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ເອົາໃຈໃສ່ຕື່ມ.
  4. ການແກ້ໄຂຂໍ້ຂັດແຍ່ງຕ່າງໆໃນສັງຄົມ ຢູ່ນະຄອນຫຼວງວຽງຈັນ ເຫັນວ່າມີລັກສະນະແພ່ກວ້າງ ສະນັ້ນໃຫ້ບັນ ດາຂະແໜງການທີ່ກ່ຽວຂ້ອງ ສືບຕໍ່ປະຕິບັດວຽກງານຢ່າງຈິງຈັງ ລວມທັງບັນຫາຄວາມບໍ່ສະຫງົບ ແລະ ຄວາມບໍ່ເປັນລະ ບຽບຮຽບຮ້ອຍໃນສັງຄົມ ໃຫ້ເຂົ້າສູ່ສະພາບປົກກະຕິ ລວມທັງການແກ້ໄຂຄໍາຮ້ອງ-ຄໍາສະເໜີຂອງປະຊາຊົນ ຊາວນະຄອນ ຫຼວງວຽງຈັນ ທີ່ຕິດພັນກັບການພັດທະນານະຄອນຫຼວງວຽງຈັນ ຕ້ອງໄດ້ຮັບການແກ້ໄຂຢ່າງຕໍ່ເນື່ອງ ແລະ ທົ່ວເຖິງ.
  5. ການຊຸກຍູ້ການຜະລິດສິນຄ້າ ແລະ ສະບຽງອາຫານ ເພື່ອສະໜອງໃຫ້ຊາວນະຄອນຫຼວງວຽງຈັນ ເປັນບັນຫາທີ່ສໍາຄັັນ ໃນເງື່ອນໄຂທີ່ເຮົາຈະເປີດຮັບນັກທ່ອງທ່ຽວ ເຂົ້າສູ່ນະຄອນຫຼວງວຽງຈັນ ແລະ ເປີດບໍລິການເສັ້ນທາງລົດໄຟ ລາວ-ຈີນ, ຕ້ອງຮັບປະກັນທາງດ້ານສະບຽງອາຫານ, ຄ່າຄອງຊີບ ທີ່ເປັນບຸລິມະສິດຂອງອົງການປົກຄອງ ທີ່ຕ້ອງໄດ້ສືບຕໍ່ຈັດຕັ້ງປະຕິບັດ, ມີກົນໄກ ກະຕຸກຊຸກຍູ້ ເພື່ອແກ້ໄຂບັນຫາຂໍ້ຄົງຄ້າງໃຫ້ໄດ້ຮັບການຈັດຕັ້ງປະຕິບັດ.
  6. ການຄົ້ນຄວ້າສໍາຫຼວດຜົນກະທົບທາງດ້ານເສດຖະກິດ ທີ່ພວກເຮົາພົບຄວາມຫຍຸ້ງຍາກ ໃຫ້ພະແນກແຜນການ ແລະ ການລົງທຶນ, ຂະແໜງສະຖິຕິ ນະຄອນຫຼວງວຽງຈັນ ແລະ ຂະແໜງການອື່ນໆໃນອົງການປົກຄອງນະຄອນຫຼວງວຽງຈັນ ແລະ ອົງການປົກຄອງເມືອງ ເກັບກໍາຂໍ້ມູນ ເພື່ອເຮັດໃຫ້ການຈັດຕັ້ງປະຕິບັດ ຊຸກຍູ້ໃຫ້ການກະຕຸ້ນດ້ານເສດຖະກິດ ແລະ ຊີວິດການເປັນຢູ່ຂອງປະຊາຊົນ ໃຫ້ມີລັກສະນະຕັ້ງໜ້າ.
  7. ທີ່ຕິດພັນກັບມະຕິກອງປະຊຸມໃຫຍ່ ຄັ້ງທີ 7 ຂອງອົງຄະນະພັກນະຄອນຫຼວງວຽງຈັນ ໃນການແກ້ໄຂຄວາມ ທຸກຍາກຢູ່ນະຄອຫຼວງວຽງຈັນ ໂດຍປະຕິບັດຕາມດໍາລັດ 348/ລບ, ລົງວັນທີ 16 ພະຈິກ 2017 ໃນນີ້ພວກເຮົາຕ້ອງໄດ້ບຸກທະລຸໃນປີ 2022, ສະນັ້ນໃຫ້ແຕ່ລະຂະແໜງການ ກໍ່ຄືສະມາຊິກອົງການປົກຄອງນະຄອນຫຼວງວຽງຈັນ ຕ້ອງມີສ່ວນຮ່ວມໃນການຈັດຕັ້ງປະຕິບັດວຽກງານ ເພື່ອແກ້ໄຂບັນຫາດັ່ງກ່າວໃຫ້ຫຼຸດລົງຢ່າງຈະແຈ້ງ.
  8. ໃນໂອກາດສົ່ງທ້າຍປີເກົ່າ ແລະ ຕ້ອນຮັບປີໃໝ່ 2022 ໃຫ້ຮັບປະກັນໄດ້ບັນຍາກາດ (New normal) ຕາມມາດຕະການຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ວາງອອກ ແມ່ນເປັນວຽກງານຂອງສະມາຊິກອົງການປົກຄອງນະຄອນຫຼວງວຽງຈັນ, ສະນັ້ນໃຫ້ບັນດາທ່ານເປັນເຈົ້າການສົມທົບກັບ ກອງບັນຊາການທະຫານ, ກອງບັນຊາການປ້ອງກັນຄວາມສະຫງົບ, ເມືອງ ແລະ ຂະແໜງການ ກໍານົດວາງແຜນງານແຕ່ມື້ ນີ້ເປັນຕົ້ນໄປ ເພື່ອສາມາດຄວບຄຸມສະຖານະການໃຫ້ທັນການ ເປັນຕົ້ນສຽງເນືອງນັນ ແລະ ບັ້ງກະໂພກ.

ສໍາລັບວຽກງານປີ 2022 ດ້ານທິດທາງລວມ ແມ່ນຈະຕ້ອງໄດ້ສືບຕໍ່ຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ ແລະ ແຜນງົບປະມານປະຈໍາປີ 2022 ໃຫ້ກໍານົດເປັນເດືອນ, ງວດ, ຫົກເດືອນ ແລະ ປີ. ໃຫ້ບັນດາສະມາຊິກອົງການປົກຄອງນະຄອນຫຼວງວຽງຈັນ ນໍາເອົາເນື້ອໃນຈິດໃຈກອງປະຊຸມຄັ້ງນີ້ໄປຄົ້ນຄວ້າ, ຈັດຕັ້ງຜັນຂະຫຍາຍຢູ່ຂະແໜງການຕົນດ້ວຍຄວາມຮັບຜິດຊອບ ຮ່ວມບຸກທະລຸໃໝ່, ໝູນໃຊ້ກາລະໂອກາດທ່າແຮງ ເຮັດໃຫ້ບັນດາຄາດໝາຍຂອງພວກເຮົາ ໃນປີ 2022 ນີ້ ບັນລຸຜົນສໍາເລັດ ນອກນີ້ກໍ່ສະແດງຄວາມຊົມເຊີຍບັນດາຂະແໜງການ ທີ່ຄຸ້ມຄອງການເກັບລາຍຮັບງົບປະມານຂອງນະຄອນຫຼວງວຽງຈັນ ສາມາດບັນລຸໄດ້ລື່ນແຜນການເປັນປີທີ 4.

(ຂອບໃຈ)

ຄົ້ນຫາ

ປະຕິທິນ

January 2022
S M T W T F S
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 50

ຈຳນວນຜູ້ເຂົ້າຊົມວານນີ້ 63

ຈຳນວນຜູ້ເຂົ້າຊົມອາທິດນີ້ 113

ຈຳນວນຜູ້ເຂົ້າຊົມເດືອນນີ້ 1000

ຈຳນວນຜູ້ເຂົ້າຊົມທັງໝົດ 92574

Currently are 14 guests and no members online