ກອງ​ປະຊຸມ​ສະຫຼຸບ​ການຈັດຕັ້ງປະຕິບັດ​ ວຽກ​ງານ​ອຸດສາຫະກຳ ແລະ ການ​ຄ້າ ນະຄອນຫຼວງ​ວຽງຈັນ ຈັດ​ໃນ​ວັນ​ທີ 28 ທັນວາ 2017 ຜ່ານ​ມາ ທີ່​ພະ​ແນກ​ດັ່ງກ່າວ ໂດຍ​ມີ​ທ່ານ​ນາງ ເຂັມ​ມະນີ ພົນ​ເສນາ ລັດຖະມົນຕີ​ກະຊວງ​ອຸດສາຫະກຳ ແລະ ການ​ຄ້າ ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະຄອນຫຼວງ​ວຽງຈັນ ມີ​ທ່ານ​ຫົວໜ້າ​ພະ​ແນກ ຮອງພະ​ແນກ ຫົວໜ້າ​ຫ້ອງການ ຂະແໜງ​ການ ແຂກ​ຖືກ​ເຊີນ ແລະ ສະມາຊິກ​ພັກ ພະນັກງານ​ລັດຖະກອນ​ພາຍໃນ​ພະ​ແນກ​ອຸດສາຫະກຳ ແລະ ການ​ຄ້ານະຄອນຫຼວງ ເຂົ້າ​ຮ່ວມ.

     ທ່ານ ເບີ​ລິນ ເພັດ​ຈັນທະ​ຣາດ ໄດ້​ຍົກ​ໃຫ້​ເຫັນ​ບາງ​ຜົນງານ​ທີ່​ພົ້ນເດັ່ນ​ໃນ​ປີຜ່ານມາ ໂດຍ​ລວມແລ້ວ ​ມີ​ຫຼາຍ​ບັນຫາ​ທີ່​ທາງ​ພະແນກ​ໄດ້​ສູ້​ຊົນ​ຈັດ​ຕັ້ງ​ປະຕິບັດ ​ສາມາດ​ຍາດ​ແຍ່ງ​ຜົນງານ​ມາ​ໄດ້ຫຼາຍ​ດ້ານ ໂດຍ​ສະເພາະວຽກງານ​ວິຊາ​ສະເພາະ ໄດ້​ຮັບ​ອະນຸມັດ​ໂຄງການ​ລົງທຶນ​ຂອງ​ລັດ 14 ໂຄງການ ໃນ​ນັ້ນເປັນ​ໂຄງການສືບຕໍ່ 8 ໂຄງການ ໂຄງການ​ສະເໜີ​ໃໝ່ 6 ໂຄງການ ໄດ້​ດັດແກ້ໂຮງງານ​ທີ່​ມີ​ບັນຫາ​ດ້ານ​ສິ່ງ​ແວດລ້ອມ​ເກີດ​ຂຶ້ນ ຈຳນວນ 7 ໂຮງງານ ອອກ​ໃບ​ອະນຸຍາດ​ດຳເນີນກິດຈະການ​ໃໝ່ 312 ແຫ່ງຕໍ່​ອະນຸຍາດ​ດຳເນີນ​ກິດຈະການ 1.032 ໂຮງງານ ພິເສດ​ການ​ສົ່ງເສີມ​ການ​ຜະລິດ​ເປັນ​ສິນຄ້າ ໂດຍສະເພາະ ສິນຄ້າ​ໜຶ່ງ​ເມືອງ​ໜຶ່ງຜະລິດ​ຕະ​ພັນ ສ້າງຕັ້ງ​ກຸ່ມ​ການຜະລິດ​ຢູ່ 2 ເມືອງປາກ​ງື່ມ ແລະ ນາ​ຊາຍ​ທອງ ໄດ້​ມອບ​ກາ​ໝາຍສິນຄ້າ​ໂອ​ດ໋ອບ 6 ຫົວໜ່ວຍ ປັດຈຸ​ບັນ ທົ່ວ​ນະຄອນຫຼວງ​ມີ​ຫົວໜ່ວຍ​ໂອ​ດ໋ອບ ທັງ​ໝົດ 40 ຫົວໜ່ວຍ ມີ 5 ກຸ່ມ​ການ​ຜະລິດ 35 ວິ​ສາ​ຫະ​ກິດ 179 ຜະລິດ​ຕະ​ພັນ ກວມ​ເອົາ 35 ບ້ານ 9 ເມືອງ ທຽບໃສ່​ປີຜ່ານມາ ເພີ່ມ​ຂຶ້ນ 14,29% ເມືອງ​ທີ່​ໄດ້​ຮັບ​ກາໝາຍ​ໂອ​ດ໋ອບ​ຫຼາຍ​ກວ່າ​ໝູ່​ແມ່ນເມືອງໄຊ​ເຊດ​ຖາ ມີ​ຈຳນວນ 9 ຫົວໜ່ວຍ.

      ສະເພາະ​ທິດ​ທາງ​ແຜນການຈຸດ​ສຸມ 2018 ເພີ່ມ​ທະວີ​ວຽກງານ​ສຶກ​ສາ​ອົບຮົມ​ແນວ​ຄິດ-ການເມືອງ​ໃຫ້​ສະມາຊິກ​ພັກ ພະນັກ​ງານ ລັດຖະກອນ ກຳ​ແໜ້ນແນວທາງ​ນະໂຍບາຍ​ຂອງ​ພັກ-ລັດ ປັບປຸງ​ການຈັດຕັ້ງ​ໃຫ້​ໜັກແໜ້ນ​ເຂັ້ມແຂງ ຍົກ​ລະດັບຄວາມ​ຮູ້​ທາງ​ດ້ານ​ວິຊາ​ສະເພາະ ຈະ​ສືບຕໍ່​ຈັດ​ຕັ້ງ​ໂຄງການ​ສ້າງ​ຕະຫຼາດ​ຈຳໜ່າຍ​ໄມ້​ແປ​ຮູບ ແລະ ເຟີ​ນີ​ເຈີ ຢູ່​ເຂດ​ນິຄົມ​ອຸດສາຫະກຳ ສືບຕໍ່​ຕິດຕາມ​ກວດກາ ແລະ ຄຸ້ມຄອງ​ລາຄາ​ສິນຄ້າ ຈັດ​ສັນ​ຄວາມເປັນ​ລະບຽບ ຕິດ​ສະຫຼາກ​ສິນຄ້າເປັນ​ພາສາ​ລາວ ເຜີຍແຜ່​ລະບຽບການ​ຄຸ້ມ​ຄອງ ສົ່ງເສີມ​ໂຮງງານ ແລະ ໂຮງ​ຊ່າງ​ຫັດຖະກຳ ແລະ ໂຮງງານ​ຕ່າງໆ​ໃຫ້​ເຂົ້າ​ສູ່​ລະບຽບການ ສົ່ງ​ການ​ຜະລິດ​ເປັນ​ສິນຄ້າ ໃຫ້​ໄດ້​ຕິດ​ກາ​ໝາຍ​ໂອ​ດ໋ອບ​ບໍ່​ໃຫ້ຫຼຸດ 5 ຜະລິດ​ຕະ​ພັນ ສືບຕໍ່​ເກັບກຳ​ຕົວ​ເລກ​ນຳ​ເຂົ້າ-ອອກ​ສິນຄ້າ ສືບຕໍ່​ສ້າງ​ນິຕິ​ກຳ​ລຸ່ມ​ກົດໝາຍວ່າ​ດ້ວຍ​ການ​ຄຸ້ມ​ຄອງ​ບໍລິການ ສົ່ງເສີມ​ການ​ລົງທຶນ​ໃນ​ນິຄົມ​ອຸດສາ​ຫະ​ກຳ ນວ ແລະ ນິຕິ​ກຳ ການ​ສົ່ງເສີມສ້າງ​ເປັນ​ບ້ານ​ຫັດຖະ​ກຳ ແລະ ສືບຕໍ່​ຮ່າງ​ກົດໝາຍ ພັດທະນາ​ວິ​ສາ​ຫະ​ກິດ​ຂະໜາດນ້ອຍ ກາງ (SMEs) ຂອງ ນວ ແຕ່​ນີ້​ຫາ 2020.

     ກອງ​ປະຊຸມ​ຄັ້ງ​ນີ້​ຍັງ​ໄດ້​ມອບໃບ​ຍ້ອງຍໍ ໃຫ້​ກັບ​ພະນັກງານ​ດີເດັ່ນ​ໃນ​ການເຄື່ອນໄຫວ​ວຽກ​ງານໃນ​ປີຜ່ານມາ ພ້ອມ​ທັງ​ມອບ​ໃບຢັ້ງຢືນ ກຳມະບານ 2 ດີ 5 ເປັນເຈົ້າ​ໃຫ້​ພະນັກງານ ແລະ ພະແນກ​ອຸດສາຫະກຳ​ການ​ຄ້າ ນວ ນຳ​ອີກ.

ຂໍ້ມູນຈາກ: ໜັງສືພີມວຽງຈັນໃໝ່