ກອງປະຊຸມອົງການປົກຄອງ ນະຄອນຫຼວງວຽງຈັນ ຄັ້ງທີ 6, ສະໄໝທີ VII ໄດ້ດໍາເນີນໃນວັນທີ 23 ພະຈິກ 2021 ທີ່ຫ້ອງປະຊຸມຊັ້ນ I ຕຶກສໍານັກງານປົກຄອງນະຄອນຫຼວງວຽງຈັນ, ພາຍໃຕ້ການເປັນປະທານຂອງ ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫຼວງວຽງຈັນ, ໂດຍມີສະມາຊິກອົງການປົກຄອງ ແລະ ພະແນກການອ້ອມຂ້າງນະຄອນຫຼວງວຽງຈັນ ແລະ 9 ຕົວເມືອງ (ປະຊຸມຜ່ານລະບົບທາງໄກ) ເຂົ້າຮ່ວມທັງໝົດ 31 ທ່ານ, ຍິງ 3 ທ່ານ;

ກອງປະຊຸມໄດ້ພິຈາລະນາ ແລະ ໄດ້ຮັບຮອງເອົາ 4 ບັນຫາສໍາຄັນ ດັ່ງນີ້:

 

  1. ກອງປະຊຸມໄດ້ຮັບຮອງເອົາບົດລາຍງານສະພາບພົ້ນເດັ່ນປະຈໍາເດືອນ ພະຈິກ 2021 ຂອງນະຄອນຫຼວງວຽງຈັນ, ໂດຍຕີລາຄາວ່າ:

          1.1. ການຈັດຕັ້ງປະຕິບັດວຽກງານ ໃນໄລຍະເດືອນ ພະຈິກ ຜ່ານມາ:

  • ໄດ້ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2021 ແລະ ແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2022 ຂອງນະຄອນຫຼວງວຽງຈັນ; ໃນນັ້ນ ໄດ້ຄົ້ນຄວ້າ ແລະ ອອກນິຕິກໍາ ເພື່ອແກ້ໄຂບັນຫາທີ່ຕິດພັນກັບ ບັນດາໂຄງການລົງທຶນຕ່າງໆ ແລະ ໄດ້ຄົ້ນ ຄວ້າປຶກສາຫາລື ກ່ຽວກັບບັນດາໂຄງການພັດທະນາ ທີ່ມີຄວາມຊັກຊ້າແກ່ຍາວ ຢູ່ນະຄອນຫຼວງວຽງຈັນ.
  • ໄດ້ຈັດຕັ້ງປະຕິບັດບັນດາຄາດໝາຍ ຂອງວຽກງານວັດທະນະທໍາ-ສັງຄົມ ໃຫ້ບັນລຸຄາດໝາຍທີ່ວາງໄວ້.
  • ໄດ້ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ໂດຍໄດ້ແກ້ໄຂບັນຫາຫຍໍ້ທໍ້ທີ່ເກີດຂຶ້ນຢູ່ໃນສັງຄົມ ທົ່ວນະຄອນຫຼວງວຽງຈັນໃຫ້ຫຼຸດໜ່ອຍຖອຍລົງ.
  • ໄດ້ຈັດຕັ້ງປະຕິບັດວຽກງານວັດທະນະທໍາ-ສັງຄົມ ແລະ ວຽກງານການຕ່າງປະເທດ; ໃນນັ້ນ ໄດ້ສຸມໃສ່ການປ້ອງກັນ ແລະ ແກ້ໄຂພະຍາດລະບາດໂຄວິດ-19 ແລະ ໄດ້ອອກແຈ້ງການ ທີ່ເປັນມາດຕະການຈັດຕັ້ງປະຕິບັດ ໃນແຕ່ລະໄລຍະ; ພ້ອມດຽວກັນນັ້ ກໍ່ໄດ້ມີການຄົ້ນຄວ້າ ກ່ຽວກັບມາດຕະການກະກຽມເປີດການຮຽນ-ການສອນແບບເຊິ່ງໜ້າ ຢູ່ບາງສະຖາບັນການສຶກສາ ທີ່ມີການຮັບປະກັນ; ລົງຊຸກຍູ້ບັນດາຂົງເຂດທ່ອງທ່ຽວ, ບໍລິການ ແລະ ວຽກງານປິ່ນອ້ອມໃນແຕ່ລະຂົງເຂດ.
  • ຄະນະພັກ-ອົງການປົກຄອງ ນວ ໄດ້ສຸມໃສ່ກະກຽມບັນດາເງື່ອນໄຂ ແລະ ສິ່ງທີ່ເອື້ອອໍານວຍ ເພື່ອກະກຽມເປີດບໍລິການທາງລົດໄຟລາວ-ຈີນ.
  • ພົ້ນເດັ່ນກວ່າໝູ່ ແມ່ນອົງການປົກຄອງ ນວ ໄດ້ຈັດຕັ້ງປະຕິບັດ 2 ວາລະແຫ່ງຊາດ, ໂດຍໄດ້ມີການຜັນຂະຫຍາຍ ແລະ ມີການຈັດກອງປະຊຸມຮ່ວມກັບພາກສ່ວນກ່ຽວຂ້ອງ ເພື່ອລາຍງານການຈັດຕັ້ງປະຕິບັດໃນແຕ່ລະອາທິດ, ແຕ່ລະເດືອນ ໂດຍໄດ້ມີການສະຫຼູບສັງລວມ ເພື່ອລາຍງານຫາລັດຖະບານ ຢ່າງເປັນປົກກະຕິ.

          1.2. ຮັບຮອງເອົາແຜນວຽກຈຸດສຸມປະຈໍາເດືອນ ທັນວາ 2021 ດັ່ງນີ້:

  • ສຸມໃສ່ການຄົ້ນຄວ້າບັນດານະໂຍບາຍ ທີ່ມີສາຍກ່ຽວພັນກັບການແກ້ໄຂພະຍາດລະບາດ ໂຄວິດ-19 ຢູ່ໃນຂົງເຂດທີ່ໄດ້ຮັບຜົນກະທົບ ເປັນຕົ້ນ: ຂົງເຂດການທ່ອງທ່ຽວ, ການບໍລິການ, ການຜະລິດ...
  • ເອົາໃຈໃສ່ ຊຸກຍູ້ວຽກງານການຜະລິດແບບຕ່ອງໂສ້ ແລະ ກະກຽມພັດທະນາໂຄງລ່າງ ທີ່ຕິດພັນກັບຂະແໜງການທ່ອງທ່ຽວ ໂດຍຕິດພັນກັບການກະກຽມເປີດບໍລິການທາງລົດໄຟລາວ-ຈີນ.
  • ໃຫ້ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອກຽມປ້ອງກັນການເປີດນໍາໃຊ້ທາງລົດໄຟລາວ-ຈີນ, ໂດຍໃຫ້ມີການສົມທົບກັບພະແນກການກ່ຽວຂ້ອງ.
  • ນອກນັ້ນ ໃຫ້ເອົາໃຈໃສ່ການຮັບຮອງນິຕິກໍາ ກ່ຽວກັບການຮັບຮອງເອົາການກໍານົດຫົວໜ່ວຍລາຄາທີ່ດິນ, ໂດຍມອບໃຫ້ພະແນກການເງິນ ແລະ ພະແນກຊັບພະຍາກອນທໍາມະຊາດ-ສິ່ງແວດລ້ອມ ນະຄອນຫຼວງວຽງຈັນ, ສ່ວນບັນຫາທີ່ຍັງເປັນຂໍ້ຄົງຄ້າງ ແມ່ນໃຫ້ສືບຕໍ່ຈັດຕັ້ງປະຕິບັດໃຫ້ສໍາເລັດຕາມແຜນທີ່ວາງໄວ້.
  • ມາດຕະການຈັດຕັ້ງປະຕິບັດ: ມອບໃຫ້ບັນດາຮອງເຈົ້າຄອງນະຄອນຫຼວງວຽງຈັນ ລົງຊຸກຍູ້ການຈັດເກັບລາຍຮັບປະຈໍາປີ ເຂົ້າງົບປະມານ (ທີ່ຍັງເຫຼືອອີກໜຶ່ງເດືອນໃນຂ້າງໜ້າ) ເພື່ອໃຫ້ໂຕເລກຄາດໝາຍນັ້ນໄດ້ໄກ້ເປົ້າທີ່ສຸດ, ພາຍໃຕ້ເງື່ອນໄຂທີ່ໄດ້ຮັບຜົນກະທົບຈາກການແຜ່ລະບາດ ຂອງພະຍາດໂຄວິດ-19 ແລະ ໃຫ້ນໍາໃຊ້ມາດຕະການ, ບົດແນະນໍາ ທີ່ເປັນການກະຕຸກຊຸກຍູ້ເຂົ້າໃນວຽກງານດັ່ງກ່າວ.

 

  1. ໄດ້ຮັບຮອງ ກ່ຽວກັບຫົວຂໍ້ທີ່ຈະນໍາເຂົ້າພິຈາລະນາ ແລະ ຊີ້ແຈງຕໍ່ກອງປະຊຸມ ສະໄໝສາມັນ ເທື່ອທີ 2 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II:

2.1. ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2021 ແລະ ແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2022 ຂອງນະຄອນຫຼວງວຽງຈັນ;

2.2. ຄວາມຄືບໜ້າການຈັດຕັ້ງປະຕິບັດບັນດາໂຄງການພັດທະນາ ທີ່ມີຄວາມຊັກຊ້າແກ່ຍາວ ຢູ່ນະຄອນຫຼວງວຽງຈັນ ຄື: ໂຄງການພັດທະນາທີ່ດິນໜອງແປນ, ໂຄງການໜອງບົວໃໝ່, ໂຄງການກໍ່ສ້າງເສັ້ນທາງຕັດ  ໃໝ່ແຕ່ບ້ານດອນນົກຂຸ້ມ-ບ້ານດອນກອຍ-ບ້ານຊຽງດາ, ດົງໂພສີ ເຊື່ອມຕໍ່ໃສ່ເສັ້ນທາງ 450 ປີ ແລະ ການພັດທະນາໂຄງການເຂື່ອນໄຟຟ້າອະເນກປະສົງ 5 ເມກະວັດຢູ່ນໍ້າສັງ, ບ້ານວັງມ້າ ເມືອງສັງທອງ ແລະ ໂຄງການຂະຫຍາຍໂຮງງານນໍ້າປະປາຈີ່ນາຍໂມ້ ແລະ ລະບົບທໍ່ ຂອງນະຄອນຫຼວງວຽງຈັນ;

2.3. ການຊົດເຊີຍໃຫ້ປະຊາຊົນ ທີ່ຖືກຜົນກະທົບຈາກໂຄງການພັດທະນາ ຄື: ໂຄງການພັດທະນາທ່າບົກ-ທ່ານາແລ້ງ ແລະ ເຂດໂລຈິສຕິກ ນະຄອນຫຼວງວຽງຈັນ, ໂຄງການທາງດ່ວນວຽງຈັນ ໝາຍເລກ 1 ແລະ ໂຄງການກໍ່ສ້າງທາງລົດໄຟ ລາວ-ຈີນ;

  1. ໄດ້ຮັບຮອງ ກ່ຽວກັບ ຮ່າງ ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະຄຸ້ມຄອງດ່ານສາກົນສິນຄ້າທ່າບົກ-ທ່ານາແລ້ງ;
  2. ໄດ້ຮັບຮອງ ກ່ຽວກັບ ຮ່າງ ຂໍ້ຕົກລົງວ່າດ້ວຍການຮັບຮອງເອົາຮູບແບບອາຄານ ສໍານັກງານຫ້ອງວ່າການປົກຄອງເມືອງ ແລະ ຮູບແບບເສັ້ນທາງເຂົ້າ-ອອກ ຫ້ອງວ່າການປົກຄອງເມືອງ ໃໝ່ ຂອງຄະນະຮັບຜິດຊອບຄົ້ນຄວ້າສ້າງຕັ້ງເມືອງໃໝ່;

ນອກນັ້ນ, ປະທານກອງປະຊຸມ ຍັງໄດ້ເນັ້ນໜັກໃສ່ແຜນວຽກຈຸດສຸມໃນຕໍ່ໜ້າ ດັ່ງນີ້:

  1. ສຸມໃສ່ວຽກງານ ປກຊ-ປກສ ທົ່ວນະຄອນຫຼວງວຽງຈັນ ໃຫ້ມີຄວາມສະຫງົບໂດຍພື້ນຖານ;
  2. ສືບຕໍ່ຍົກສູງຄວາມເປັນເຈົ້າການໃນການປະຕິບັດມາດຕະການ ໃນວຽກງານຕ້ານສະກັນກັ້ນຄວບຄຸມ ແລະ ແກ້ໄຂການແຜ່ລະບາດໂຄວິດ-19 ໃນຊຸມຊົນຢູ່ ນວ ໃຫ້ເຂັ້ມແຂງ ແລະ ໃຫ້ມີຈຳນວນຜູ້ຕິດເຊື້ອຕ້ອງຫລຸດລົງ ຢ່າງຊັດເຈນ ປົດຈໍານວນບ້ານແດງໃຫ້ເຫຼືອໜ້ອຍທີ່ສຸດ, ການຊັກວັກແຊງໃຫ້ຄົບຕາມແຜນການ;
  3. ສືບຕໍ່ດຳເນີນການຢ່າງແຂງແຮງ ແລະ ໃຫ້ສຳເລັດຂັ້ນພື້ນຖານ ໃນການແກ້ໄຂບັນດາຂໍ້ຂັດແຍ່ງ ທາງດ້ານທີ່ດີນ ໃນບັນດາໂຄງການຕ່າງໆ ໃຫ້ມີຄວາມສະຫງົບ ເປັນລະບຽບຮຽບຮ້ອຍ, ໂດຍສະເພາະ ໂຄງການທາງ ລົດໄຟລາວ-ຈີນ, ໂຄງການສາຍສົ່ງໄຟຟ້າ, ໂຄງການກໍ່ສ້າງເສັ້ນທາງຕ່າງໆ ແລະ ໂຄງການພັດທະນາອຶ່ນໆ, ຊຶ່ງບັນຫາດັ່ງກ່າວແມ່ນຄວາມຮັບຜິດຊອບຂອງພາກສ່ວນທີ່ກ່ຽວຂ້ອງ.
  4. ການຊຸກຍູ້ສົ່ງເສີມການຜະລິດຂອງປະຊາຊົນໃນການເກັບກ່ຽວຜົນຜະລິດ ແລະ ກະກຽມປູກພຶດລະດູແລ້ງ ເຮັດແນວໃດໃຫ້ຮັບປະກັນສິນຄ້າສະບຽງອາຫານ ໃນ ນວ, ໂດຍສະເພາະ ຂະແໜງຊົນລະປະທານ ເພື່ອຮັບປະກັນການຕອບສະໜອງລະບົບນໍ້າ ໃຫ້ທົ່ວເຖິງ.
  5. ຄົ້ນຄ້ວາສຳຫລວດ ຜົນກະທົບທາງດ້ານເສດທະກິດ ແລະ ແກ້ໄຂຄວາມທຸກຍາກໃຫ້ບຸກທະລຸ ແລະ ເພື່ອຊຸກຍູ້ໃຫ້ມີການເໜັງຕີງ ກະຕຸ້ນເສດຖະກິດ, ຊຶ່ງໄດ້ກຳນົດເປັນໜ້າວຽກລະອຽດຢູ່ໃນວາລະແຫ່ງຊາດ ໂດຍມີການຄົ້ນຄວ້າໂຄງປະກອບເສດຖະກິດ, ໂຄງປະກອບຂອງລາຄາສິນຄ້າ ເພື່ອແກ້ໄຂຊີວິດການເປັນຢູ່ຂອງປະຊາຊົນຊາວນະຄອນຫຼວງວຽງຈັນ.
  6. ສ້າງກົນໄກ ໃນການສຳຫລວດປະເມີນຜົນມາດຖານພົ້ນທຸກ ເພື່ອຕີລາຄາບ້ານພັດທະນາ ຕາມດຳລັດ 348 ແລະ ກະກຽມເປີດບັ້ນດຳເນີນການປະເມີນຜົນ ປະຈໍາປີ 2021 ໃຫ້ສຳເລັດຕາມຄາດໝາຍທີ່ວາງໄວ້;
  7. ໃນເດືອນ ທັນວາ ທີ່ຈະມາເຖິງນີ້, ແມ່ນຈະໄດ້ກະກຽມສະເຫຼີມສະຫຼອງວັນບຸນສໍາຄັນຂອງພັກ-ຂອງຊາດຄື: ໂດຍສະເພາະ ແມ່ນການສະເຫຼີມສະຫຼອງວັນຊາດທີ 2 ທັນວາ, ການເປີດນຳໃຊ້ທາງລົດໄຟລາວ-ຈີນ, ວັນຄ້າຍວັນເກີດຂອງອາດີດປະທານ ໄກສອນ ພົມວິຫານ, ຊຶ່ງມັນໄດ້ຕິດພັນກັບວຽກງານຂອງອົງການປົກຄອງ ນວ ແລະ ມັນຮຽກຮ້ອງໃຫ້ມີການປ້ອງກັນຄວາມສະຫງົບຄວາມປອດໄພ ໃຫ້ໄດ້ໂດຍພື້ນຖານ; ພ້ອມດຽວກັນນັ້ນ ອົງການປົກຄອງ ນວ ກໍ່ຈະໄດ້ອອກນິຕິກໍາ, ແຈ້ງການຫາບັນດາເມືອງ, ພະແນກການ ເພື່ອກະກຽມປະດັບປະດາ ສະເຫຼີມສະຫຼອງວັນຊາດທີ 2 ທັນວາ ໃຫ້ເປັນຂະບວນການຝົດຟື້ນທົ່ວນະຄອນຫຼວງວຽງຈັນ, ໂດຍໃຫ້ເລີ່ມຈັດຕັ້ງປະຕິບັດແຕ່ວັນທີ 24 ພະຈິກ ເປັນຕົ້ນໄປ.
  8. ກະກຽມກົນໄກ ທາງດ້ານວຽງານການສຶກສາ, ວຽກງານບຸກຄະລາກອນ ເພື່ອຮັບມືກັບສະພາບໄພຫວ່າງງານ ຢູ່ໃນນະຄອນຫຼວງວຽງຈັນ, ພ້ອມດຽວກັນນັ້ນ ກໍ່ຕ້ອງກະກຽມຮັບມືກັບພະຍາດລະບາດຕາມລະດູ ໃຫ້ທ່ວງທັນກັບສະພາບການຕົວຈິງ.

ໃນຕອນທ້າຍນີ້ ບັນດາທ່ານສະມາຊິກອົງການປົກຄອງ ຕ້ອງໄດ້ພ້ອມກັນສືບຕໍ່ຄົ້ນຄ້ວາຜັນຂະຫຍາຍ ບັນ ດາແຜນວຽກຂອງແຕ່ລະຂະແໜງການໃນຄວາມຮັບຜິດຊອບຕົນ ສ້າງບາດກ້າວບຸກທະລຸໃໝ່ ສຸມກຳລັງເຫື່ອແຮງ ຂຸດຄົ້ນໝູນໃຊ້ກາລະໂອກາດທ່າແຮງ ໃຫ້ບັນດາຄາດໝາຍ ແລະ ຕົວຊີ້ວັດ ທີ່ໄດ້ກຳນົດໄວ້ໃນແຜນ ປີ 2021 ນີ້ ໃຫ້ບັນລຸຕາມລະດັບຄາດໝາຍ.

 

(ຂອບໃຈ)

ຄົ້ນຫາ

ປະຕິທິນ

January 2022
S M T W T F S
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 52

ຈຳນວນຜູ້ເຂົ້າຊົມວານນີ້ 63

ຈຳນວນຜູ້ເຂົ້າຊົມອາທິດນີ້ 115

ຈຳນວນຜູ້ເຂົ້າຊົມເດືອນນີ້ 1002

ຈຳນວນຜູ້ເຂົ້າຊົມທັງໝົດ 92576

Currently are 9 guests and no members online