Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

34a06e378946f22acac78d9c8b58f58c

      ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ຈັດ​ພິທີ​ປະກາດ​ສວນພຶກສາສາດ-ຫ້ວຍ​ຍາງ-ດົງ​ໝາກຄາຍ ຂຶ້ນ​ວັນ​ທີ 9 ມິຖຸນາ 2018 ທີ່​ເຂດ​ປ່າ​ສະຫງວນ​ຫ້ວຍ​ຍາງ-ດົງ​ໝາກຄາຍ ເມືອງ​ໄຊ​ທານີ ນະຄອນຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ທ່ານ ອາ​ຊາງ ລາວ​ລີ ອະດີດ​ຮອງ​ນາຍົກລັດຖະມົນຕີ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ພ້ອມ​ດ້ວຍ​ບັນດາ​ລັດຖະມົນຕີ ຮອງ​ລັດຖະມົນຕີ ຜູ້ຕາງໜ້າ​ຈາກ​ອົງ​ການຈັດຕັ້ງ​ມະຫາຊົນ ອົງ​ການຈັດຕັ້ງ​ສາກົນ ອຳນາດ​ການ​ປົກຄອງ​ທ້ອງຖິ່ນ ພະນັກງານ ແລະ ປະຊາຊົນ​ເຂົ້າ​ຮ່ວມ

 

      ໃນ​ພິທີ ທ່ານ ສົມ​ມາດ ​ພົລ​ເສນາ ລັດຖະມົນຕີ ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ກ່າວ​ວ່າ: ຕາມ​ການ​ສະເໜີ​ຂອງ​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ລັດຖະບານ​ຈຶ່ງ​ໄດ້​ອອກ​ແຈ້ງ​ການ ສະບັບ​ເລກ​ທີ 585/​ຫສນຍ ຄື​ມອບ​ໃຫ້​ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ​ປັກ​ຫຼັກ​ເຂດ​ແດນ​ລະອຽດ​ ເພື່ອ​ປ້ອງ​ກັນ​ການ​ຈັບຈອງ ການ​ບຸກລຸກ​ເຂດ B ດັ່ງກ່າວ ແລະ ອະນຸ​ຮັກ​ຮັກສາ​ໃຫ້​ກາຍເປັນ​ເຂດ​ສີຂຽວ ດັ່ງນັ້ນ ກະຊວງ​ຊັບພະຍາກອນ​ທຳ​ມະ​ຊາດ ແລະ ສິ່ງ​ແວດລ້ອມ ໄດ້​ດຳເນີນ​ການ​ປັກ​ຫຼັກ​ອ້ອມ​ເຂດ B ຈຳນວນ 130 ຫຼັກ​ຮົ້ວ ກວມ​ເນື້ອທີ່ 268 ເຮັກຕາ ພ້ອມ​ທັງ​ສ້າງ​ປ້າຍ​ຖາວອນ ປະກາດ​ເປັນ​ສວນພຶກສາສາດ ເພື່ອ​ສືບຕໍ່​ປູກ​ຕົ້ນໄມ້​ນາໆ​ຊະນິດ ປະກອບສ່ວນ​ໃນ​ການ​ເພີ່ມ​ອັດຕາ​ປ່າໄມ້​ປົກ​ຫຸ້ມ ກໍ່​ຄືການ​ປົກ​ປັກ​ຮັກສາ ແລະ ຄຸ້ມ​ຄອງ​ເຂດ​ດັ່ງກ່າວ​ໃຫ້​ກາຍເປັນ​ເຂດ​ຂຽວ ເຊິ່ງ​ໃນ​ອະນາຄົດ ກະຊວງ​ຊັບພະຍາກອນ​ທຳ​ມະ​ຊາດ​ ແລະ ສິ່ງແວດລ້ອມ ຈະ​ໄດ້​ສົມທົບ​ກັບ​ກະຊວງ​ກະສິກຳ ແລະ ປ່າໄມ້ ເພື່ອ​ວາງ​ແຜນການ​ນຳ​ໃຊ້​ພື້ນ​ທີ່​ສີຂຽວ​ນີ້​ ໃຫ້​ກາຍເປັນ​ເຂດ​ສຶກ​ສາ​ນິເວດ​ວິທະຍາ ແລະ ແຫຼ່ງ​ທ່ອງ​ທ່ຽວ​ທຳ​ມະ​ຊາດ ເປັນ​ບ່ອນ​ພັກຜ່ອນ​ສຳລັບ​ພະນັກງານ ກໍ່​ຄື​ປະຊາຊົນ​ທີ່ຢູ່​ໃກ້ ແລະ ໄກ ພ້ອມ​ນັ້ນ ໄດ້​ສະເໜີ​ມາ​ຍັງ​ອົງການ​ປົກຄອງ​ເມືອງ​ໄຊ​ທານີ ອຳນາດ​ການ​ປົກຄອງ​ບ້ານ​ດົງ​ໝາກຄາຍ ບ້ານ​ໂນນ​ສະຫວ່າງ ແລະ ປະຊາຊົນ​ທັງ​ສອງ​ບ້ານ ​ຈົ່ງ​ໃຫ້ການ​ຮ່ວມ​ມື​ໃນ​ການ​ປົກ​ປັກ​ຮັກສາ​ເຂດ​ສີຂຽວ ​ໃຫ້​ກາຍເປັນ​ສວນພຶກສາສາດ​ໃນ​ອະນາຄົດ​ຢ່າງ​ສົມບູນ.

      ໃນ​ພິທີ ທ່ານ ບຸນ​ຍັງ ວໍລະ​ຈິດ ຍັງ​ໄດ້​ນຳພາ​ຄະນະ​ນຳ​ຂັ້ນ​ຕ່າງໆ​ ປູກ​ຕົ້ນໄມ້​ທາງ​ດ້ານ​ໜ້າ​ສວນພຶກສາສາດ ຫ້ວຍ​ຍາງ-ດົງ​ໝາກຄາຍ ປະກອບ​ມີ ໄມ້​ແຕ້ ແລະ ໄມ້​ດູ່ ຈຳນວນ 16 ຕົ້ນ ເຊິ່ງ​ຢູ່​ໃນ​ທ່າມກາງ​ທີ່​ທົ່ວ​ປວງ​ຊົນ​ລາວ​ທັງ​ຊາດ ​ສະເຫຼີມສະຫຼອງ​ວັນ​ປູກ​ຕົ້ນໄມ້​ແຫ່ງ​ຊາດ ຕິດ​ພັນ​ກັບ​ວັນເດັກນ້ອຍ​ສາກົນ 1 ມິຖຸນາ ວັນ​ສິ່ງແວດລ້ອມ​ແຫ່ງ​ຊາດ ແລະ ວັນ​ສິ່ງແວດລ້ອມ​ໂລກ.

 

 

ທີ່ມີຂໍ້ມູນ: ໜັງສືພີມວຽງຈັນໃໝ່

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 27

ຈຳນວນຜູ້ເຂົ້າຊົມວານນີ້ 60

ຈຳນວນຜູ້ເຂົ້າຊົມອາທິດນີ້ 159

ຈຳນວນຜູ້ເຂົ້າຊົມເດືອນນີ້ 923

ຈຳນວນຜູ້ເຂົ້າຊົມທັງໝົດ 27722

Currently are 38 guests and no members online

ແຜນທີ່ນະຄອນຫຼວງວຽງຈັນ