Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

22852171 489325754780721 5428963552373300915 n

     ພະ​ທາດຫຼວງ​ວຽງ​ຈັນ ແມ່ນເປັນ​ປູ​ຊະ​ນິ​ຍະ​ສະຖານ​ອັນ​ເກົ່າແກ່ ແລະ ເປັນ​ມໍລະດົກ​ວັດ​ທະນະ​ທຳ​ຂອງ​ຊາດ ເຊິ່ງ​ເປັນ​ພະທາດ​ທີ່​ສວຍ​ສົດ​ງົດ​ງາມ ແລະ ລືຊື່​ໃນ​ສະໄໝ​ກ່ອນ ກໍ່​ຄືໃນ​ຍຸກ​ປັດຈຸ​ບັນ ເຊິ່ງ​ສ້າງ​ຂຶ້ນ​ໂດຍ​ນາຍ​ຊ່າງລາວ​ບູຮານ​ທີ່​ມີ​ສີມື​ດີ​ເປັນ​ພິເສດ ມີ​ຄຸນຄ່າ​ທາງ​ດ້ານ​ປະຫວັດສາດ ສິລະ​ປະ ວັດທະນະທຳ​ສູງ ແລະ ຍັງ​ເປັນ​ຕົວ​ແທນ​ໃຫ້​ແກ່​ສະ​ຖາ​ປັດຕະ​ຍະ​ກຳສິນ​ຂອງ​ປະເທດ​ລາວລ້ານ​ຊ້າງ ​ຈະເລີນ​ຮຸ່ງເຮືອງ.

 

    ພະ​ທາດຫຼວງ​ຖືກ​ສ້າງຕັ້ງ​ຂຶ້ນເປັນ​ສອງ​ໄລຍະ​ຄື: ໄລຍະ​ທີ 1 ພະທາດ​ໜ່ວຍ​ນີ້​ແມ່ນ​ຖືກ​ສ້າງ​ຂຶ້ນ​ທຳອິດ ແມ່ນ​ສະຕະວັດ​ທີ 3 ກ່ອນປີ ​ຄສ 307 ກົງ​ກັບ ​ພສ 236 ໂດຍແມ່ນ​ພະຍາ ຈັນທະ​ບູ​ລີ ປະ​ສິດທິສັກ ທັງ​ເປັນ​ຜູ້​ກໍ່​ຕັ້ງ ແລະ ປົກຄອງ​ເມືອງ​ວຽງ​ຈັນ ເວລາ​ນັ້ນ ພ້ອມ​ດ້ວຍ​ພະ​ອໍລະຫັນ 5 ຮູບ ແລະ ໄລຍະ​ທີ 2 ພາຍຫຼັງ​ທີ່​ພະເຈົ້າ​ໄຊ​ຍະ​ເຊດ​ຖາ​ທິ​ຣາດ ໄດ້​ຍ້າຍເມືອງ​ຫຼວງ​ຈາກ​ເມືອງ​ຊຽງ​ທອງ ແຂວງ​ຫຼວງ​ພະ​ບາງ ມາສະ​ຖາປະ​ນາ​ເປັນ​ເມືອງ​ຫຼວງ​ວຽງ​ຈັນ ໃນ​ປີ ​ພສ 2103 ກົງ​ກັບ​ປີ ​ຄສ 1560 ແລະ ພະ​ອົງ​ກໍ່​ໄດ້​ນຳພາຊາວ​ເມືອງ​ວຽງ​ຈັນ ເວົ້າ​ສະເພາະ ໂດຍ​ລວມ​ແມ່ນ​ປະຊາຊົນ​ລາວທັງ​ຊາດ ​ໄດ້​ບູລະນະ​ສ້າງ​ພະທາດຫຼວງ​ໂຕ​ເກົ່າ​ທີ່​ພະຍາ​ຈັນທະ​ບູ​ລີ ສ້າງ​ໄວ້​ກ່ອນ​ໜ້າ​ນັ້ນແລ້ວ ພະທາດ​ໜ່ວຍ​ນີ້​ເປັນ​ພະທາດ​ໃຫຍ່ໂຕ ແລະ ສວຍ​ງາມ​ແລ້ວ ຈຶ່ງປ່ຽນ​ຊື່​ຈາກ​ພະທາດ​ເຈດີ​ໂລກະຈຸ​ລະ​ມະນີ ມາ​ເປັນ​ພະ​ທາດຫຼວງນັບ​ແຕ່​ນັ້ນ​ມາ​ຈົນ​ຮອດ​ປັດຈຸບັນ ນອກຈາກ​ນີ້ ພະ​ທາດຫຼວງ​ຍັງ​ໄດ້ປະຕິສັງຂອນ​ມາ​ຕະຫຼອດ ເພື່ອໃຫ້​ອົງ​ພະ​ທາດຫຼວງ​ມີ​ຄວາມສວຍ​ສົດ​ງົດ​ງາມ​ໄປ​ຕະຫຼອດ ເຊິ່ງຄັ້ງ​ຫຼ້າ​ສຸດ​ແມ່ນຄັ້ງ​ທີ IV ທີ່​ດຳເນີນ​ມາແຕ່​ເດືອນ​ກັນຍາ 2016 ແລະ ສຳເລັດ​ໃນ​ວັນ​ທີ 26 ຕຸລາ 2017 ໃນ​ຍຸກ​ລະບອບ​ໃໝ່​ພາຍໃຕ້​ການ​ຊີ້​ນຳ-ນຳພາ​ຂອງ​ພັກ​ປະຊາ​ຊົນ​ປະຕິວັດ​ລາວ.

ໃນ​ເດືອນ 12 ເພັງ​ລາວ​ຂອງທຸກໆ​ປີ​ລັດຖະບານ ກໍ່​ຄືປະຊາຊົນ​ລາວ​ບັນດາເຜົ່າ​ທົ່ວ​ປະເທດ ໄດ້​ພ້ອມ​ກັນ​ຈັດ​ງານ​ບຸນ​ນະ​ມັດ​ສະການ​ພະ​ທາດຫຼວງ​ຢ່າງ​ເປັນ​ທາງການ​ໃນ 3 ວັນ​ຄື: ໃນ​ມື້ 13 14 ແລະ 15 ຄ່ຳ ກົງ​ກັບ​ເດືອນ​ພະຈິກຂອງ​ທຸກ​ປີ ໃນ​ງານ​ບຸນ​ດັ່ງກ່າວ ໄດ້​ມີ​ພິທີ​ແຫ່​ຜາສາດ​ເຜີ້ງ​ຈາກ​ວັດສີ​ເມືອງ ໄປ​ສູ່​ພະ​ທາດຫຼວງ ໃນ​ມື້ 14 ຄ່ຳ ຕອນ​ເຊົ້າ​ມື້ 15 ຄ່ຳ ມີ​ພິທີ​ໃສ່​ບາດ ເວລາ 14:00 ໂມງ ແມ່ນ​ພິທີ​ຕີຄີ ແລະ ກາງຄືນ​ມີ​ພິທີ​ວຽນທຽນ ແລະ ຈູດ​ບັ້ງໄຟ​ບູຊາພະ​ທາດຫຼວງ.

    ສຳລັບ​ງານ​ບຸນ​ນະ​ມັດ​ສະການ​ພະ​ທາດຫຼວງ ປະຈຳ​ປີ 2017 ແມ່ນ​ຈັດ​ຂຶ້ນ​ຢ່າງ​ຍິ່ງ​ໃຫຍ່ ເນື່ອງ​ຈາກ​ຕິດ​ພັນ​ກັບ​ເປີດ​ປີ​ທ່ອງທ່ຽວ​ລາວ 2018 ທີ່​ໄດ້​ເປີດ​ຢ່າງເປັນ​ທາງ​ການ ໃນ​ວັນ​ທີ 28 ຕຸລານີ້ ເຊິ່ງ​ພາຍ​ໃນ​ງານ​ບຸນ​ໄດ້​ມີຫຼາຍ​ກິດຈະກຳ​ໃຫ້​ທ່ຽວ​ຊົມ ບໍ່​ວ່າຈະ​ເປັນ​ຮ້ານ​ວາງສະແດງ ຜະລິດຕະ​ພັນ​ທ່ອງ​ທ່ຽວ​ແຕ່​ລະ​ແຂວງທົ່ວ​ປະເທດ ຮ້ານ​ວາງສະແດງຂາຍ​ສິນຄ້າ​ພາຍ​ໃນ ແລະ ຕ່າງປະເທດ ສະແດງ​ສິລະ​ປະ​ກາງແຈ້ງ​ຢູ່​ສະໜາມ​ຫຼວງ ໝູ່​ບ້ານເຮືອນ​ຊົງ​ລາວ ແລະ ອື່ນໆ ທັງ​ນີ້ກໍ່​ເພື່ອ​ເຮັດ​ໃຫ້​ບັນຍາກາດ​ຢູ່​ພາຍໃນ​ບຸນ​ພະ​ທາດຫຼວງ​ປີ​ນີ້ ​ຄຶກຄື້ນ ມ່ວນຊື່ນ ທັງ​ຮັກສາ​ໄດ້​ຮີດຄອງປະເພນີ ແລະ ວັດທະນະທຳ​ອັນ​ດີງາມ​ຂອງ​ຊາດ.

    ສຳລັບບັນດາ​ກິດຈະກຳ​ການ​ເຄື່ອນໄຫວ​ຂອງ​ບຸນ​ນະມັດສະການ​ພະທາດຫຼວງ ປະຈຳ​ປີ 2017 ພາຍຫຼັງ​ທີ່​ມີ​ພິທີ​ເປີດ​ຢ່າງ​ເປັນ​ທາງການ​ໃນ​ວັນ​ທີ 28 ຕຸລາ​ນີ້​ແລ້ວ. ຈະ​ມີ​ກິດ​ຈະກຳ ດັ່ງນີ້:

1. ຢູ່​ວັດ​ສີ​ເມືອງ ວັນ​ອັງຄານ​ຂຶ້ນ 12 ຄ່ຳ ເດືອນ 12 ປີ​ລະກາ ກົງ​ກັບ​ວັນ​ທີ 31 ຕຸລາ 2017 ຕອນ​ເຊົ້າ​ເວລາ 8:00 ໂມງ ພິທີຖວາຍ​ເຄື່ອງ​ສະ​ເວີ​ແດ່​ມະຫາ​ສັກຫຼັກ​ເມືອງ ຕອນ​ແລງ​ເວລາ 16:00 ໂມງ ສູດ​ປະລິ​ຕະ​ມຸງຄຸນ ແລະ ຕອນ​ຄ່ຳ​ເວລາ 20:00 ໂມງ ພິທີ​ວຽນທຽນ​ແຫ່​ຜາສາດເຜີ້ງ ແລະ ຄົບງັນ​ຕາມ​ປະເພນີ.

2. ສ່ວນ​ຢູ່​ພະ​ທາດຫຼວງວັນ​ພຸດ​ຂຶ້ນ 13 ຄ່ຳ ເດືອນ 12 ກົງ​ກັບ​ວັນ​ທີ 1 ພະຈິກ 2017 ຕອນ​ເຊົ້າ​ປະດັບ​ປະດາ​ຕົບແຕ່ງ​ສະຖານທີ່​ພາຍ​ນອກ ແລະ ພາຍ​ໃນ​ກົມ​ມະ​ລຽນ​ພະທາດຫຼວງ ຕອນ​ແລງ​ເວລາ 16:00 ໂມງ ສູດ​ປະລິ​ຕິ​ມຸງຄຸນ​ຢູ່​ທີ່ພະ​ທາດຫຼວງ (ມີ​ການ​ນຳ​ຂັ້ນ​ສູນກາງ ແລະ ຂັ້ນ​ນະຄອນຫຼວງ​ວຽງຈັນ​ເຂົ້າ​ຮ່ວມ) ຕອນ​ຄ່ຳ​ຄົບງັນຕາມ​ປະເພນີ.

3. ວັນ​ພະຫັດ​ຂຶ້ນ 14 ຄ່ຳ ເດືອນ 12 ກົງ​ກັບ​ວັນ​ທີ 2 ພະຈິກ 2017 ເວລາ 13:00 ໂມງ ເຕົ້າໂຮມ​ຜາສາດ​ເຜີ້ງຈາກ 4 ຕົວ​ເມືອງ ແລະ ຂະແໜງການຕ່າງໆ​ຢູ່​ໜ້າ​ວັດ​ໜອງ​ບອນ ເວລາ 13:30 ໂມງ ເຄື່ອນ​ຂະ​ບວນ​ແຫ່ຜາສາດ​ເຜີ້ງ​ເຂົ້າ​ສູ່​ກົມ​ມະ​ລຽນພະ​ທາດຫຼວງ ໂດຍ​ປະກອບ​ດ້ວຍຂະ​ບວນ​ແຫ່​ທັ່ງ​ບັ້ງ ດົນຕີ​ພື້ນເມືອງ ເມື່ອ​ຮອດ​ພະ​ທາດຫຼວງ ແລ້ວ​ແຮ່​ອ້ອມ 3 ຮອບ ຖວາຍ​ຜາສາດ​ເຜີ້ງ ຟັງ​ທຳ​ມະ​ເທສະໜາ 1 ກັນ ແລະ ຄົບງັນ​ຕາມ​ປະເພນີ.

4. ວັນ​ສຸກ​ຂຶ້ນ 15 ຄ່ຳ ເດືອນ 12 ກົງ​ກັບ​ວັນ​ທີ 3 ພະຈິກ 2017 ຕອນ​ເຊົ້າ​ເວລາ 7:00 ໂມງ ພິທີໄຫວ້​ພະ​ຮັບ​ສິນ ຟັງ​ທຳ​ມະ​ເທສະໜາ ຖວາຍ​ສັງຄະ​ທານ ຄາ​ລະວະ​ໃຫ້​ພອນ ຢາດ​ນ້ຳ ໃສ່​ບາດ ແລະ ບິນ​ພະ​ບາດ​ຂອງ​ພະສົງສຳ​ມະ​ເນນ​ຈຳນວນ​ຫຼາຍ​ຮ້ອຍ​ອົງ ທີ່​ມາ​ຈາກ​ທຸກ​ສາລະ​ທິດ​ວັດຕ່າງໆ ເວລາ 12:00 ໂມງ ເຕົ້າໂຮມ​ນັກກີລາ​ຕີຄີ​ຢູ່​ວັດ​ທາດຫຼວງໃຕ້ ເວລາ 12:30 ໂມງ ຄະນະ​ຕີຄີ ໄປ​ອັງ​ເຊີນ​ເອົາ​ລູກ​ຄີ ຢູ່​ຫໍ​ເຈົ້າໄຊ​ຍະ​ເຊດ​ຖາ​ທິ​ຣາດ ເຂົ້າ​ສູ່​ພະທາດຫຼວງ ເພື່ອ​ທຳ​ພິທີກຳ​ແລ້ວແຫ່​ເຂົ້າ​ສູ່​ສະໜາມ ແລະ ດຳເນີນ​ການ​ແຂ່ງຂັນ ເວລາ 19:30 ໂມງ ພິທີ​ວຽນທຽນຈູດ​ທູບ​ທຽນ ບູຊາ​ອ້ອມ​ອົງ​ພະ​ທາດຫຼວງ ຈູດບັ້ງໄຟ​ສັກກາລະ​ບູຊາ​ພະທາດຫຼວງ ແລະ ຄົບງັນ​ຕາມ​ຮີດຄອງປະເພນີ​ ແລະ ​ຈົບພິທີ ຢູ່​ໃນ​ຄ່ຳ​ຄືນ​ມື້ນີ້ ສຳລັບ​ງານ​ບຸນ​ນະມັດສະການ​ພະທາດຫຼວງ ປະຈຳ​ປີ 2017

ຂໍຂອບໃຈ: ນສພ ວຽງຈັນໃໝ່.
ວຽງຈັນວັນໃໝ່ຂ່າວສານທັນສະໄໝເພື່ອຊາວວຽງ

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 92

ຈຳນວນຜູ້ເຂົ້າຊົມວານນີ້ 60

ຈຳນວນຜູ້ເຂົ້າຊົມອາທິດນີ້ 224

ຈຳນວນຜູ້ເຂົ້າຊົມເດືອນນີ້ 988

ຈຳນວນຜູ້ເຂົ້າຊົມທັງໝົດ 27787

Currently are 34 guests and no members online

ແຜນທີ່ນະຄອນຫຼວງວຽງຈັນ