Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

30710425 559971037716192 8003918469470879744 n

     ເມື່ອເຖິງລະດູເດືອນ 5 ເຮັດບຸນສົງນໍ້າ : ການຫົດນໍ້າພຣະພຸດທະຮູບ ພຣະສົງພໍ່ແມ່ ຜູ້ເຖົ້າຜູ້ແກ່ ເອີ້ນວ່າ: ສົງນໍ້າ ການເຮັດບຸນມີການໃຫ້ທານເປັນຕົ້ນກ່ຽວແກ່ການສົງນໍ້າ ເອີ້ນວ່າ ບຸນສົງນໍ້າ ອີກໜຶ່ງເອີ້ນວ່າ ຕຣຸສສົງກາຣນຕ໌ ຕຣຸສຄື ສິ້ນສົງກາຣນຕ໌ ຄື ການເຄື່ອນຍ້າຍໄດ້ແກ່ວັນທີ່ພຣະອາທິດເຄື່ອນຍ້າຍຈາກລະດູໜາວ ກ້າວຂື້ນໄປສູ່ລະດູຮ້ອນ ໃນລະຍະນີ້ເອີ້ນວ່າ:ຕຣຸສສົງກາຣນຕ໌ ກຳໜົດເອົາວັນຂື້ນ 15 ຄ່ຳເດືອນ 5 ເພາະມີກຳໜົດເຮັດໃນເດືອນ 5 ຈຶ່ງມີຊື່ເອີ້ນອີກຢ່າງໜຶ່ງວ່າບຸນເດືອນຫ້າ

ມູນເຫດແຫ່ງການເຮັດ:ເມື່ອລະດູເດືອນເຄື່ອນມາເຖິງເດືອນຫ້າອາກາດຮ້ອນອົບເອົ້າຜິດປົກກະຕິເຮັດໃຫ້ຄົນເຈັບໄຂ້ໄດ້ປ່ວຍ ການອາບນ້ຳຊຳຮະຮ່າງກາຍເປັນອຸບາຍວິທີແກ້ຮ້ອນຜ່ອນຄາຍເປັນເຢັນ ໃຫ້ໄດ້ຮັບຄວາມສຸຂກາຍສະບາຍໃຈມີເລື່ອງໜຶ່ງທ່ານກ່າວໄວ້ວ່າ : “

 30698283 559971061049523 3477259244292538368 n

     ເມື່ອຕົ້ນພັດທະກັບ ມີເສດຖີຄົນໜຶ່ງມີຊັບມາກມາຍແຕ່ບໍ່ມີລູກ ວັນໜຶ່ງນັກເລງສຸຣາເຂົ້າໄປໃນບ້ານຂອງເສດຖີແລ້ວດ່າເສດຖີວ່າທ່ານມີເງິນຄຳແຕ່ບໍ່ມີລູກ ຊີວິດທ່ານບໍ່ມີຄວາມໝາຍທ່ານຕາຍໄປກໍ່ມີຄົນສືບຕະກຸນ ຊັບສິນທ່ານກໍ່ສູນເປົ່າ “ດ່າແລ້ວນັກເລງສຸຣາກໍໜີໄປ ເສດຖີຄິດຄຳໜຶ່ງເຖິງຄຳເວົ້າຂອງນັກເລງສຸຣາກໍເຫັນວ່າແມ່ນແທ້ ຈຶ່ງໄດ້ຈັດເຄື່ອງໄປບ່ວງສວງພຣະອາທິດ ແລະ ພຣະຈັນ ເພື່ອຂໍລູກເວລາລ່ວງເລີຍມາສາມປີກໍຍັງບໍ່ໄດ້ລູກ ຈຶ່ງໄປຂໍລຸກກັບຕົ້ນໄຊອີກຕົ້ນໄຊມີຄວາມກະຣຸນາໄດ້ໄປຂໍບຸດນຳພຣະອິນພະອິນກໍໃຫ້ທັມມະບານກຸມານມາເກີດໃນທ້ອງພັນລະຍາເສດຖີ ເມື່ອທັມມະບານປະສູດແລ້ວຈຶ່ງປຸກຜາສາດຂື້ນໃຫ້ກຸມານຢູ່ກ້ອງຕົ້ນໄຊຮິມຝັ່ງແມ່ນ້ຳນັ້ນຄັ້ນກຸມານຈະເລີນໄວຂື້ນມາກໍຮູ້ພາສານົກແລ້ວຮຽນຈົບໄຕຣເພດເມື່ອອາຍຸໄດ້ 8 ປີ ແລະໄດ້ເປັນອາຈານສອນມຸງຄຸນຕ່າງໆ ໃຫ້ແກ່ຄົນຊາວຊົມພູທະວີບທັງຫຼາຍຊຶ່ງຂະນະນັ້ນໂລກທັງຫຼາຍນັບຖືທ້າວມະຫາພຣົມ ແລະ ກະບິລະພຣົມອົງໜຶ່ງໄດ້ສອນໜັງສືມຸງຄຸນກາຣແກ່ຄົນທັງປວງ.

ເມື່ອກະບິລະພຣົມ(ຮູ້)ແຈ້ງເຫດທີ່ທັມມະບານກຸມານເປັນຜູ້ມີຊື່ສຽງ ເປັນທີ່ນັບຖືຂອງຄົນຊາວໂລກທັງຫຼາຍຈຶ່ງລົງມາຖາມບັນຫາກັບທັມມະບານກຸມານ 3 ຂໍ້ ຄວາມວ່າ

ເວລາເຊົ້າ ສິຣິຄືຣາສີຢູ່ບ່ອນໃດ.?

ເວລາທ່ຽງ ສິຣິຄືຣາສີຢູ່ບ່ອນໃດ.?

ເວລາຄ່ຳ ສິຣິຄືຣາສີຢູ່ບ່ອນໃດ.?

ແລະສັນຍາວ່າ ຖ້າທ່ານແກ້ບັນຫາ 3 ຂໍ້ນີ້ໄດ້ ເຮົາຈະຕັດສີສະເຮົາບູຊາທ່ານຖ້າທ່ານແກ້ບໍ່ໄດ້ເຮົາຈະຕັດສີສະທ່ານເສຍ ທັມມະບານກຸມານຮັບສັນຍາແຕ່ພັດແກ້ບັນຫາອອກໄປ 7 ວັນ ກະບິລະພຣົມ ກໍກັບໄປຍັງພຣົມມະໂລກ.

ສ່ວນທັມມະບານກຸມານ ພິຈາຣະນາບັນຫານັ້ນລ່ວງໄປໄດ້ 6 ວັນແລ້ວຍັງບໍ່ເຫັນອຸບາຍທີ່ຈະແກ້ບັນຫາໄດ້ຈຶ່ງຄິດວ່າ ຮູ່ງເຊົ້ານີ້ແລ້ວໜໍເຮົາຈະຕ້ອງຕາຍດ້ວຍອາຍາຂອງທ້າວກະບິລະພຣົມເຮົາບໍ່ຕ້ງການຕາຍຈຳຕ້ອງໜີໄປລີ້ຊ້ອນຕົນເສຍດີກວ່າ ຄິດແລ້ວລົງຈາກຜາສາດທ່ຽວໄປນອນຢູ່ກ້ອງຕົ້ນຕານ 2 ຕົ້ນ ຊຶ່ງມີນົກອິນຊີ 2 ໂຕ ຜົວເມຍເຮັດຮັງຢູ່ເທິງຕົ້ນຕານນັ້ນ.

ຂະນະທີ່ທັມມະບານກຸມານນອນຢູ່ກ້ອງຕົ້ນຕານນັ້ນ ໄດ້ຍິນສຽງນາງນົກອິນຊີຖາມຜົວວ່າ ຮຸ່ງເຊົ້ານີ້ຈະໄປຫາອາຫານທີ່ໃດ ນົກອິນຊີຜູ້ຜົວຕອບວ່າຮຸ່ງເຊົ້ານີ້ຄົບ 7 ວັນທີ່ທ້າວກະບິລະພຣົມ ຖາມບັນຫາແກ່ທັມມະບານກຸມານແຕ່ທັມມະບານກຸມານແກ້ບໍ່ໄດ້ ທ້າວກະບິລະພຣົມຈະຕັດສີສະເສຍຕາມສັນຍາ ເຮົາທັງ 2 ຈະໄດ້ກິນຊີ້ນມະນຸດ ຄື ທັມມະບານກຸມານນັ້ນເປັນອາຫານນາງນົກອິນຊີຖາມວ່າທ່ານຮູ້ບັນຫາຫຼືບໍ່? ຜູ້ຜົວ ຕອບວ່າຮູ້ແລ້ວກໍເລົ່າໃຫ້ນາງເມຍຟັງ ຕັ້ງແຕ່ຕົ້ນຈົນຈົບວ່າ:

1.ເວລາເຊົ້າຣາສີຢູ່ທີ່ໜ້າ ຄົນທັງຫຼາຍຈຶ່ງເອົານ້ຳລ້າງໜ້າ

2.ເວລາທ່ຽງຣາສີຢູ່ທີ່ເອິກ ຄົນທັງຫຼາຍຈຶ່ງເອົານ້ຳ ແລະ ແປງນ້ຳຫອມລູບໄລ້ທາທີ່ໜ້າເອິກ.

3. ເວລາຄ່ຳຣາສີຢູ່ທີ່ຕີນ ຄົນທັງຫຼາຍຈຶ່ງເອົານ້ຳລ້າງຕີນ

ທັມມະບານກຸມານນອນຢູ່ກ້ອງຕົ້ນໄມ້ ໄດ້ຍິນການສົນທະນາຂອງນົກອິນຊີທັງ 2 ກໍຈື່ຈຳໄດ້ ຈຶ່ງມີຄວາມໂສມະນັດປິຕິຍິນດີທີ່ສຸດ ແລ້ວຈຶ່ງກັບສູ່ຜາສາດຂອງຕົນຄັ້ນເຖິງວາຣະເປັນຄຳຣົບ 7 ວັນຕາມສັນຍາ ທ້າວກະບິລະພຣົມກໍລົງມາຖາມບັນຫາທັງ 3 ຂໍ້ ຕາມທີ່ໄດ້ຟັງມາຈາກນົກອິນຊີນັ້ນ ທ້າວກະບິລະພຣົມ ຍອມຮັບວ່າຖືກຕ້ອງ ແລະຍອມປາຣະໄຊແກ່ທ້າວທັມມະບານກຸມານ ແລະ ຈຳຕ້ອງຕັດສີສະຂອງຕົນບູຊາຕາມທີ່ສັນຍາໄວ້ແຕ່ວ່າກ່ອນຈະຕັດສີສະ ໄດ້ຕັດເອີ້ນທິດາທັງ 7 ອັນເປັນບາດບໍຣິຈາຣິກາຂອງພຣະອິນຄື:

ນາງ ທຸງສະເທວະ
ນາງ ໂຄຣາຄະເທວີ
ນາງ ຣາກຂະສະເທວີ
ນາງ ມົນດາເທວີ
ນາງ ກິຣິນີເທວີ
ນາງ ກິມິທາເທວີ
ນາງ ມະໂຫທະຣະເທວີ

ວັນໂລກສົມມຸດວ່າເປັນອົງມະຫາສົງກຣານຕ໌ ກັບທັງເທພບັນສັດມາພ້ອມກັນແລ້ວຈຶ່ງບອກເລື່ອງລາວໃຫ້ຊາບ ແລະ ຕັດ(ບອກ)ວ່າ ພຣະສຽນຂອງເຮົານີ້ຖ້າຕັ້ງໄວ້ເທິງແຜ່ນດິນກໍຈະເກີດໄຟໄໝ້ໄປທົ່ວໂລກະທາດຖ້າຈະໂຍນຂື້ນໄປເທິງອາກາດຝົນກໍຈະແລ້ງ ເຈົ້າທັງ 7 ຈົ່ງເອົາພານມາຮອງຮັບສຽນຂອງບິດາໄວ້ເຖີ້ນ ຄັນແລ້ວທ້າວກະບິລພຣົມ ກໍຕັດພຣະສຽນທີ່ພຣະສໍໃສ່ພານແວ່ນຟ້າສົ່ງໃຫ້ນາງ ທຸງສະເທວີ ທິດາອົງໃຫຍ່ໃນຂະນະນັ້ນ ໂລກະທາດກໍເກີດໂກລະຫົນອົນລະເວງຍິ່ງໜັກ.

ເມື່ອນາງທຸງສະເທວີມະຫາສົງກຣານຕ໌ເອົາພານມາຮອງຮັບເອົາພຣະສຽນຂອງທ້າວກະບິລະພຣົມແລ້ວກໍໃຫ້ເທພບັນສັດແຫ່ປະທັກສິນວຽນອ້ອມເຂົາພຣະສຸເມຣຸຣາຊ 60 ນາທີແລ້ວຈຶ່ງເຊີນເຂົ້າປະດິດສະຖານໄວ້ໃນມົນດົບ ທີ່ຖ້ຳຄັນທະທຸລີເຂົາໄກລາດກະທຳບູຊາດ້ວຍເຄື່ອງທິບຕ່າງໆ ພຣະວິສະນຸກັມເທພບຸດ ກໍ່ນິຣະມິດໂລງແກ້ວອັນແລ້ວໄປດ້ວຍແກ້ວ 7 ປະການ ຊື່ ພັຄວະດີ ໃຫ້ເທພະທິດາ ແລະ ນາງຟ້າແລ້ວເທພະຍະດາທັງຫຼາຍກໍ່ນຳມາຊຶ່ງເຖົາສະມຸນາຕລົງນ້ຳໃນສະອະໂນດາດ 7 ຄັ້ງແລ້ວແຈກກັນສັງເວີຍທົ່ວທຸກໆພຣະອົງ ຄັ້ນໄດ້ວາຣະກຳໜົດຄົບ 365 ວັນໂລກສົມມຸດວ່າປີໜຶ່ງເປັນວັນສົງກຣານຕ໌ ນາງເທພະທິດາທັງ 7 ກໍ່ຊົງເທພພາຫະນະຕ່າງໆຜັດປ່ຽນຜຽນກັນມາເຊີນພຣະສຽນຂອງກະບິລະພຣົມອອກແຫ່ ພ້ອມດ້ວຍເທພບັນສັດແສນໂກດປະທັກສິນວຽນອ້ອມເຂົາພຣະສຸເມຣຸຣາຊບັນພົດທຸກໆປີ ແລ້ວແຫ່ກັບໄປຍັງເທວະໂລກ…

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 9

ຈຳນວນຜູ້ເຂົ້າຊົມວານນີ້ 23

ຈຳນວນຜູ້ເຂົ້າຊົມອາທິດນີ້ 249

ຈຳນວນຜູ້ເຂົ້າຊົມເດືອນນີ້ 871

ຈຳນວນຜູ້ເຂົ້າຊົມທັງໝົດ 29061

Currently are 27 guests and no members online

ແຜນທີ່ນະຄອນຫຼວງວຽງຈັນ