ໜຶ່ງຜະລິດ​ຕະ​ພັນ ໜື່ງເມືອງ (ໂອ​ດ໋ອບ)ແມ່ນຜະລິດ​ຕະ​ພັນ​ທີ່​ນຳ​ໃຊ້​ສີມື​ແຮງງານ ພູມ​ປັນຍາ ຫົວຄິດ​ປະດິດສ້າງ ແລະຊັບພະຍາກອນ​ພາຍໃນ​ທ້ອງຖິ່ນ ເປັນ​ເອກະລັກ​ຂອງທ້ອງຖິ່ນ (ເມືອງ ບ້ານ) ນັ້ນໆແລະ ອາດ​ເປັນ​ໄດ້​ທັງ​ຕົວ​ສິນຄ້າ ສາມາດ​ຈັບບາຍ​ໄດ້ ແລະ ຮູບແບບ​ການ​ບໍລິການ (ວັດທະນະທຳ ສະຖານທີ່​ທ່ອງ​ທ່ຽວ ວິຖີ​ຊີວິດ ປະເພນີ ແບບແຜນ​ການ​ດຳລົງ​ຊີວິດ)ມີ​ມູນເຊື້ອ ແລະ ເປັນ​ມໍລະ​ດົກ​ຕົກ​ທອດ​ກັນ​ມາ.

     ພະ​ແນກ​ອຸດສາຫະກຳ ແລະ ການ​ຄ້າ​ນະຄອນຫຼວງໄດ້​ສືບຕໍ່ຊຸກຍູ້​ສົ່ງເສີມ​ການ​ຜະລິດ​ເປັນ​ສິນຄ້າ “ໜຶ່ງ​ເມືອງ​ໜຶ່ງ​ຜະລິດ​ຕະພັນ” ແຫ່ງ​ຊາດ ມາ​ຮອດ​ປັດ​ຈຸບັນ ​ທົ່ວ​ນະຄອນຫຼວງມີ​ບັນດາຫົວໜ່ວຍ​ທຸລະ​ກິດ ແລະ ກຸ່ມການ​ຜະລິດທີ່​ໄດ້​ຮັບ​ອະນຸຍາດນຳ​ໃຊ້​ກາ​ໝາຍ​ຜະລິດ​ຕະ​ພັນ​ສິນຄ້າ “ໜຶ່ງ​ເມືອງ​ໜຶ່ງ​ຜະລິດ​ຕະພັນ” ແຫ່ງ​ຊາດ ທັງ​ໝົດ​ຈຳນວນ 39 ຫົວໜ່ວຍຄື:ເມືອງ​ຈັນທະບູ​ລີ 7 ຫົວໜ່ວຍ ສີ​ໂຄດ​ຕະບອງ 5 ຫົວໜ່ວຍ ໄຊ​ເຊດ​ຖາ 9 ຫົວໜ່ວຍສີ​ສັດຕະ​ນາກ 5 ຫົວໜ່ວຍ ໄຊ​ທານີ 4 ຫົວໜ່ວຍ ນາ​ຊາຍທອງ 1 ຫົວໜ່ວຍ ຫາດ​ຊາຍ​ຟອງ 4 ຫົວໜ່ວຍ ປາກ​ງື່ມ 3 ຫົວໜ່ວຍ ແລະ ເມືອງ​ສັງ​ທອງ 1 ຫົວໜ່ວຍເຊິ່ງ​ໃນ​ການ​ສົ່ງເສີມນັ້ນ​ໄດ້​ເຝິກອົບຮົມ​ໃຫ້​ບັນດາ​ຫົວໜ່ວຍ​ທຸລະ​ກິດ​ຂະໜາດ​ນ້ອຍ ແລະ ກາງ ປະກອບ​ມີ 4 ໂຄງການ ໂຄງການ​ສົ່ງເສີມ​ການ​ຜະລິດ​ເປັນ​ສິນຄ້າໜຶ່ງ​ເມືອງ​ໜຶ່ງຜະລິດ​ຕະ​ພັນຂອງ​ນະຄອນຫຼວງໂຄງການ​ສົ່ງເສີມ​ການ​ແຂ່ງຂັນສ້າງ​ມູນ​ຄ່າ​ເພີ່ມ​ໃຫ້​ກັບ​ສີນ​ຄ້າ​ທີ່ໄດ້​ຮັບ​ກາ​ໝາຍ​ໂອ​ດ໋ອບແຫ່ງຊາດໂຄງ​ກາ​ພັດທະນາ​ການ​ບໍ​ລິຫານ​ໃຫ້​ຜູ້​ປະກອບ​ການ​ທຸລະ​ກິດຂະໜາດ​ນ້ອຍ-ກາງ ແລະໂຄງການ​ສົ່ງເສີມ ແລະ ພັດທະນາເຕັກນິກ​ການ​ຜະລິດໃຫ້​ແກ່​ກຸ່ມການ​ຜະລິດ​ຂະໜາດ​ນ້ອຍ-ກາງ ແລະ ເສດຖະກິດ​ຄອບຄົວພ້ອມທັງ​ໄດ້​ສົ່ງເສີມ​ໃນ​ການ​ເຂົ້າ​ຫາຕະຫຼາດ​ໃນ​ງານ​ບຸນ​ປະເພນີ ແລະງານ​ວາງສະແດງ​ຕ່າງໆ.

ຂອບໃຈແຫຼ່ງຂ່າວ: ໜັງສືພິມວຽງຈັນໃໝ່.
#ວຽງຈັນວັນໃໝ່ຂ່າວສານທັນສະໄໝເພື່ອຊາວວຽງ.