Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

50a170ddbff13c61a69669ac86777a58

     ພິທີ​ສະເຫຼີມສະຫຼອງ​ຜົນສຳເລັດ ​ໂຄງການ​ປະຕິສັງຂອນ​ພະທາດຫຼວງ ຄັ້ງ​ທີ IV ດ້ວຍ​ການ​ສົມໂພດ​ລາພອນ​ປະຕິສັງຂອນ​ພະ​ທາດຫຼວງວຽງ​ຈັນ ແລະ ພະ​ພຸດ​ທະ​ຮູບ​ຄຳ ໄດ້​ຈັດ​ຂຶ້ນ​ຕອນ​ຄ່ຳ​ວັນ​ທີ 27 ຕຸລາ 2017 ທີ່​ເດີ່ນ​ກົມ​ມະ​ລຽນ​ພະ​ທາດຫຼວງ ມີ​ພະ​ເຖລານຸເຖລະ ຈຳນວນ 45 ອົງ ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ທ່ານ ສິນ​ລະວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ບັນດາ​ພັນ​ລະ​ຍາ​ການນຳ​ຂັ້ນ​ສູງ ພ້ອມ​ດ້ວຍ​ການ​ນຳ​ນະຄອນຫຼວງ​ວຽງ​ຈັນ ຄະນະ​ກຳ​ມະການ ແລະ ອະນຸ​ກຳມະການ​ໂຄງການ​ປະຕິສັງຂອນ​ພະ​ທາດຫຼວງ ຄັ້ງທີ IV ຕະຫຼອດ​ຮອດ​ປະຊາຊົນ​ລາວ​ບັນດາເຜົ່າ​ ກໍ່​ຄື​ພຸດ​ທະ​ສາ​ສະ​ນິ​ກະ​ຊົນ ເຂົ້າ​ຮ່ວມ​ຫຼາຍ​ພັນ​ຄົນ.

    ໃນ​ພິທີ​ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ​ໄດ້​ຂຶ້ນ​ລາຍ​ງານ​ຜົນສຳເລັດ​ໂຄງການ​ປະຕິສັງຂອນ​ພະ​ທາດຫຼວງ ຄັ້ງ​ທີ IV ວ່າ: ພາຍຫຼັງ​ທີ່​ມີ​ການ​ປະຕິສັງຂອນ​ພະ​ທາດຫຼວງ ຄັ້ງ​ທີ IV ສຳເລັດ​ໂດຍ​ພື້ນຖານ​ແລ້ວ ພວກ​ເຮົາ​ໄດ້​ພ້ອມ​ກັນ​ສົມໂພດ​ຕາມ​ຮີດຄອງ​ປະ​ເພນີ ເພື່ອ​ເປັນ​ການ​ສະເຫຼີມສະຫຼອງທັງ​ເສກ​ສັນ​ບັນດາ​ກິດຈະກຳ​ທີ່​ໄດ້​ປະຕິ​ສັງ​ຂອນ ຫຼື ສ້າງ​ຂຶ້ນ​ໃໝ່​ໄລຍະ​ການ​ປະຕິສັງຂອນ ຄັ້ງ​ທີ IV ນີ້​ໃຫ້​ກາຍເປັນ​ວັດຖຸ​ທີ່​ມີຄ່າ ເປັນການ​ສົມ​ມາ​ຄາລະວະ​ການ​ລ່ວງເກີນ​ພະ​ທາດຫຼວງ​ທີ່​ສັກສິດ ແລະ ລ້ຳ​ຄ່າ ເຊິ່ງ​ການ​ປະຕິສັງຂອນ ນາຍ​ຊ່າງ ແລະ ກຳມະກອນ​ໄດ້ປີນ​ຂັ້ນໄດ​ຂຶ້ນ​ອົງ​ພະທາດ ໄດ້​ຂຸດເຈາະ​ອົງ​ພະ​ທາດຫຼວງ ແລະ ອື່ນໆ ພ້ອມ​ນັ້ນ​ໄດ້​ສົມໂພດ​ພະຄຳ​ທີ່​ຫຼໍ່​ຂຶ້ນ​ໃໝ່​ທີ່​ມີ​ຊື່ວ່າ: ພະ​ພຸດທະ​ສຸວັນ​ສາ​ທາ​ທຳ​ມິ​ກະ​ຣາດ ໃຫ້ເປັນ​ພະ​ທີ່​ສັກສິດ​ຄູ່​ບ້ານ​ຄູ່​ເມືອງ​ຄູ່ກັບ​ອົງ​ພະ​ທາດຫຼວງ ແລະ ຢູ່​ຄູ່ກັບ​ຊາວ​ລາວ ກໍ່​ຄືຊາວ​ນະຄອນຫຼວງ​ວຽງ​ຈັນ​ຢ່າງ​ກາລະ​ນານ ເຊິ່ງ​ພະ​ດັ່ງກ່າວ​ມີ​ນ້ຳໜັກ 9 ກິ​ໂລ ກວ່າ​ທີ່​ໄດ້​ມາ​ຈາກ​ການ​ປະກອບສ່ວນ​ຂອງ​ຊາວ​ສາ​ສະ​ນິ​ກະ​ຊົນ ​ໃນການ​ປະຕິສັງຂອນ​ປີຜ່ານມາ.

ບັດ​ນີ້​ອົງ​ພະ​ທາດຫຼວງ ​ໄດ້​ປະຕິ​ສັງ​ຂອນ​ດ້ານ​ໂຄງ​ສ້າງ​ສຳເລັດໂດຍ​ພື້ນຖານ ໄດ້​ເປັນ​ສິ່ງ​ເອກອ້າງ​ທະ​ນົງ​ໃຈ ແລະ ມີ​ຄວາມຫວັງ​ຢ່າງ​ແຮງ​ກ້າ ລັດສະໝີ​ແຫ່ງຄວາມ​ສີວິໄລ​ຂອງ​ອົງ​ພະທາດຫຼວງ ຈະ​ເບັ່ງ​ປະກາຍ​ໄປ​ທົ່ວ​ຜືນແຜ່ນດິນ​ລາວ ຈະ​ເປັນ​ແມ່​ແຮງແຫ່ງ​ການ​ເຕົ້າໂຮມ​ຄວາມ​ສາ​ມັກຄີ​ປອງ​ດອງ​ຂອງ​ປວງ​ຊົນ​ລາວ​ທັງຊາດ ແລະ ນຳ​ເອົາ​ຄວາມ​ຈະເລີນ​ວັດທະນາ​ມາ​ໃຫ້​ປະເທດລາວ ກໍ່​ຄືນະຄອນຫຼວງ​ວຽງ​ຈັນຍິ່ງ​ຂຶ້ນ ພວກ​ເຮົາ​ພາວະນາ​ໃຫ້​ອົງພະ​ທາດຫຼວງ​ຈົ່ງ​ສືບຕໍ່​ເປັນ​ມິ່ງຂວັນ​ຂອງ​ປະເທດ​ຊາດ ເປັນ​ແຫຼ່ງອະລິຍະ​ທຳ ເປັນ​ສູນ​ລວມ​ຈິດໃຈ​ຂອງ​ປວງ​ຊົນ​ລາວ ແລະ ເປັນສື່​ສຳພັນ​ຂອງ​ລາວ​ໄປ​ຍັງ​ຍາດ​ມິດສາ​ກົນ.

    ເຖິງ​ວ່າການ​ປະຕິສັງຂອນ​ພະທາດຫຼວງ ຄັ້ງ​ທີ IV ສຳເລັດໂດຍ​ພື້ນຖານ​ແລ້ວ​ກໍ່​ຕາມ​ ແຕ່​ຍັງມີໜ້າ​ວຽກ​ຈຳນວນ​ໜຶ່ງ​ທີ່​ຍັງ​ຄົງຄ້າງ​ທີ່​ຕ້ອງ​ໄດ້​ສືບຕໍ່​ໃຫ້​ສຳເລັດ ເປັນຕົ້ນ​ການ​ຈັດ​ວາງສະແດງຫ້ອງ​ວັດຖຸ​ພັນ​ພາຍ​ໃນ​ກົມ​ມະລຽນ ສືບຕໍ່​ຄວັດ​ລາຍ​ຊື່​ຜູ້​ບໍ​ລິຈາກ​ແຕ່ 20 ລ້ານ​ກີບ​ຂຶ້ນ​ໄປ​ໃສ່ ຫີນ​ສີ​ລາ ຕົບແຕ່ງ​ສະໜາມ​ຫຍ້າ ແລະ ດອກ​ໄມ້​ໃຫ້​ສວຍ​ງາມກວ່າ​ເກົ່າ ປັບປຸງ​ລະບົບ​ປ້ອງ​ກັນ ແລະ ສ້າງ​ນິຕິ​ກຳ​ຄຸ້ມ​ຄອງ​ພະທາດຫຼວງ ສະໜາມ​ຫຼວງ ແລະ ບໍລິເວນ​ອ້ອມ​ຮອບ​ເພື່ອ​ຄວາມເປັນ​ລະບຽບ​ຈົບງາມ​ຕື່ມ​ອີກ ຄາດ​ວ່າ​ຈະ​ສຳເລັດ​ໃນ​ເດືອນ 3 ເພັງ ປີ ​ພສ 2561.

    ພະ​ທາດຫຼວງ​ວຽງ​ຈັນ ພາຍຫຼັງ​ປະຕິສັງຂອນ ຄັ້ງ​ທີ IV ສຳເລັດ​ໄດ້​ເຮັດ​ໃຫ້​ອົງ​ພະ​ທາດຫຼວງ ແລະ ບໍລິເວນ​ອ້ອມ​ຮອບ​ເດີ່ນ​ກົມມະ​ລຽນ​ດ້ານ​ໃນ ແລະ ດ້ານ​ນອກ ໄດ້​ມີ​ຄວາມ​ສວຍ​ສົດ​ງົດ​ງາມ​ຂຶ້ນຕື່ມ ເຊິ່ງ​ຜົນງານ​ດັ່ງກ່າວ​ກໍ່​ຍ້ອນພາຍ​ໃຕ້​ການ​ຊີ້​ນຳ-ນຳພາຂອງພັກ-ລັດຖະບານ ແລະ ການ​ປະກອບ​ສ່ວນ​ສົມທົບ​ທຶນ ບໍ່​ວ່າ​ຈະເປັນ​ເງິນ ຄຳ ແລະ ວັດຖຸ​ມີຄ່າຕ່າງໆ​ຂອງ​ບໍລິສັດ​ຫ້າງ​ຮ້ານ ຫົວໜ່ວຍ​ທຸລະ​ກິດ ກໍ່​ຄືປະຊາຊົນລາວ​ບັນດາເຜົ່າ​ທັງ​ຢູ່​ພາຍ​ໃນ ແລະ ຕ່າງປະເທດ ເຊິ່ງ​ຜູ້​ສະໜັບສະ​ໜູນ​ຫຼັກ​ພິທີ​ສົມໂພດ​ຄັ້ງ​ນີ້ ແມ່ນ​ບໍລິສັດ ເພັດ​ບັນດິດ​ກໍ່ສ້າງ ຈຳກັດ.

ຂອບໃຈຂໍ້ມູນຈາກ: ໜັງສືພີມວຽງຈັນໃໝ່

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 27

ຈຳນວນຜູ້ເຂົ້າຊົມວານນີ້ 55

ຈຳນວນຜູ້ເຂົ້າຊົມອາທິດນີ້ 151

ຈຳນວນຜູ້ເຂົ້າຊົມເດືອນນີ້ 677

ຈຳນວນຜູ້ເຂົ້າຊົມທັງໝົດ 30179

Currently are 193 guests and no members online

ແຜນທີ່ນະຄອນຫຼວງວຽງຈັນ