ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

sapha

  ກອງ​ປະຊຸມ​ຄັ້ງ​ປະຖົມ​ມະລຶກຂອງ​ສະພາ​ແຫ່ງ​ຊາດ ຊຸດ​ທີ VIII ໄດ້​ອັດ​ລົງ​ດ້ວຍ​ຜົນສຳເລັດ​ຢ່າງຈົບງາມ ພາຍຫຼັງ​ທີ່​ດຳເນີນ​ເປັນເວລາ 3 ວັນ ຢູ່​ສະພາ​ແຫ່ງ​ຊາດ ໂດຍ​ພິທີ​ປິດ​ກອງ​ປະຊຸມ​ດັ່ງກ່າວ ໄດ້​ຈັດ​ຂຶ້ນ​ວັນ​ທີ 22 ເມສາ 2016.

 

  ທ່ານ​ນາງ ປານີ ຢາ​ທໍ່​ຕູ້ ໄດ້ກ່າວ​ສູນ​ທອນ​ພົດ​ອັດ​ກອງ​ປະຊຸມບາງ​ຕອນ​ສຳ​ຄັນວ່າ: ກອງ​ປະຊຸມຄັ້ງ​ປະຖົມ​ມະລຶກ​ຂອງ​ສະພາ​ແຫ່ງຊາດ ຊຸດ​ທີ VIII ໄດ້​ດຳເນີນ​ເຕັມ​ໄປ​ດ້ວຍ​ບັນຍາ​ກາດ​ອັນ​ຟົດຟື້ນ​ ແຫ່ງ​ການເສີມ​ຂະຫຍາຍ​ສິດ​ປະຊາທິປະໄຕ ຕະຫຼອດ​ໄລຍະ 3 ວັນ​ຜ່ານ​ມາ ​ສສຊ ໄດ້​ຍົກ​ສູງ​ຄວາມ​ຮັບ​ຜິດຊອບ​ການເມືອງ​ຂອງ​ຕົນ ສຸມ​ທຸກສະຕິ​ປັນຍາ​ຄົ້ນຄວ້າພິຈາລະນາ ແລະ ຕົກລົງ​ຮັບຮອງ​ເອົາ​ບັນຫາສຳຄັນ​ຕ່າງໆ​ຂອງ​ຊາດ ​ດ້ວຍຄວາມ​ເປັນ​ເອກະ​ພາບ​ສູງຄື: ຮັບ​ຟັງ​ການ​ລາຍ​ງານ​ຜົນ​ຂອງການ​ເລືອກ​ຕັ້ງ ​ສສຊ ຊຸດ​ທີ VIII ແລະ ສະພາ​ປະຊາຊົນ​ແຂວງ ນະຄອນ​ຫຼວງ ແລະ ຢັ້ງຢືນ​ຄຸນ​ລັກສະ​ນະ​ຂອງ ​ສສຊ ຊຸດ​ທີ VIII ພິຈາລະ​ນາ ແລະ ຮັບຮອງ​ເອົາໂຄງ​ປະກອບກົງຈັກ​ຂອງ​ສະພາແຫ່ງ​ຊາດ ຊຸດ​ທີ VIII ເລືອກ​ຕັ້ງປະທານ ແລະ ຮອງ​ປະທານ​ປະເທດ ປະທານ ແລະ ຮອງ​ປະທານ​ສະພາ​ແຫ່ງ​ຊາດ ນາຍົກ​ລັດຖະ​ມົນຕີ ແລະ ຮອງ​ນາຍົກ​ລັດຖະ​ມົນຕີ ບັນດາ​ຄະນະ​ປະຈຳ​ສະພາ​ແຫ່ງ​ຊາດ ແຕ່ງຕັ້ງ​ປະທານ ຮອງ​ປະທານ​ກຳມາ​ທິ​ການ ແລະ ເລຂາທິການ​ສະພາ​ແຫ່ງ​ຊາດ ຊຸດ​ທີ VIII ຮັບຮອງ​ເອົາ​ໂຄງ​ປະກອບ​ການຈັດຕັ້ງ​ຂອງ​ລັດ​ຖະບານ ແລະ ສະມາຊິກ​ລັດ​ຖະບານ​ຊຸດ​ໃໝ່ ພ້ອມ​ທັງ​ເລືອກ​ຕັ້ງເອົາ​ຫົວໜ້າ​ອົງການ​ໄອ​ຍະ​ການປະຊາຊົນ​ສູງ​ສຸດ ແລະ ປະທານສານ​ປະຊາຊົນ​ສູງ​ສຸດ.

  ກອງ​ປະຊຸມ​ໄດ້​ຄົ້ນຄວ້າພິ​ຈາລະ​ນາ ແລະ ຕົກລົງ​ຮັບຮອງ​ເອົາວິໄສ​ທັດ​ຮອດ​ປີ 2030 ຍຸດ​ທະສາດ​ການ​ພັດທະນາ​ເສດຖະກິດ-ສັງຄົມຮອດ​ປີ 2025 ແລະ ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ 5 ປີ ຄັ້ງ​ທີ VIII (2016-2020) ແຜນ​ງົບ​ປະມານ​ແຫ່ງ​ລັດ 5 ປີ (2016-2020) ແຜນ​ດັດແກ້​ງົບປະມານ ປະຈຳ​ສົກ​ປີ 2015-2016 ແລະ ແຜນ​ງົບປະມານ​ຂ້າມ​ຜ່ານ 3 ເດືອນ ສົກ​ປີ 2016 ກອງ​ປະຊຸມໄດ້​ມອບ​ໃຫ້​ລັດຖະບານ​ຊີ້​ນຳ​ການຈັດ​ຕັ້ງ​ປະຕິບັດ​ເພີ່ມ​ເຕີມ 9 ມາດຕະການ ກ່ຽວ​ກັບ​ແຜນ​ພັດທະນາເສດຖະກິດ-ສັງຄົມ​ແຫ່ງ​ຊາດ 5 ປີ ຄັ້ງ​ທີ VIII ແລະ 6 ມາດ​ຕະການ​ໃນ​ແຜນ​ງົບປະມານ​ແຫ່ງລັດ ຄັ້ງ​ທີ VIII ພ້ອມ​ທັງ​ຜັນ​ຂະຫຍາຍ​ບັນດາ​ມາດ​ຕະການ​ທາງດ້ານ​ເສດຖະກິດ ການ​ເງິນ ງົບ​ປະມານ ເງິນຕາ ໃຫ້​ມີ​ປະ​ສິດທິ​ຜົນ ໃນ​ປີ 2016 ເພື່ອ​ສ້າງ​ບາດກ້າວຫັນປ່ຽນ​ໃໝ່​ຢ່າງ​ຕັ້ງໜ້າ ​ໃຫ້ການຈັດ​ຕັ້ງ​ປະຕິບັດ​ແຜນ​ພັດທະນາເສດຖະກິດ-ສັງຄົມ ແລະ ແຜນງົບປະມານ​ແຫ່ງ​ລັດ 4 ປີ​ຂ້າງໜ້າ ໃຫ້​ບັນລຸ​ຜົນສຳເລັດ ພິ​ຈາລະ​ນາ ແລະ ຮັບຮອງ​ເອົາ​ບົດລາຍ​ງານ​ກ່ຽວ​ກັບ​ວິໄສ​ທັດ​ຮອດປີ 2030 ຍຸດ​ທະ​ສາດ​ຮອດ​ປີ 2025 ແລະ ທິດ​ທາງ​ແຜນການ 5 ປີຂອງ​ສະພາ​ແຫ່ງ​ຊາດ ​ຊຸດ​ທີ VIII ຮັບຮອງ​ເອົາ​ການ​ສ້າງ ແລະ ປັບປຸງ​ກົດໝາຍ ກໍ່​ຄືທິດ​ທາງການເຄື່ອນໄຫວ​ຂອງ​ສະພາແຫ່ງ​ຊາດ 5 ປີ​ຕໍ່ໜ້າ ແນໃສ່ຕອບ​ສະໜອງ​ຄວາມ​ຮຽກຮ້ອງຕ້ອງການ​ແຫ່ງ​ການ​ຄຸ້ມ​ຄອງ​ລັດ ຄຸ້ມ​ຄອງ​ເສດຖະກິດ-ສັງຄົມ ໃນໄລຍະ​ໃໝ່.

  ຜົນສຳເລັດ​ຂອງ​ກອງ​ປະຊຸມຄັ້ງ​ນີ້ ສະແດງ​ເຖິງ​ຄວາມ​ເປັນ​ເອກະ​ພາບ ແລະ ຄວາມ​ຮັບ​ຜິດຊອບ​ການເມືອງ​ຂອງ ​ສສຊ ແມ່ນ​ການ​ປະກອບສ່ວນ​ອັນ​ສຳຄັນ​ຂອງ​ສະພາ​ແຫ່ງ​ຊາດ ເຂົ້າໃນ​ການ​ປັບປຸງ​ບູລະນະ​ລັດ​ປະຊາ​ທິ​ປະ​ໄຕ​ປະຊາຊົນ​ໃຫ້​ມີ​ຄວາມເຂັ້ມແຂງ ແລະ ໜັກ​ແໜ້ນ​ຂຶ້ນຕື່ມ ໃນ​ໄລຍະ​ດຳເນີນ​ກອງ​ປະຊຸມ ຍັງ​ໄດ້​ຮັບ​ຟັງ​ຄຳ​ຄິດ​ເຫັນ​ທີ່​ມີ​ປະໂຫຍດ​ຫຼາຍ​ບັນຫາ​ຈາກ​ປະຊາຊົນ ຜ່ານ​ໂທລະສັບ​ສາຍ​ດ່ວນ ເຊິ່ງ​ໄດ້​ສະແດງ​ຄວາມ​ເປັນ​ຫ່ວງເປັນ​ໃຍ​ຕໍ່​ບັນຫາ​ຕ່າງໆ​ຂອງ​ຊີວິດສັງຄົມ ຜົນສຳເລັດ​ຂອງ​ກອງ​ປະຊຸມ​ຄັ້ງ​ນີ້ ​ຍັງ​ແມ່ນ​ການ​ປະກອບສ່ວນ​ຢ່າງ​ຕັ້ງໜ້າ ​ຂອງ​ບັນດາ​ອົງການຈັດຕັ້ງ​ຂອງ​ພັກ-ລັດ ອົງການ​ແນວ​ລາວ​ສ້າງ​ຊາດ ອົງການຈັດຕັ້ງ​ມະຫາຊົນ ພະນັກງານ-ລັດຖະກອນ ສະມາຊິກ​ພັກ ເຈົ້າ​ໜ້າທີ່​ປ້ອງ​ກັນ​ຊາດ-ປ້ອງກັນ​ຄວາມ​ສະຫງົບ ສື່​ມວນ​ຊົນ ແລະ ບັນດາ​ຊັ້ນ​ຄົນ​ຕ່າງໆ​ທົ່ວປະເທດ ເຖິງ​ວ່າ​ກອງ​ປະຊຸມ​ຄັ້ງນີ້​ ຈະ​ໄດ້​ຮັບ​ຜົນສຳເລັດ​ຢ່າງ​ຈົບງາມ​ກໍ່​ຕາມ ແຕ່​ກໍ່​ເປັນ​ພຽງ​ຜົນສຳເລັດ​ເບື້ອງ​ຕົ້ນ ເພື່ອ​ເປັນ​ພື້ນຖານ​ໃຫ້​ແກ່​ການເຄື່ອນໄຫວ ແລະ ຈັດ​ຕັ້ງ​ປະຕິບັດ​ໜ້າທີ່​ການເມືອງ ​ຕະຫຼອດ​ອາຍຸ​ການ​ຂອງ​ສະພາ​ແຫ່ງ​ຊາດ ຊຸດ​ທີ VIII ສະພາແຫ່ງ​ຊາດ ຊຸດ​ທີ VIII ຍັງ​ຈະ​ຕ້ອງໄດ້​ສືບຕໍ່​ບຸກ​ທະລຸ​ທາງ​ດ້ານ​ຈິນ​ຕະນາ​ການ ກໍ່​ຄືລະບຽບ​ການ ແບບແຜນ​ວິທີ​ເຮັດ​ວຽກ​ໃຫ້​ໄປ​ສູ່​ຄຸ​ນະພາບ​ໃໝ່ ແລະ ​ສສຊ ທຸກ​ທ່ານ ຈະ​ຕ້ອງ​ໄດ້​ສຸມ​ທຸກ​ສະຕິ​ປັນຍາ ຄວາມ​ຮູ້​ຄວາມ​ສາມາດ ແລະ ຄວາມ​ພະຍາຍາມ​ສູງ ເພື່ອ​ເຮັດຫຼ້ອນ​ໜ້າທີ່​ການເມືອງ​ອັນ​ມີ​ກຽດສະຫງ່າ​ ທີ່​ປະຊາຊົນ​ໄດ້​ມອບໝາຍ​ໃຫ້.

  ພາຍຫຼັງ​ສຳເລັດ​ກອງ​ປະຊຸມຄັ້ງ​ນີ້ ຂ້າພະເຈົ້າ​ສະເໜີ​ໃຫ້​ລັດຖະ​ບານ ຄະນະ​ປະຈຳ​ສະພາ​ແຫ່ງຊາດ ບັນດາ​ກຳມາ​ທິ​ການ ຄະນະເລຂາທິການ​ສະພາ​ແຫ່ງ​ຊາດ ແລະ ​ສສຊ ທີ່​ປະຈຳ​ຢູ່​ເຂດ​ເລືອກຕັ້ງ​ຕ່າງໆ ຈົ່ງ​ຮີບ​ຮ້ອນ​ຈັດ​ຕັ້ງ​ຜັນຂະຫຍາຍ​ເນື້ອ​ໃນ​ຈິດໃຈ ​ທີ່​ຕົກລົງໃນ​ກອງ​ປະຊຸມ​ຄັ້ງ​ນີ້​ໃຫ້​ແທດ​ເຖິງ ໂດຍ​ມີ​ການ​ສົມທົບ​ແໜ້ນ​ກັບ​ບັນດາ​ຂະແໜງການ ແລະ ອົງການປົກຄອງ​ທ້ອງຖິ່ນ ພ້ອມ​ທັງ​ປຸກ​ລະດົມ​ປະຊາຊົນ​ບັນດາເຜົ່າ​ທຸກ​ຊັ້ນຄົນ ແລະ ທຸກ​ພາກສ່ວນ​ເສດ​ຖະກິດ ເຂົ້າ​ຮ່ວມ​ຈັດ​ຕັ້ງ​ປະຕິບັດ​ໃຫ້ໄດ້​ຮັບ​ຜົນ​ດີ ຮີບ​ຮ້ອນ​ປັບປຸງ​ກົງຈັກ​ການຈັດຕັ້ງບຸກ​ຄະລາ​ກອນ ໃຫ້​ແທດເໝາະ​ກັບ​ພາລະ​ບົດບາດ ແລະ ສິດ​ໜ້າທີ່​ຂອງ​ຕົນ ເພື່ອ​ຮັບປະກັນ​ການເຄື່ອນໄຫວວຽກ​ງານ​ມີ​ປະ​ສິດທິ​ຜົນ.

ຄົ້ນຫາ

ປະຕິທິນ

August 2020
S M T W T F S
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 82

ຈຳນວນຜູ້ເຂົ້າຊົມວານນີ້ 81

ຈຳນວນຜູ້ເຂົ້າຊົມອາທິດນີ້ 333

ຈຳນວນຜູ້ເຂົ້າຊົມເດືອນນີ້ 1019

ຈຳນວນຜູ້ເຂົ້າຊົມທັງໝົດ 69151

Currently are 17 guests and no members online