ວັນ​ທີ 18 ມິຖຸນາ 2016 ພະແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ (ນວ) ຮ່ວມ​ກັບອົງການ​ພັດທະນາ ແລະ ບໍລິຫານ​ຕົວ​ເມືອງ​ວຽງ​ຈັນ ຫ້ອງການ ​ອພບ ເມືອງ​ໄຊ​ເຊດຖາ ອຳນາດ​ການ​ປົກຄອງ​ບ້ານສະພັງ​ໝໍ້ ແລະ ບ້ານ​ໂພນ​ທັນ ເມືອງ​ໄຊ​ເຊດ​ຖາ ນວ ໄດ້​ຈັດ​ກິດຈະ​ກຳ​ສົ່ງເສີມ​ອະນຸ​ຮັກ​ສິ່ງ​ແວດລ້ອມ​ ຄັ້ງທີ 2 ເພື່ອ​ອະນາໄມ​ຮ່ອງນ້ຳ​ເປື້ອນ​ແຕ່​ຈຸດ​ບ້ານ​ໂພນ​ທັນຫາບ້ານ​ຮ່ອງ​ແກຂຶ້ນ ​ພາຍ​ໃຕ້ໂຄງການ​ປັບປຸງ​ສິ່ງແວດລ້ອມນ້ຳ​ໃນ​ຕົວ​ເມືອງ ໂດຍ​ໄດ້​ຮັບ​ການສະໜັບສະໜູນ​ຈາກ​ອົງການ​ໄຈກາ ມີ​ພະນັກງານ​ວິຊາ​ການ ອຳນາດ​ການ​ປົກຄອງ​ບ້ານ ຕະຫຼອດຮອດ​ພໍ່​ແມ່​ປະຊາຊົນ 2 ບ້ານ ແລະ ພາກສ່ວນ​ກ່ຽວຂ້ອງ​ເຂົ້າຮ່ວມ​ຫຼາຍ​ກວ່າ 200 ຄົນ.

   ວັນ​ທີ 25 ພຶດສະພາ 2016 ພະ​ແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ, ໂດຍ​ໄດ້​ຮັບ​ການ​ສະໜັບສະໜູນຈາກ ​ອົງການ​ຮ່ວມ​ມື​ຍີ່ປຸ່ນ ​ຈັດກອງ​ປະຊຸມ​ຄະນະ​ກຳມະການ​ປະສານ​ງານ​ຮ່ວມ ຄັ້ງ​ທີ 3 ໂຄງການ​ປັບປຸງ​ສິ່ງແວດລ້ອມ​ນ້ຳ​ໃນຕົວ​ເມືອງ ນວ ຂຶ້ນ​ທີ່​ໂຮງແຮມວຽງ​ຈັນ​ພລາ​ຊາ ເປັນ​ປະທານຂອງ​ທ່ານ ແກ້ວ​ພິລາ​ວັນ ອາ​ໄພລາດ ຮອງ​ເຈົ້າ​ຄອງ ນວ ມີ​ທ່ານ ເດດ​ສົງຄາມ ທຳ​ມະ​ວົງ ຫົວໜ້າພະ​ແນກ​ໂຍທາ​ທິ​ການ ແລະ ຂົນສົ່ງ ນວ ພ້ອມ​ດ້ວຍ​ຜູ້ຕາງໜ້າ​ທີ່ມາ​ຈາກ​ກະຊວງ​ໂຍທາ​ທິ​ການ ແລະ ຂົນສົ່ງ ກະຊວງ​ຊັບ​ພະຍາກອນ​ທຳ​ມະ​ຊາດ ແລະ ສິ່ງ​ແວດລ້ອມ ອົງການ​ໄຈ​ກ້າ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

   ວັນ​ທີ 24 ພຶດສະພາ 2016 ທີ່​ພະ​ແນກ​ສາ​ທາ ທ່ານ ​ດຣ. ພອນ​ປະເສີດ ອຸ​ນາ​ພົມ ຫົວໜ້າພະ​ແນກສາທາລະນະ​ສຸກ ນວ ໄດ້​ກ່າວ​ວ່າ: ພະ​ແນກ​ສາ​ທາ​ລະສຸກ ​ໄດ້​ເອົາໃຈໃສ່ຢ່າງ​ຕັ້ງໜ້າ ເຂົ້າ​ໃນ​ການຈັດຕັ້ງ​ປະຕິບັດ​ວຽກງານ​ປາບ​ປາມ ແລະ ສະກັດ​ກັ້ນວົງ​ຈອນ​ການ​ກຳເນີດ​ຂອງ​ຍຸງລາຍ ເຊິ່ງ​ພວກ​ເຮົາ​ໄດ້​ປະຕິບັດໂຄງການ​ແຕ່​ຕົ້ນ​ປີ 2016 ເປັນຕົ້ນ​ມາ ເນື່ອງ​ໃນ​ໂອກາດ​ວັນ​ປູກຕົ້ນໄມ້ ແລະ ວັນເດັກນ້ອຍ​ສາກົນ 1 ມິຖຸນາ 2016 ທີ່​ຈະ​ມາ​ເຖິງ​ນີ້ ພະ​ແນກ​ສາ​ທາ ໄດ້​ຈັດ​ໂຄງການສັບປະດາ​ວັນ​ປ່ອຍ​ປາ​ຫາງ​ນົກ​ຍຸງ ລະຫວ່າງ​ວັນ​ທີ 3-10 ມິຖຸນາ 2016 ໂດຍ​ໂຄງການ​ປ່ອຍ​ປາຫາງ​ນົກ​ຍຸງ ກໍ່​ຄືການແຈກຢາຍປາ​ຫາງ​ນົກ​ຍຸງໃຫ້​ກັບ​ພໍ່ແມ່ປະຊາ​ຊົນ ເພື່ອ​ນຳໄປ​ປ່ອຍ​ໃສ່​ໂຖ​ນ້ຳ ໂອ່ງ​ນ້ຳ ພາຊະນະ​ທີ່​ມີ​ນ້ຳ​ຂັງ ຕະຫຼອດ​ຮອດ​ສະຖານທີ່ທີ່​ມີ​ນ້ຳ​ຂັງ ແລະ ບໍ່​ສາມາດ​ອະນາໄມ​ໄດ້ ເພື່ອ​ໃຫ້​ປາ​ກິນ​ໜອນ​ນ້ຳ ແລະ ເປັນ​ການ​ຕັດ​ວົງ​ຈອນ​ການ​ແຜ່ພັນຂອງ​ຍຸງ​ລາຍ.

ໃນປີ 2016 ນະຄອນຫຼວງວຽງຈັນຈະສຸມໃສ່ປູກຕົ້ນໄມ້ໃນເນື້ອທີ່ 300 ເຮັກຕາ. ໃນນັ້ນ ພາກລັດປູກໃນເຂດດິນລັດຄຸ້ມຄອງ ເປັນຕົ້ນ ສະຖານທີ່ສາທາລະນະ, ຕາມສໍານັກງານອົງການ, ແຄມທາງ ແລະ ອື່ນໆ.