Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !
      1. ຍຸດ​ທະ​ສາດ​ດ້ານ​ການ​ເມືອງ ສ້າງນະຄອນວຽງຈັນເປັນຫົວໜ່ວຍຍຸດທະສາດໜຶ່ງ​ຂອງ​ປະ​ເທດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ​(9ເມືອງ), ສ້າງບ້ານ(481ບ້ານ) ເປັນຫົວໜ່ວຍພັດທະນາຕາມມາດຖານຂອງລັດຖະບານກໍານົດ ​ແລະ ຕາມ 4 ​ເນື້ອ​ໃນ 4 ຄາດໝາຍຂອງກົມການເມືອງວາງອອກ; ຮັບປະກັນຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ ແລະ ຄວາມປອດໄພຢ່າງສະໝໍ່າສະ​ເໝີ.
      2. ຍຸດ​ທະ​ສາດການ​ພັດທະນາ​ເສດຖະກິດນຳເອົາ ນະຄອນວຽງ​ຈັນຫລຸດພົ້ນອອກຈາກສະຖານະພາບນະຄອນດ້ອຍພັດທະນາ, ຊຶ່ງມີຕົວຊີ້ວັດສໍາຄັນ ດັ່ງນີ້: ເສດຖະກິດຂະຫຍາຍຕົວ ຢ່າງຕໍ່ເນື່ອງ, ໝັ້ນທ່ຽງ. ລວມຍອດຜະລິດຕະພັນພາຍໃນເພີ່​ມຂຶ້ນຫລາຍ​ກວ່າ 10% ຕໍ່ປີ, ລາຍໄດ້ຂອງພົນລະເມືອງ ບັນລຸໄດ້ຫລາຍ​ກວ່າ 9.000 ໂດລາຕໍ່ຄົນຕໍ່ປີ, ລື່ນ 2015 (ບໍ່ຫລຸດ 2 ເທົ່າ). ຫັນ​ປ່ຽນ​ເສດຖະກິດ​ເຄິ່ງທໍາມະ​ຊາດ​ໄປ​ສູ່​ການ​ຜະລິດ​ສິນຄ້າ, ສ້າງ​ໂຄງ​ປະກອບເສດຖະກິດ​ຜະລິດ​ສິນຄ້າ​​ໄປສູ່​ລະບົບເສດຖະກິດ​ຕະຫລາດ​ຕາມ​ທິດ​ສັງຄົມ​ນິຍົມ​, ໂຄງປະກອບເສດຖະກິດໄດ້ ຫັນປ່ຽນໄປຕາມທິດຫັນເປັນອຸດສາຫະກໍາ-ທັນສະໄໝ;  ຜ່ານ​ຜ່າ​ໄດ້ຄວາມ​ບອບ​ບາງ​ດ້ານການເງິນ (HEG), ມີຖະນາການເງິນທີ່ເປັນເຈົ້າຕົນເອງ; ​ແກ້​ໄຂ​ໜີ້​ສິນ​ສາທາລະນະຢູ່​ໃນ​ເກນປົກກະຕິ. ປະຊາຊົນຊາວ​ເມືອງ​ທຸກ​ຄອບຄົວ​ມີຖານະການ​ເງິນ, ມີລາຍ​ໄດ້ພໍໃຊ້-ພໍ​ຈ່າຍ, ນຸ່ງ​ງາມ, ມີ​ເຮືອນ​ຢູ່​ຖາວອນ. ຢຶດຖື​ເປົ້າ​ໝາຍ​ການພັດທະນາຕາມ​ທິດຍືນຍົງ (SDG); ນັກທຸລະກິດ,​ ປະຊາຊົນແລະ​ຜູ້ ປະ​ກອບ​ການຮູ້ສຶກຕື່ນ​ຕົວ​ປະຕິບັດພັນທະພາສີ​-ອາກອນຂອງຕົນ​ຕາມກົດໝາຍ​ໄດ້​ເປັນ​ສ່ວນ​ໃຫຍ່.
      3. ຍຸດທະສາດການພັດທະນາຕົວເມືອງ-ສ້າງນະຄອນວຽງຈັນ ຕາມ​ທິດໃຫ້ເປັນ​ເມືອງໜ້າຢູ່ (6ສ), ຂະຫຍາຍຕົວ​ສົມສ່ວນ ​ແລະຍືນຍົງ, ​ໂດຍ​ຢຶດຖື​ການ​ພັດທະນາຕາມແຜນຜັງກວມລວມ, ແຜນຜັງພັດທະນາ​ຕາມແຕ່ລະຕົວ​ເມືອງ ​ແລະ ​ແຜນຜັງສະ​ເພາະ​ແຕ່ລະ​ເຂດ, ແຕ່ລະຖະໜົນ; ຍົກ​ລະດັບ​ພື້ນຖານ​ໂຄງ​ລ່າງ​ຂອງ​ເຂດ​ເມືອງ​ເກົ່າ ​(ຄຸ້ມເມືອງເກົ່າ) ໃຫ້​ພໍ​ເໝາະ ​ແລະ ກາຍເປັນເມືອງທ່ອງທ່ຽວ, ​ເຂດ​ບໍລິການ, ສູນ​ການ​ຄ້າພໍ​ ​ກາງ ​ແລະ ຂະໜາດ​ນ້ອຍ, ​ເປັນ​ບ່ອນ​ຕັ້ງສໍາ​ນັກ​ງານ-ອົງການ, ສະ​ຖາ​ບັນ​ສັງຄົມ; ສ້າງເຂດຊານເມືອງຕ້ອງໃຫ້​ກາຍ​ເປັນ​ເທດສະບານ ຫລື ​ເມືອງ​ນ້ອຍທີ່​ມີ​ສະພາບ​ແວດ​ລ້ອມ​ທໍາມະ​ຊາດດີ (Eco-City), ບັນລຸ​ມາດຖານ (ສ ສີຂຽວ), ​ເປັນຊົນນະບົດ​​ໃໝ່ສີວິ​ໄລ; ສ້າງ​ເຂດ​ພັດທະນາ​ບຶງ​ທາດຫລວງ​ເປັນ​ຄຸ້ມ​ເມືອງ​ທັນ​ສະ​ໄໝ, ເຂດອຸດສາຫະກໍາ​ໄຊ​ເສດ​ຖາ-ທັງ​ເປັນ​ສວນ ​ແລະ ​ເປັນເຂດ​ອຸດ​ສາຫະ​ກໍາ​ໜັກ,​ ເຂດ​ນີຄົມໂຄກ​ສະອາດ-​ເປັນ​ເຂດ​ອຸດ​ສາຫະ​ກໍາ​ເບົາ,​ ເຂດ​ກະສິກໍາສົ່ງ​ອອກ ​ແລະ ​ເຂດ​ການ​ຄ້າ​ສາກົນ; ​ເຂດ​ດົງ​ໂພ​ສີ-​ເປັນ​ເຂດ​ການ​ສຶກສາ,​ ເຂດ​ສະໜາມກິລາ​ຊີ​ເກ​ມ ​ເປັນ​ເຂດກິລາ ​ແລະ ສວນ​ວັດທະນະທໍາ ​ແລະ ​ເຂດອື່ນໆ.
      4. ຍຸດທະສາດການພັດທະນາຊັບພະຍາກອນມະນຸດ-ສ້າງຄົນ​ເມືອງ​ຫລວງໃຫ້ມີສະຕິປັນຍາ, ມີຄວາມຮູ້-ຄວາມສາມາດ, ມີວິຊາຊີບ ແລະ ຄຸນສົມບັດສິນທໍາປະຕິວັດ, ມີສຸຂະພາບແຂງແຮງ, ອາຍຸຍືນສະເລ່ຍ78ປີ, ພົນລະເມືອງທຸກ​ຄົນມີລະດັບການສຶກສາຈົບຊັ້ນມັດທະຍົມຕອນປາຍ​ຂຶ້ນໄປ. ປົກປັກຮັກສາມູນເຊື້ອວັດທະນະທໍາ, ຮີດຄອງປະເພນີອັນດີງາມທີ່ເປັນເອກະລັກຂອງຊາດ, ຂອງນະຄອນຫລວງ, ປະຊາຊົນບັນດາເຜົ່າມີຄວາມສາມັກຄີປອງດອງ, ສັງຄົມມີຄວາມສີວິໄລ ແລະ ຍຸຕິທໍາ, ພົນລະເມືອງມີວຽກເຮັດງານທໍາ, ໄດ້ເຝິກອົບຮົມວິຊາຊີບ, ໄດ້ຮັບການແກ້ໄຂດ້ານສະຫວັດດີການສັງຄົມຢ່າງທົ່ວເຖິງ. ບັນລຸເປົ້າໝາຍສະຫັດສະວັດດ້ານການພັດທະນາຢ່າງສົມບູນ.
      5. ຍຸດທະສາດກ່ຽວກັບການປົກປັກຮັກສາ ແລະ ການນໍາໃຊ້ຊັບພະຍາກອນທໍາມະຊາດແບບຍືນຍົງ, ມີປະສິດທິຜົນ, ຕາມທິດຫັນເປັນສີຂຽວ ​ແລະຫລຸດ​ຄວາມ​ແຫ້ງ​ແລ້ງ (ສີຂຽວ​ຂອງ​ທຳ​ມະ​ຊາດ ແລະ ສີຂຽວ​ມະນຸດ​ສ້າງ​ຂຶ້ນ, ຜູ້​ບຸກ​ເບີກ​ດິນ ​ແລະ ປ່າ​ຊົມ​​ໃຊ້ 1 ​ເຮັກຕາ​​ໃດຈໍາ​ໃຫ້ປູກທົດ​ແທນຢ່າງ​ໜ້ອຍ 500 ຕົ້ນ ​ແລະ ທຸກ​ຄົນ​ປູກ​ຕົ້ນ​ໄມ້ 2 ຕົ້ນ/ປີ ຄວາມ​ສູງ 1,5 ​ແມັດ​ຂຶ້ນ​ໄປ). ຮັກສາ​ປ່າ​ສະຫງວນພູ​ພະນັງ, ພູ​ເຂົາ​ຄວາຍ, ປ່າ​ສະຫງວນ​ອື່ນໆຂອງ​ນະຄອນ​ວຽງ​ຈັນຢ່າງ​ໜຽວ​ແໜ້ນ, ຮັບປະກັນໃຫ້ມີເນື້ອທີ່ສີຂຽວປົກຫຸ້ມ 75%; ຮັກສາ ​ແລະ ຟື້ນ​ຟູ​ບຶງ, ໜອງ​ໃຫຍ່ 10 ​ເຮັກຕາ​ຂຶ້ນ​ໄປໃຫ້​ຄົງ​ຢູ່ຢ່າງຍືນ​ນານ, ຮັບປະກັນ​ໃຫ້ບຶງ​ທາດຫລວງ-ນາ​ຄວາຍ-ຫ້ວຍ​ໝາກ​ຮຽວກາຍເປັນ​ຄອງ​ລະບາຍນໍ້າ, ອ່າງ​ໂຕ່ງ​ນໍ້າ​ໃຫຍ່ ​ແລະ ຕາມ​ແ​ຜນຜັງ​ຂອງລັກຖະບານ , ຄຸ້ມ​ຄອງຮັກສາ​ ​ແລະ ປ້ອງ​ກັນ​ຕາຝັ່ງ​ເຈື່ອນເຂດ​​ນໍ້າຂອງ, ນໍ້າ​ງຶ່​ມ ແລະ​ ເຂດ​ລໍ້​ແຫລມອື່ນໆ; ຫລຸດຜ່ອນ​ເຫດການອັກຄີ​ໄພ​​ ແລະ ການ​ສູນ​ເສຍ​ຈາກ​ໄພ​ທໍາ​ມະ​ຊາດ (ນໍ້າຖ້ວມ, ​ແຫ້ງ​ແລ້​ງ, ໄຟ​ໄໝ້, ລົມພາຍຸ). ​
      6. ຍຸດທະສາດການເຊື່ອມໂຍງ​ກັບສາກົນ-ປະຕິບັດ​ນະ​ໂຍບາຍ​ຕ່າງປະ​ເທດ​ຂ​ອງພັກ-ລັດ ​ໃນ​ນັ້ນຖືການພົວພັນຮ່ວມມືກັບບັນດານະຄອນຫລວງ​ແມ່ນ​ເປັນ​ພັນທະ, ກັບນະຄອນ ແລະ ແຂວງຂອງປະເທດເພື່ອນມິດ​​ແມ່ນ​ບົນ​ພື້ນຖານມິດຕະພາບ, ຜົນ​ປະ​ໂຫຍ​ດ 2 ຝ່າຍ ​ແລະດໍາ​ເນີນ​ການ​ຕາມຄວາມ​ສາມາດ, ​ເສີມ​ຂະຫຍາຍຄຸນ​ປະ​ໂຫຍ​ດດ້ານທີ່​ຕັ້ງ​ເປັນ​ໃຈກາງຂອງ​ປະ​ເທດ ​ແລະ ​ເປັນ​ໃຈກາງ​ທາງ​ຜ່ານ​ຂອງ​ນະຄອນ​ອະນຸ​ພາກ​ພື້ນ​ໃນ​ລະດັບ​ດີ.

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 35

ຈຳນວນຜູ້ເຂົ້າຊົມວານນີ້ 16

ຈຳນວນຜູ້ເຂົ້າຊົມອາທິດນີ້ 35

ຈຳນວນຜູ້ເຂົ້າຊົມເດືອນນີ້ 930

ຈຳນວນຜູ້ເຂົ້າຊົມທັງໝົດ 29120

Currently are 10 guests and no members online

ແຜນທີ່ນະຄອນຫຼວງວຽງຈັນ