Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

C977E834 57B6 4824 A422 5C7B85DCE28C

ຄະນະຜູ້ແທນຂັ້ນສູງ ຂອງນະຄອນຫຼວງວຽງຈັນ ສຳເລັດການເຄື່ອນໄຫວຢ້ຽມຢາມ ແລະ ເຮັດວຽກຢູ່ບັນດາແຂວງພາກໃຕ້ ຂອງ ສ.ສ ຫວຽດນາມ.
ໂດຍຕອບສະໜອງຕາມຄຳເຊີນຂອງ ສະຫາຍເລຂາຄະນະພັກນະຄອນໂຮ່ຈີມິນ, ແຂວງກຽນຢາງ (ຟູກັວກ), ແຂວງ ເລີ່ມດົງ (ດາຫລາດ), ແຂວງແຄງຮວາ (ຍ່າຈາງ), ແຂວງເບນແຈ ແລະ ນະຄອນເກີນເທີ ສ.ສ ຫວຽດນາມ ຄະນະຜູ້ແທນຂັ້ນສູງ ນວ ນຳໂດຍ ສະຫາຍ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ເລຂາຄະນະພັກ, ເຈົ້າຄອງນະຄອນ ຫຼວງວຽງຈັນ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ບັນດາແຂວງພາກໃຕ້ ສ.ສ ຫວຽດນາມ ລະຫວ່າງວັນທີ 11-20 ມິຖຸນາ 2019.

ຢູ່ນະຄອນໂຮ່ຈີມິນ ຄະນະຜູ້ແທນຂັ້ນສູງ ນວ ໄດ້ພົບປະກັບສະຫາຍ ຫງຽນ ທຽນ ເຍີນ ກຳມະການກົມການເມືອງສູນກາງພັກຄອມມູນິດຫວຽດນາມ, ເລຂາຄະນະພັກນະຄອນໂຮ່ຈີມິນ ເພື່ອທົບທວນຄືນຜົນການຮ່ວມມືຕາມບົດບັນທຶກທີ່ໄດ້ ລົງນາມລະ ຫວ່າງ 2 ຝ່າຍ ເມື່ອປີ 2017 ເປັນການຮຽນຮູ້ປະສົບການ ຂອງນະຄອນໂຮ່ຈີມິນ ແລະ ແຂວງອື່ນໆ ເພື່ອເປັນບົດຮຽນໃຫ້ການກະກຽມກອງປະຊຸມ ໃຫຍ່ 3 ຂັ້ນຂອງ ພັກ ແລະ ເພື່ອຮັດແໜ້ນຄວາມສາມັກຄີພິເສດ ໂດຍສະເພາະການຜັນຂະຫຍາຍຜົນການພົບປະຂອງ 2 ກົມການເມືອງ ກ່ຽວກັບການຊຸກຍູ້ການຜະລິດສິນຄ້າ, ການຮັບ-ສົ່ງສິນຄ້າ ຂອງສອງນະຄອນ, ແລະ ຄະນະຜູ້ແທນ ນວ ຍັງໄດ້ພົບປະກັບ ສະຫາຍ ເລ ແທງຫາຍ ອະດີດກຳມະການກົມການເມືອງພັກກອມມູນິດຫວຽດນາມ, ເລຂາຄະນະພັກ ນະຄອນໂຮ່ຈີມິນ ພ້ອມທັງໄດ້ຢ້ຽມຊົມຫ້ອງການປະຕູດຽວ ທັນສະໄໝຢູ່ ເມືອງ 1 (Q1) ແລະ ຊົມການສ້າງແຜນຜັງຄຸ້ມຄອງຕົວເມືອງ ດ້ວຍລະບົບ E-goverment ແລະ ການຫັນເປັນ Smart city ອີກດ້ວຍ.

ຄະນະຜູ້ແທນຂັ້ນສູງຂອງ ນວ ຍັງໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງ ກຽນຢາງ (ຟູກວັກ) ໄດ້ພົບປະກັບສະຫາຍ ຟາມ ວູ໋ ຮົງ ຮອງເລຂາຄະນະພັກ, ປະທານຄະນະກຳມະການປະຊາຊົນ ແຂວງກຽນຢາງ ເຊີ່ງເນື້ອໃນການພົບປະແມ່ນ ການຖອດຖອນບົດຮຽນດ້ານການບໍລິການ-ການທ່ອງທ່ຽວ ແລະ ຜະລິດເປັນສິນຄ້າ ໂດຍສະເພາະ ການຜະລິດນ້ຳປາທຳມະຊາດ ຈາກປາໄສ້ຕັນ ທີ່ມີລົດຊາດຫອມແຊບ ແລະ ເປັນເອກະລັກ ຂອງຟູກັວກ ພ້ອມທັງ ການລ້ຽງຫອຍມຸກ ທະເລ ເພື່ອນຳມາສຶກສາຄວາມເປັນໄປໄດ້ໃນການເພາະລ້ຽງຢູ່ໃນນ້ຳຈືດ ນອກນັ້ນ 2 ນະຄອນ ຢັງໄດ້ປຶກສາຄົ້ນຄ້ວາກ່ຽວກັບການເປີດກ້ວາງ ແລະ ສົ່ງເສີມການທ່ອງທ່ຽວ ເຊີ່ງຈະໄດ້ສະເໜີຫາການຈັດຕັ້ງຂັ້ນເທີງໃນການເປີດສາຍການບິນໂດຍກົງ ຈາກວຽງຈັນ ຫາ ເກາະຟູກັວກ ແລະ ຟູກັວກ - ວຽງຈັນ.

- ຢູ່ແຂວງເລີມດົງ, ນະຄອນດາຫລາດ ໄດ້ພົບປະກັບ ສະຫາຍ ຫງວຽນ ຊວນ ຕ໋ຽນ, ກຳມະການສູນກາງພັກ, ເລຂາພັກແຂວງ ເລີ່ມດົງ; ສະຫາຍ ຟ໋າມ ວັນ ມາຍ, ກຳມະການສູນກາງພັກ, ຮອງເລຂາພັກແຂວງ ຜູ້ປະຈຳການ ພ້ອມດ້ວຍຄະນະ ເຊີ່ງເນື້ອໃນສຳຄັນຂອງການພົບປະແມ່ນ ຖອດຖອນບົດຮຽນກ່ຽວກັບແຜນຜັງການນຳໃຊ້ທີ່ດິນ, ການສ້າງພື້ນຖານໂຄງລ່າງໃນພື້ນທີ່ເຂດພູພຽງ, ເຂດພູສູງ, ການຈັດສັນເຂດກະສິກຳ ແລະ ການສ້າງຕົວເມືອງສວຍງາມ ແລະ ການບໍລິ ການ-ທ່ອງທ່ຽວ, ຫຼັງຈາກນັ້ນ ຄະນະກໍໄດ້ຢ້ຽມຊົມເຂດພື້ນຖານເສດຖະກິດຟາມປູກດອກໄມ້ ຂະໜາດໃຫຍ່ທີ່ສຸດຂອງແຂວງ ແລະ ສວນປູກພືດຜັກດ້ວຍເຕັກນິກຂັ້ນສູງ.

- ຢູ່ແຂວງ ແຄງ ຮວາ, (ຍ່າຈາງ) ໄດ້ພົບປະກັບ ສະຫາຍ ຫງວຽນ ເຕີນ ຕວນ ຮອງເລຂາຄະນະພັກ (ຜູ້ປະຈຳການ), ປະທານຄະນະກຳມະການປະຊາຊົນ ແຂວງ ແຄງຮວາ ເຊີ່ງເນື້ອໃນຂອງການພົບປະແມ່ນ ການແລກປ່ຽນບົດຮຽນທາງດ້ານການພັດທະນາເສດຖະກິດ-ສັງຄົມ, ການຄຸ້ມຄອງຕົວເມືອງ ແລະ ການບໍລິການ-ການທ່ອງທ່ຽວ.

- ຢູ່ແຂວງ ເບນແຈ, ນະຄອນເບນແຈ ໄດ້ພົບປະກັບ ສະຫາຍ ຟານ ວັນ ໝາຍ ຮອງເລຂາຄະນະພັກ (ຜູ້ປະຈຳການ); ສະຫາຍ ຫງຽວນ ຫູ ເຫຼີບ ຮອງປະທານຄະນະກຳມະການປະຊາຊົນ ແຂວງ ເບນແຈ. ທັງສອງຝ່າຍໄດ້ພົບປະແລກປ່ຽນບົດຮຽນກ່ຽວກັບວຽກງານກະສິກຳ, ໂຄງການປູກໝາກພ້າວ ແລະ ປູກຕົ້ນໄມ້ກິນໝາກ ແລະ ອື່ນໆ, ເຊີ່ງຜ່ານການພົບປະ ທັງສອງຝ່າຍແມ່ນເຫັນດີເປັນເອກະພາບ ໃນການສຶກສາຄົ້ນຄ້ວາການຮ່າງບົດບັນທຶກການຮ່ວມມືມິດຕະພາບລະຫວ່າງນະຄອນຫຼວງວຽງຈັນ ແລະ ແຂວງເບນແຈ. ນອກຈາກນີ້ ຄະນະກໍຍັງໄດ້ລົງພື້ນທີ່ຕົວຈິງ ທີ່ສວນປູກໝາກພ້າວເປັນສິນຄ້າຂອງຄອບຄົວຕົວແບບ ແລະຢ້ຽມຊົມໂຮງງານຫວຽດເວີນ ທີ່ຜະລິດສິນຄ້າຈາກໝາກພ້າວເຊັ່ນ: ນ້ຳໝາກພ້າວ, ກະທິສົດ ແລະ ອື່ນໆ....

- ຢູ່ນະຄອນເກີນເທີ ຄະນະຜູ້ແທນຂັ້ນສູງ ນວ ໄດ້ພົບປະກັບ ສະຫາຍ ເຈີ່ນ ກວັກ ຈຸງ, ກຳມະການສູນກາງພັກ, ເລຂາພັກນະຄອນເກີນເທີ ຜົນການພົບປະທັງສອງຝ່າຍແມ່ນເຫັນດີເປັນເອກະພາບ ໃນການສຶກສາຄົ້ນຄ້ວາການຮ່າງບົດບັນທຶກການຮ່ວມມືມິດຕະພາບລະຫວ່າງນະຄອນຫຼວງວຽງຈັນ ແລະ ນະຄອນ ເກິນ ເທີ ເຊີ່ງເນື້ອໃນບົດບັນທຶກແມ່ນການຮ່ວມມືກ່ຽວກັບການສົ່ງເສີມການປູກເຂົ້າເປັນສິນຄ້າ ແລະ ໂຄງການລ້ຽງປາໜັງ ນ້ຳຂອງ.

#ວຽງຈັນວັນໃໝ່ຂ່າວສານທັນສະໄໝເພື່ອຊາວວຽງ.

ແຫຼ່ງຂ່າວ ເພີ່ມຕື່ມ ຈາກ ສ.ສ ຫວຽດນາມ:

ນະຄອນໂຮ່ຈີມິນ:
https://www.hcmcpv.org.vn/tin-tuc/quan-he-hop-tac-giua-tphcm-va-thu-do-vieng-chan-khong-ngung-duoc-vun-dap-1491855203
https://hcm.qdnd.vn/kinh-te-xa-hoi/tp-ho-chi-minh-va-thu-do-vieng-chan-trao-doi-kinh-nghiem-ve-cong-tac-dang-485243

ແຂວງກຽນຢາງ (ຟູກັວກ):
https://baomoi.com/kien-giang-va-thanh-pho-vieng-chan-lao-day-manh-hop-tac-phat-trien-du-lich-thuong-mai-dich-vu/c/31075522.epi

ແຂວງເລີມດົງ (ດາຫລາດ)
http://www.lamdong.gov.vn/vi-VN/home/news/hotnews/Pages/tiep-xa-giao-doan-dai-bieu-cap-cao-vieng-chan.aspx

ແຂວງ ແຄງຮວາ (ຍ່າຈາງ)
http://www.khanhhoa.gov.vn/vi/tin-hoat-dong-trong-tinh/lanh-dao-tinh-khanh-hoa-tiep-doan-dai-bieu-cap-cao-thu-do-vieng-chan-lao

ແຂວງ ເບນແຈ
http://baodongkhoi.vn/vieng-chan-lao-va-ben-tre-xuc-tien-phat-trien-nganh-dua-19062019-a61275.html

ນະຄອນ ເກີນເທີ
https://baotintuc.vn/kinh-te/thuc-day-hop-tac-nong-nghiep-giua-can-tho-va-thu-do-vieng-chan-20190619222457051.htm

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 26

ຈຳນວນຜູ້ເຂົ້າຊົມວານນີ້ 41

ຈຳນວນຜູ້ເຂົ້າຊົມອາທິດນີ້ 26

ຈຳນວນຜູ້ເຂົ້າຊົມເດືອນນີ້ 823

ຈຳນວນຜູ້ເຂົ້າຊົມທັງໝົດ 48683

Currently are 136 guests and no members online

ແຜນທີ່ນະຄອນຫຼວງວຽງຈັນ