Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

        ທ່ານ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່ ປະ­ທານ​ປະ­ເທດ ລົງ​ພົບ​ປະ ແລະ ໂອ້​ລົມ​ພະ­ນັກ­ງານ​ຫຼັກ​ແຫຼ່ງ-ນຳ­ພາ​ຢູ່​ຫ້ອງ​ວ່າ­ການ​ປົກ­ຄອງ ນະ­ຄອນ­ຫຼວງ​ວຽງ​ຈັນ (ນວ) ວັນ​ທີ 19 ກຸມ­ພາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ສິນ​ລະ​ວົງ ຄຸດ​ໄພ­ທູນ ກຳ­ມະ­ການ​ກົມ​ການ­ເມືອງ​ສູນ​ກາງ​ພັກ ເລ­ຂາ​ຄະ­ນະ​ພັກ ເຈົ້າ​ຄອງ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ.

       ທ່ານ ສິນ​ລະ​ວົງ ຄຸດ​ໄພ­ທູນ ກ່າວ​ວ່າ: ປີ 2018 ນວ ໄດ້​ນຳ­ພາ​ຈັດ​ຕັ້ງ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ X ຄົບ​ຖ້ວນ​ທຸກ​ເປົ້າ​ໝາຍ ປະ­ຕິ­ບັດ​ຄຳ​ສັ່ງ ບົດ​ແນະ­ນຳ​ຕ່າງໆ​ຂອງ​ສູນ​ກາງ​ພັກ ກົມ​ການ­ເມືອງ​ສູນ​ກາງ​ພັກ ຄະ­ນະ​ເລ­ຂາ­ທິ­ການ​ສູນ​ກາງ​ພັກ​ຢ່າງ​ທົ່ວ​ເຖິງ ສືບ­ຕໍ່​ປະ­ຕິ­ບັດ​ນະ­ໂຍ­ບາຍ​ສາມ​ສ້າງ​ຂອງ​ພັກ​ເຂົ້າ​ສູ່​ລວງ​ເລິກ ໂດຍ​ໄດ້​ອອກ​ມະ­ຕິ​ຕົກ­ລົງ​ຂອງ​ຄະ­ນະ​ປະ­ຈຳ​ພັກ ຂໍ້​ຕົກ­ລົງ​ເຈົ້າ​ຄອງ ແລະ ຄຳ​ແນະ­ນຳ​ເພີ່ມ​ເຕີມ​ຈຳ­ນວນ​ໜຶ່ງ ປັດ­ຈຸ­ບັນ​ທົ່ວ ນວ ໄດ້​ປັບ­ປຸງ​ກົງ­ຈັກ​ການ­ຈັດ­ຕັ້ງ​ບ້ານ​ຕາມ 5 ໜ່ວຍ​ງານ​ແລ້ວ 452 ບ້ານ ຍັງ 29 ບ້ານ ໄດ້​ຈັດ​ຕັ້ງ​ຜັນ​ຂະ­ຫຍາຍ​ຄຳ​ສັ່ງ ເລກ​ທີ 04 ຂອງ​ຄະ­ນະ​ເລ­ຂາ­ທິ­ການ​ສູນ​ກາງ​ພັກ ແລະ ຄຳ​ແນະ­ນຳ​ຂອງ​ຄະ­ນະ​ຈັດ​ຕັ້ງ​ສູນ​ກາງ​ພັກ ສະ­ບັບ​ເລກ​ທີ 784 ວ່າ​ດ້ວຍ​ການ​ກະ­ກຽມ​ດຳ­ເນີນ​ກອງ​ປະ­ຊຸມ​ໃຫຍ່ ອົງ­ຄະ​ນະ​ພັກ​ກະ­ຊວງ-ອົງ­ການ ແຂວງ-ນະ­ຄອນ­ຫຼວງ ອົງ­ຄະ​ນະ​ພັກ​ເມືອງ-ນະ­ຄອນ ແລະ ຮາກ​ຖານ​ພັກ​ໃນ​ທົ່ວ​ປະ­ເທດ.

       ສຳ­ລັບ​ແຜນ​ວຽກ​ຈຸດ​ສຸມ​ປີ 2019 ຈະ​ສືບ­ຕໍ່​ຈັດ​ຕັ້ງ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່ ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ຄັ້ງ​ທີ 7 ສະ­ໄໝ​ທີ X ໃຫ້​ລົງ​ຮອດ​ຮາກ​ຖານ​ທຸກ​ເປົ້າ​ໝາຍ ກະ­ກຽມ​ການ​ດຳ­ເນີນ​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ພັກ ຕາມ​ແຜນ​ວຽກ​ທີ່​ໄດ້​ກຳ­ນົດ​ໄວ້ ເປັນ­ຕົ້ນ ດ້ານ​ເນື້ອ​ໃນ ແລະ ການ​ເລືອກ­ເຟັ້ນ​ບຸ​ຄະ­ລາ​ກອນ ທີ່​ຈະ​ປະ­ກອບ​ໃນ​ຄະ­ນະ​ບໍ­ລິ­ຫານ​ງານ​ພັກ​ແຕ່​ລະ​ຂັ້ນ ສືບ­ຕໍ່​ຊຸກ­ຍູ້​ການ​ເຕີບ​ໂຕ​ຂອງ​ເສດ­ຖະ­ກິດ ຍົກ​ລະ­ດັບ​ລາຍ​ຮັບ​ໃຫ້​ໄດ້​ດີ GDP ເຕີບ​ໂຕ 9,3% ບັນ­ຫາ​ສຳ­ຄັນ​ຈະ​ສຸມ​ໃສ່​ການ​ເພີ່ມ​ລາຍ​ຮັບ ຍົກ​ສູງ​ຖາ­ນະ​ການ​ເງິນ ປະ­ຕິ­ບັດ​ຄາດ­ໝາຍ​ການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ທັງ​ພູດ​ສູນ​ກາງ ແລະ ທ້ອງ­ຖິ່ນ​ໃຫ້​ບັນ­ລຸ 4.800 ຕື້​ກີບ ແຕ່​ລະ​ຫົວ­ໜ່ວຍ​ວິ​ສາ​ຫະ​ກິດ ຄອບ­ຄົວ ຕ້ອງ​ຫັນ​ເຂົ້າ​ສູ່​ການ​ຜະ­ລິດ ບໍ­ລິ­ການ ເຮັດ​ໃຫ້​ລາຍ​ຮັບ​ຂອງ​ຕົນ​ເພີ່ມ​ຂຶ້ນ ປະ­ກອບ­ສ່ວນ​ຈັດ​ຕັ້ງ​ປະ­ຕິ­ບັດ​ມະ­ຕິ 7 ຂອງ​ສູນ​ກາງ​ພັກ ກ່ຽວ​ກັບ​ການ​ແກ້​ໄຂ​ຄວາມ​ຫຍຸ້ງ­ຍາກ​ດ້ານ​ເສດ­ຖະ­ກິດ-ການ​ເງິນ ເລັ່ງ​ແກ້​ໄຂ​ໜີ້​ສາ­ທາ­ລະ­ນະ ແລະ ໜີ້​ໂຄງ­ການ​ລົງ­ທຶນ​ຂອງ​ເອ­ກະ​ຊົນ​ໃຫ້​ຫຼຸດ​ລົງ ຍົກ​ສູງ​ຄຸນ​ນະ​ພາບ​ການ​ບໍ­ລິ­ຫານ​ຄຸ້ມ​ຄອງ​ລັດ ຄຸ້ມ​ຄອງ​ເສດ­ຖະ­ກິດ​ດ້ວຍ​ກົດ­ໝາຍ ສຳ​ຫຼວດ​ຫົວ­ໜ່ວຍ​ເສດ­ຖະ­ກິດ ຫັນ​ລົງ​ສູ່​ຮາກ​ຖານ ປະ­ຊາ­ຊົນ ແລະ ຫົວ­ໜ່ວຍ​ວິ​ສາ​ຫະ​ກິດ ປຸກ­ລະ­ດົມ​ຫົວ­ໜ່ວຍ SMEs ຜະ­ລິດ​ສິນ­ຄ້າ​ໃຫ້​ແຂງ­ແຮງ ມີ​ຫຍີ່​ຫໍ້ ມີ​ມາດ­ຕະ­ຖານ ແລະ ສາ­ມາດ​ແຂ່ງ­ຂັນ​ໄດ້ ໂດຍ​ເລັ່ງ​ໃສ່ 10 ໂຄງ­ການ​ຜະ­ລິດ​ສິນ­ຄ້າ​ປາຍ​ແຫຼມ​ຂອງ ນວ ປະ­ຕິ­ບັດ​ແຜນ​ຟື້ນ​ຟູ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ໃຫ້​ດີ ເຮັດ​ໃຫ້​ຜົນ​ກະ­ທົບ​ໄດ້​ຮັບ​ການ​ແກ້​ໄຂ​ໂດຍ​ໄວ ແລະ ບໍ່​ສົ່ງ​ຜົນ​ກະ­ທົບ​ໄລ­ຍະ​ຍາວ​ຕໍ່​ສະ­ຖຽນ​ລະ​ພາບ​ຂອງ​ເສດ­ຖະ­ກິດ ແລະ ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ສືບ­ຕໍ່​ເອົາ­ໃຈ­ໃສ່​ວຽກ​ງານ​ອື່ນໆ​ໃຫ້​ດີ​ຂຶ້ນ​ເປັນ​ກ້າວໆ.

      ທ່ານ​ປະ­ທານ​ປະ­ເທດ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ງານ​ທີ່​ຄະ­ນະ​ພັກ ຄະ­ນະ​ນຳ ນວ ຍາດ​ມາ​ໄດ້​ໃນ​ໄລ­ຍະ​ຜ່ານ​ມາ ພ້ອມ​ທັງ​ໄດ້​ແລກ­ປ່ຽນ​ຄຳ​ຄິດ​ເຫັນ​ບາງ​ບັນ­ຫາ​ທີ່​ຄວນ​ເອົາ­ໃຈ­ໃສ່​ຊີ້​ນຳ-ນຳ­ພາ ແລະ ຈັດ​ຕັ້ງ​ປະ­ຕິ­ບັດ​ໃຫ້​ດີ​ຂຶ້ນ ເປັນ­ຕົ້ນ ການ​ພັດ­ທະ­ນາ ນວ ໃຫ້​ສືບ­ຕໍ່​ເສີມ​ຂະ­ຫຍາຍ​ມູນ­ເຊື້ອ​ອັນ​ດີ­ງາມ​ຂອງ​ຊາວ ນວ ແລະ ພັດ­ທະ­ນາ ນວ ໃຫ້​ແທດ­ເໝາະ​ກັບ​ສະ­ພາບ​ຈຸດ​ພິ­ເສດ ຕັ້ງ­ໜ້າ ຂຸດ​ຄົ້ນ​ກຳ­ລັງ​ແຮງ​ບົ່ມ​ຊ້ອນ​ເພື່ອ​ສ້າງ​ພື້ນ­ຖານ​ອັນ​ເຂັ້ມ­ແຂງ ເຮັດ​ໃຫ້ ນວ ມີ​ທ່ວງ​ທ່າ​ການ​ພັດ­ທະ­ນາ​ທີ່​ໝັ້ນ­ຄົງ​ຍາວ​ນານ ເຮັດ​ໃຫ້​ປະ­ຊາ­ຊົນ​ສາ­ມາດ​ອີງ­ໃສ່​ຊັບ­ພະ­ຍາ­ກອນ​ອັນ​ຮັ່ງ­ມີ​ຂອງ​ຊາດ ເພື່ອ​ຊຸກ­ຍູ້​ການ​ສ້າງ­ສາ​ພັດ­ທະ­ນາ​ເສດ­ຖະ­ກິດ ຍົກ​ລະ­ດັບ​ຊີ­ວິດ​ການ​ເປັນ​ຢູ່​ໃຫ້​ສູງ​ຂຶ້ນ​ຢ່າງ​ບໍ່​ຢຸດ​ຢັ້ງ ສູ້​ຊົນ​ບຸກ​ບືນ​ແກ້​ໄຂ​ຄວາມ­ທຸກ​ຍາກ-ຫຼ້າ­ຫຼັງ ເຮັດ​ໃຫ້ ນວ ກາຍ­ເປັນ 6 ສ ຢ່າງ​ແທ້​ຈິງ ຕັ້ງ­ໜ້າ​ແກ້​ໄຂ​ບັນ­ດາ​ປາ­ກົດ­ການ​ຫຍໍ້­ທໍ້​ທີ່​ເກີດ​ຂຶ້ນ ໂດຍ​ສະ­ເພາະ ຢາ​ເສບ​ຕິດ ອຸ­ບັດ­ເຫດ ການ​ຈໍ​ລະ​ຈອນ​ແອ​ອັດ ປຸ້ນ​ຈີ້-ຊີງ​ຊັບ ແລະ ອື່ນໆ ໃຫ້​ມີ​ຄວາມ​ສະ­ຫງົບ ກ້າວ​ໄປ​ເຖິງ​ແກ້​ໄຂ​ຢ່າງ​ເດັດ­ຂາດ ສ່ວນ​ວິ­ໄສ​ທັດ​ໃນ​ການ​ພັດ­ທະ­ນາ ນວ ໄລ­ຍະ​ຮອດ​ປີ 2030 ຍຸດ​ທະ​ສາດ​ຮອດ​ປີ 2025 ແລະ ຄາດ­ໝາຍ​ໃຫຍ່ ໂຄງ­ການ​ໃຫຍ່​ທີ່​ອົງ­ຄະ​ນະ​ພັກ ນວ ວາງ​ອອກ ແມ່ນ​ແທດ­ເໝາະ​ກັບ​ຕົວ​ຈິງ ແລະ ຖື​ເປັນ​ຈຸດ​ບຸກ​ທະ­ລຸ​ໜຶ່ງ ແຕ່​ບົນ​ຈິດ­ໃຈ​ດັ່ງ­ກ່າວ ກໍ​ໃຫ້​ຖື​ເອົາ​ການ​ບຸກ​ທະ­ລຸ​ດ້ານ​ຈິນ­ຕະ­ນາ­ການ ເພື່ອ​ຍົກ​ສູງ​ຄຸນ​ນະ​ພາບ​ຂອງ​ວຽກ​ງານ​ແນວ​ຄິດ-ການ­ເມືອງ​ໃນ​ໄລ­ຍະ​ໃໝ່​ໃຫ້​ໜັກ​ແໜ້ນ​ກວ່າ​ເກົ່າ ແລະ ສອດ​ຫ້ອຍ​ໄປ​ທຸກ​ວຽກ​ງານ ສ້າງ​ຄວາມ​ເປັນ​ເອ­ກະ​ພາບ-ຄວາມ​ເຂົ້າ­ໃຈ​ຕໍ່​ທຸກ​ພາກ­ສ່ວນ​ຂອງ​ສັງ­ຄົມ ໃຫ້​ສັງ­ຄົມ​ປະ­ກອບ­ສ່ວນ​ເປັນ​ກຳ­ລັງ​ແຮງ​ອັນ​ແຂງ​ແກ່ນ​ໃນ​ການ​ພັດ­ທະ­ນາ ນວ ໃຫ້​ເຕີບ​ໃຫຍ່ ເຂັ້ມ­ແຂງ ຮຸ່ງ­ເຮືອງ ສີ­ວິ­ໄລ ແລະ ສະ­ຫງົບ-ໜ້າ​ຢູ່.

ທີ່ມາຂໍ້ມູນ: ໜັງສືພິມວຽງຈັນໃໝ່

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 45

ຈຳນວນຜູ້ເຂົ້າຊົມວານນີ້ 59

ຈຳນວນຜູ້ເຂົ້າຊົມອາທິດນີ້ 238

ຈຳນວນຜູ້ເຂົ້າຊົມເດືອນນີ້ 1069

ຈຳນວນຜູ້ເຂົ້າຊົມທັງໝົດ 44919

Currently are 138 guests and no members online

ແຜນທີ່ນະຄອນຫຼວງວຽງຈັນ