Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

14212551 319417098406823 8391850063838507738 n

ສປປ ລາວ ໄດ້​ຮັບ​ກຽດ​ເປັນປະທານ​ອາ​ຊຽນ ແລະ ເປັນ​ເຈົ້າພາບ​ຈັດ​ກອງ​ປະຊຸມ​ສຸດ​ຍອດອາຊຽນ ຄັ້ງ​ທີ 28-29 ພ້ອມ​ກັບ​ບັນດາ​ກອງ​ປະຊຸມ​ປິ່ນ​ອ້ອມ ໃນ​ປີ 2016 ເຊິ່ງ​ກອງ​ປະຊຸມ​ທີ່​ມີ​ຄວາມໝາຍ​ຄວາມ​ສຳຄັນ​ນີ້ ຖື​ເປັນ​ເວທີ​ແຫ່ງ​ການ​ແລກປ່ຽນ ແລະ ເຊື່ອມ​ໂຍງ 10 ປະເທດ​ສະມາຊິກອາ​ຊຽນ​ດ້ວຍ​ກັນ ໃຫ້​ມີ​ຄວາມ​ໃກ້ຊິດ​ທາງ​ດ້ານ​ການເມືອງ-ຄວາມໝັ້ນຄົງ ເສດຖະກິດ ວັດທະນະທຳ-ສັງຄົມ ຄຽງ​ຄູ່​ກັບ​ການ​ເສີມສ້າງ​ສາຍ​ພົວພັນ​ຮ່ວມ​ມື​ກັບ ​ບັນດາ​ປະເທດ​ມະຫາ​ອຳນາດ ແລະ ຄູ່​ຮ່ວມ​ເຈລະຈາ ເພື່ອ​ນຳ​ມາ​ຜົນປະໂຫຍດ​ສູງ​ສຸດ​ ໃນ​ການ​ພັດ​ທະນາ​ທີ່​ເຂັ້ມແຂງ-ຍືນ​ຍົງ​ຂອງ​ພາກພື້ນ ແລະ ສາກົນ.

ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 28-29 ໄຂ​ຂຶ້ນ​ຢ່າງ​ເປັນທາງ​ການ ໃນ​ວັນ​ທີ 6 ກັນຍາ 2016 ທີ່​ຫໍ​ປະຊຸມ​ແຫ່ງ​ຊາດ ນະຄອນ​ຫຼວງ​ວຽງ​ຈັນ ໂດຍ​ການເປັນ​ປະທານ​ຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ​ແຫ່ງ ​ສປປ ລາວ ໃຫ້​ກຽດ​ເຂົ້າ​ຮ່ວມ​ມີທ່ານ ບຸນ​ຍັງ ວໍລະ​ຈິດ ປະທານປະເທດ ພ້ອມ​ດ້ວຍ​ບັນດາ​ປະມຸກລັດ ຫົວໜ້າ​ລັດຖະບານ​ບັນດາປະເທດ​ສະມາຊິກ​ອາ​ຊຽນ ເລຂາທິ​ການ​ໃຫຍ່​ອາ​ຊຽນ ຜູ້ຕາງໜ້າປະເທດ​ຄູ່​ຮ່ວມ​ເຈລະຈາ ອົງການຈັດ​ຕັ້ງ​ສາກົນ ແລະ ແຂກ​ຖືກເຊີນທັງ​ພາຍ​ໃນ-ຕ່າງປະເທດ ເຊິ່ງ​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 28-29 ຜູ້ນຳ​ບັນດາ​ປະເທດ​ສະມາຊິກ ໄດ້​ປຶກສາ​ຫາລື ແລະ ໃຫ້​ທິດ​ຊີ້​ນຳ​ໃນ​ການ​ຜັນ​ຂະຫຍາຍ​ວິໄສ​ທັດ​ປະຊາ​ຄົມ​ອາ​ຊຽນ 2025 ແລະ ພິຈາລະນາ​ຮັບຮອງ​ເອົາ​ບັນດາ​ຂອບ​ວຽກ​ຂອງຖະແຫຼງການ​ຕ່າງໆ ເພື່ອ​ແລກປ່ຽນ​ຄວາມ​ຄິດ​ເຫັນ​ກ່ຽວ​ກັບ​ບັນຫາ​ພາກ​ພື້ນ-ສາກົນ ທີ່​ມີ​ຄວາມສົນໃຈ ແລະ ເປັນ​ຫ່ວງຮ່ວມ​ກັນ ແນໃສ່​ຜັນ​ຂະຫຍາຍ​ຄຳ​ຂວັນ​ທີ່ວ່າ “ຫັນ​ວິໄສ​ທັດ​ໃຫ້​ເປັນ​ຮູບ​ປະທຳ ເພື່ອ​ຄວາມ​ເຂັ້ມແຂງ​ຂອງປະຊາ​ຄົມ​ອາ​ຊຽນ” ເຊິ່ງ​ໃນ​ການເປັນ​ປະທານ​ອາ​ຊຽນ​ຂອງ ​ສປປ ລາວ ໃນ​ປີ 2016 ໄດ້​ກຳນົດ 8 ບຸລິມະສິດ​ທີ່​ກວມ​ເອົາ 3 ເສົາຄ້ຳຂອງ​ປະຊາ​ຄົມ​ອາ​ຊຽນ ແລະ ພ້ອມ​ກັນ​ຜັນ​ຂະຫຍາຍ​ຄຳ​ຂວັນດັ່ງກ່າວ​ ໃຫ້​ປະສົບ​ຜົນສຳເລັດຕາມ​ເປົ້າ​ໝາຍ​ວາງ​ໄວ້.

ໂອກ​ກາດ​ດັ່ງກ່າວ ທ່ານ ບຸນ​ຍັງ ວໍລະ​ຈິດ ໄດ້​ຂຶ້ນ​ກ່າວ​ສູນທອນ​ພົດ​ຕໍ່​ກອງ​ປະຊຸມ ເຊິ່ງ​ມີບາງ​ຕອນ​ສຳ​ຄັນວ່າ: ອາ​ຊຽນ​ໄດ້ກາຍເປັນ​ຕະຫຼາດ ແລະ ຖານການ​ຜະລິດ​ດຽວ​ທີ່​ມີ​ຍອດ​ຜະລິດຕະ​ພັນ​ພາຍ​ໃນ 2,43 ພັນ​ຕື້​ໂດລາ​ສະຫະລັດ ໃນ​ປີ 2015 ເປັນເສດຖະກິດ​ທີ່​ໃຫຍ່​ອັນ​ດັບ 6 ຂອງໂລກ ຄາດ​ວ່າ​ຕໍ່ໜ້າ​ເສດຖະກິດຂອງ​ອາ​ຊຽນ ຈະ​ເຕີບ​ໂຕ​ໃນ​ຈັງຫວະ ປະມານ 7% ຕໍ່​ປີອາ​ຊຽນ ເປັນ​ພາກສ່ວນ​ທີ່​ສຳຄັນ ແລະ ທັງ​ເປັນ​ແກນ​ກາງຂອງ​ໂຄງ​ສ້າງພາກ​ພື້ນ ເປັນ​ອົງ​ການຈັດຕັ້ງພາກ​ພື້ນ ລະຫວ່າງລັດຖະບານ ທີ່​ມີ​ລັກສະນະ​ສະເພາະ ໂດຍ​ມີ 10 ປະເທດ​ສະມາຊິກ​ທີ່​ມີ​ລະບອບການເມືອງ​ທີ່​ແຕກ​ຕ່າງ​ກັນ ວັດທະນະທຳ ແລະ ພາສາ​ທີ່​ແຕກ​ຕ່າງ ແຕ່ອາ​ຊຽນ​ກໍ່​ຢູ່​ຮ່ວມ​ກັນ​ໄດ້​ຢ່າງ​ສັນຕິ ແລະ ມີ​ຄວາມ​ກົມກຽວ ຮ່ວມມື​ກັນ​ພາຍ​ໃຕ້​ປະຊາ​ຄົມ​ອາ​ຊຽນ ທີ່​ມີ​ເອກະລັກ​ໜຶ່ງ​ດຽວ ແລະ ວິໄສ​ທັດ​ໜຶ່ງ​ດຽວ ສຳລັບ ​ສປປ ລາວ ໄດ້​ຕີ​ລາຄາ​ສູງ​ຕໍ່​ຜົນ​ສຳເລັດ​ທີ່​ອາ​ຊຽນ​ຍາດ​ມາ​ໄດ້​ໃນ​ໄລຍະ​ຜ່ານ​ມາ ແລະ ມີ​ຄວາມ​ພູມໃຈ​ເປັນ​ຢ່າງ​ຍິ່ງ​ທີ່​ໄດ້​ເປັນ​ສະ​ມາຊິກ​ອາ​ຊຽນ​ແຕ່​ປີ 1997 ຜ່ານ​ມາ ​ສປປ ລາວ ໄດ້​ປະກອບສ່ວນເຄື່ອນ​ໄຫວ​ຢ່າງ​ຕັ້ງໜ້າ ​ໃນ​ຂອບການ​ຮ່ວມ​ມື​ພາຍ​ໃນ​ອາ​ຊຽນ ແລະ ອາ​ຊຽນ​ກັບ​ພາຍ​ນອກ ກໍ່​ຄືຂອບ​ການ​ຮ່ວມ​ມື​ອະນຸ​ພາກ​ພື້ນ​ທີ່ກ່ຽວຂ້ອງ​ກັບ​ອາ​ຊຽນ ເຊິ່ງ​ເປັນທ່າແຮງ​ໜຶ່ງ​ທີ່​ສຳຄັນ ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະ​ກິດ-ສັງຄົມ​ຂອງ ​ສປປ ລາວ.

ໃນ​ພິທີ​ເປີດ​ກອງ​ປະຊຸມ​ສຸດຍອດ​ອາ​ຊຽນ ຄັ້ງ​ທີ 28-29 ນີ້ ບັນດາ​ຜູ້ນຳ​ອາ​ຊຽນ ທັງ 10 ປະເທດ ຍັງ​ໄດ້​ຮ່ວມ​ພິທີ​ເປີດ​ກາໝາຍ​ວັນ​ສ້າງຕັ້ງ ຄົບຮອບ 50 ປີຂອງ​ອາ​ຊຽນ​ຕື່ມ​ອີກ.

ສຳລັບວັນ​ທີ 6 ກັນຍາ ນອກຈາກ​ພິທີ​ເປີດ​ກອງ​ປະຊຸມ​ສຸດ​ຍອດອາ​ຊຽນ ຄັ້ງ​ທີ 28-29 ແລ້ວ ຢູ່ທີ່​ຫໍ​ປະຊຸມ​ແຫ່ງ​ຊາດ ຍັງ​ໄດ້​ດຳເນີນ​ກອງ​ປະຊຸມ​ສຸດ​ຍອດ ແລະ ກອງ​ປະຊຸມ​ກ່ຽວຂ້ອງ​ຕ່າງໆ ປະກອບ​ມີ ກອງ​ປະຊຸມ​ສະພາ​ປະຊາຄົມ​ການເມືອງ-ຄວາມ​ໝັ້ນຄົງອາ​ຊຽນ ຄັ້ງ​ທີ 14 ກອງ​ປະຊຸມສະພາປະສານ​ງານ​ອາ​ຊຽນ ຄັ້ງທີ 18 ກອງ​ປະຊຸມ​ສຸດ​ຍອດ​ອາຊຽນ ຄັ້ງ​ທີ 28 (ຄົບ​ຄະນະ) ການ​ພົບ​ປະ​ຜູ້ນຳ​ອາ​ຊຽນ ​ກັບ​ບັນດາ​ຜູ້ຕາງໜ້າ​ຈາກ​ສະມັດຊາ​ລັດຖະ​ສະພາ​ລະຫວ່າງ​ຊາດ​ອາ​ຊຽນ ການ​ພົບ​ປະລະຫວ່າງຜູ້ນຳ​ອາຊຽນ ​ກັບ​ຜູ້ຕາງໜ້າ​ຊາວ​ໜຸ່ມ​ອາຊຽນ ການ​ພົບ​ປະ​ລະຫວ່າງ​ຜູ້ນຳອາ​ຊຽນ ​ກັບ​ສະພາ​ທີ່​ປຶກສາ​ທຸລະກິດ​ອາ​ຊຽນ ນອກ​ນັ້ນ ຍັງ​ມີ​ພິທີລົງ​ນາມ​ເຂົ້າ​ເປັນ​ພາຄີ​ຂອງ​ສົນທິ​ສັນຍາ​ໄມຕີ​ຈິດ ແລະ ການຮ່ວມ​ມື​ໃນ​ອາຊີ​ຕາເວັນ​ອອກສຽງໃຕ້​ຂອງ ຊີ​ເລ ເອ​ຢິບ ອີ​ຣານ ແລະ ມາ​ຣົກ ພິທີ​ລົງ​ນາມ​ຖະແຫຼງ​ການ​ອາ​ຊຽນ​ເປັນ​ໜຶ່ງ​ດຽວ ໃນ​ການ​ຕອບ​ໂຕ້​ໄພພິບັດອາຊຽນ​ເປັນ​ໜຶ່ງ​ດຽວ ​ໃນ​ການ​ຕອບໂຕ້​ໄພພິບັດໃນ​ພາກ​ພື້ນ ແລະ ນອກ​ພາກ​ພື້ນ ແລະ ພິທີ​ເປີດແຜນ​ແມ່​ບົດ​ເພື່ອ​ການ​ເຊື່ອມຈອດ​ອາ​ຊຽນ 2025 ແລະ ແຜນວຽກ​ຂໍ້​ລິ​ເລີ່ມ ເພື່ອ​ການ​ເຊື່ອມໂຍງ​ອາ​ຊຽນ​ໄລຍະ​ສາມ​ຕື່ມ​ອີກ.

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 50

ຈຳນວນຜູ້ເຂົ້າຊົມວານນີ້ 55

ຈຳນວນຜູ້ເຂົ້າຊົມອາທິດນີ້ 174

ຈຳນວນຜູ້ເຂົ້າຊົມເດືອນນີ້ 700

ຈຳນວນຜູ້ເຂົ້າຊົມທັງໝົດ 30202

Currently are 66 guests and no members online

ແຜນທີ່ນະຄອນຫຼວງວຽງຈັນ