Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

14494611 329264730755393 8427894674667326209 n

ປະຊາຊົນ​ທີ່​ໄດ້​ຮັບ​ຜົນ​ກະທົບຈາກ​ໂຄງການ​ຄູ​ປ້ອງ​ກັນ​ນ້ຳ​ຖ້ວມ ນະຄອນຫຼວງ​ວຽງ​ຈັນ (ນວ) ພາຍ​ໃຕ້​ໂຄງການ​ຄຸ້ມ​ຄອງ ແລະ ຫຼຸດຜ່ອນ​ຄວາມ​ສ່ຽງ​ຈາກ​ໄພ​ນ້ຳຖ້ວມ ແລະ ແຫ້ງແລ້ງ (​ຄຖລ) ເມືອງ​ຫາດ​ຊາຍ​ຟອງ ນວ ຈຳນວນ 197 ຄອບຄົວ ໃນ 15 ບ້ານ ໄດ້​ມີ​ຄວາມ​ເປັນ​ເອກະ​ພາບ ແລະ ຮັບ​ເອົາ​ຄ່າ​ຊົດ​ເຊີຍ​ດ້ວຍ​ຄວາມ​ພໍໃຈ​ ເພື່ອ​ໃຫ້​ໂຄງການ​ດຳເນີນ​ການ ກໍ່ສ້າງ​ສຳເລັດ​ຕາມ​ຄາດໝາຍ ພ້ອມ​ທັງ​ເຊື່ອ​ໝັ້ນ​ວ່າ​ໂຄງການ​ນີ້ ຈະ​ຊ່ວຍ​ຍົກ​ລະດັບ​ການ​ຄຸ້ມ​ຄອງ ຄວາມ​ສ່ຽງ​ຈາກ​ນ້ຳ​ຖ້ວມ ແລະ ແຫ້ງແລ້ງ​ທີ່​ອາດ​ເກີດ​ຂຶ້ນ ກໍ່​ຄືຫຼຸດຜ່ອນ​ຜົນ​ເສຍ​ຫາຍ ແລະ ຈະຂະຫຍາຍ​ເນື້ອທີ່​ສະໜອງ​ນ້ຳ​ຊົນລະ​ປະທານ​ຕື່ມ​ອີກ ​ໃນ​ເຂດ ນວ ຕອນ​ໃຕ້​ໃຫ້​ຫຼາຍ​ຂຶ້ນ.

ພິທີ​ມອບ​ເງິນ​ຊົດ​ເຊີຍ​ດັ່ງກ່າວ ໄດ້​ຈັດ​ຂຶ້ນວັນ​ທີ 22 ກັນຍາ 2016 ຢູ່​ຫ້ອງ​ວ່າການ​ປົກຄອງເມືອງ​ຫາດ​ຊາຍ​ຟອງ ກ່າວ​ມອບໂດຍ​ທ່ານ ອານຸພາບ ຕຸ​ນາ​ລົມ ປະທານ​ສະພາ​ປະຊາຊົນ ນວ ປະທານ​ຄະນະ​ກຳມະການ​ຍົກຍ້າຍ​ສິ່ງ​ກີດຂວາງ​ຂັ້ນ​ສູນ​ກາງ ມີທ່ານ ບຸນ​ທາມ ພຸດ​ທະ​ວົງສາ ເຈົ້າເມືອງ​ຫາດ​ຊາຍ​ຟອງ ພ້ອມດ້ວຍ​ບັນດາ​ຄະນະ​ກຳມະການກ່ຽວຂ້ອງ ແລະ ປະຊາຊົນ​ຜູ້​ໄດ້ຮັບ​ຜົນ​ກະທົບ​ເຂົ້າ​ຮ່ວມ.

ທ່ານ ອານຸພາບ ຕຸ​ນາ​ລົມ ໄດ້​ກ່າວ​ວ່າ: ​ຄຖລ ເປັນ​ໂຄງການໜຶ່ງ​ຢູ່​ພາຍ​ໃຕ້​ຂອບ​ການ​ຮ່ວມມື​ອະນຸ​ພາກ​ພື້ນ​ແມ່ນ້ຳ​ຂອງ (GMS) ໂດຍ​ໄດ້​ຮັບ​ການ​ສະໜັບສະ​ໜູນ​ຈາກ​ທະນາຄານ​ພັດ​ທະນາ​ອາຊີ (ADB) 36,5 ລ້ານ​ໂດລາ​ສະຫະລັດ ຫຼື ປະມານ 292 ຕື້​ກີບ ໃນ​ນີ້ ເປັນ​ເງິນ​ກູ້​ຢືມ 24 ລ້ານ​ໂດ​ລາ ແລະ ເງິນ​ຊ່ວຍເຫຼືອລ້າ 12,5 ລ້ານ​ໂດ​ລາ ນອກ​ນີ້ ລັດຖະບານ​ລາວ​ໄດ້​ສົມທົບ 0,59 ລ້ານ​ໂດ​ລາ ໂຄງການ​ຄູ​ປ້ອງ​ກັນນ້ຳ​ຖ້ວມ​ມີ​ຄວາມ​ຍາວ 30,2 ກິໂລ​ແມັດ ລຽບ​ຕາມ​ນ້ຳຂອງ​ຕອນໃຕ້ ຈະ​ກໍ່ສ້າງ​ເປັນ​ຄູ​ປ້ອງ​ກັນ​ນ້ຳຖ້ວມ ແລະ ເສັ້ນທາງ​ສັນຈອນ ເຊິ່ງ​ແບ່ງ​ເປັນ 2 ໄລຍະຄື: ໄລຍະ​ທີ 1 ເປັນ​ຄັນ​ຄູ​ດິນ​ແດງ​ອັດແໜ້ນ ແຕ່​ສະຖານີ​ດາວ​ທຽມລາວ​ສະ​ຕາ-ຂົວ​ມິດຕະພາບ ລາວ-ໄທ 1 ຍາວ 4 ກິໂລແມັດ ສັນ​ຄູ​ກວ້າງ 4 ແມັດ ໄລຍະ​ທີ 2 ເລີ່ມ​ແຕ່​ຂົວ​ມິດຕະພາບ ລາວ-ໄທ 1-ປາກ​ຫ້ວຍ​ໝາກ​ຮຽວ ປູດ້ວຍ​ອັດ​ສະ​ຟານ​ຄອນ​ກຣີດ ໜ້າທາງ​ກວ້າງ 10 ແມັດ ຍາວ 26,2 ກິໂລແມັດ ນອກ​ນີ້ ຍັງ​ໄດ້​ປັບ​ຄູປ້ອງ​ກັນ​ນ້ຳ​ຖ້ວມ​ຮອບ​ນອກ ແຕ່ບ້ານ​ດົງ​ໂພ​ສີ-ທ່າ​ມ່ວງ ຍາວ 2 ກິໂລແມັດ ເປັນ​ຄູ​ດິນ​ແດງ​ອັດແໜ້ນ ເຊິ່ງ​ໂຄງການ​ດັ່ງກ່າວ ​ປັດຈຸ​ບັນ​ກຳລັງ​ໄກ່​ເກ່ຍ​ຄ່າ​ຊົດ​ເຊີຍ ໄປ​ຄຽງ​ຄູ່​ກັບ​ການ​ດຳເນີນ​ການກໍ່ສ້າງ ແລະ ຄາດ​ວ່າ​ຈະ​ໃຫ້​ສຳເລັດ​ພາຍ​ໃນ​ປີ 2019.

ສຳລັບ​ຜູ້​ທີ່​ໄດ້​ຮັບ​ຜົນ​ກະທົບຈາກ​ໂຄງການ​ດັ່ງກ່າວ​ມີ​ທັງ​ໝົດ 15 ບ້ານ 197 ຄອບຄົວ ໃນ​ນີ້ ປະກອບ​ມີ​ຜົນ​ກະທົບ​ຕໍ່​ເນື້ອທີ່​ດິນ ຕົ້ນໄມ້ ຮົ້ວ ເທີບ ເສົາ​ໄຟຟ້າ 33 ຕົ້ນ ຄອງ​ຊົນລະປະທານ 1,5 ກິ​ໂລແມັດ ແລະ ອື່ນໆ ລວມ​ມູນ​ຄ່າການ​ຊົດ​ເຊີຍ​ທັງ​ໝົດ 4.229.363.120 ກີບ.

ໂດຍ: ວຽງຈັນໃຫມ່.

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 27

ຈຳນວນຜູ້ເຂົ້າຊົມວານນີ້ 60

ຈຳນວນຜູ້ເຂົ້າຊົມອາທິດນີ້ 159

ຈຳນວນຜູ້ເຂົ້າຊົມເດືອນນີ້ 923

ຈຳນວນຜູ້ເຂົ້າຊົມທັງໝົດ 27722

Currently are 39 guests and no members online

ແຜນທີ່ນະຄອນຫຼວງວຽງຈັນ