Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

14601004 333483620333504 5864822381551024868 n

ໃນມື້ຂຶ້ນ 1 ຄໍ່າເດືອນ 11 ຖືເປັນມື້ງາມຍາມດີ ວັນແຫ່ງຄວາມສາມັກຄີຂອງປວງຊົນລາວບັນດາເຜົ່າ ໂດຍພະເຖລານຸເຖລະ ແລະ ການນໍາພັກ-ລັດ ໄດ້ເຕົ້າໂຮມເອົາວັດຖຸປັດໄຈທີ່ມວນຊົນລາວນ້ອມຖວາຍໃຫ້ເປັນກຸສົນແກ່ການປະຕິສັງຂອນ ພິພິທະພັນພະທາດຫຼວງວຽງຈັນ ຄັ້ງທີ IV ເຊິ່ງວາລະສໍາຄັນກໍແມ່ນພິທີຫຼອມຄໍາໂອບຍອດອົງພະທາດ ໂດຍພະເຖລານຸເຖລະ ໄດ້ດໍາເນີນພິທີທີ່ເປັນມຸງຄຸນຍິ່ງໃນວັນທີ 02 ຕຸລາ 2016 ເຊິ່ງກົງກັບມື້ຂຶ້ນ 1 ຄໍ່າ ເດືອນ 11 ພສ 2559 ຢູ່ທີ່ພະທາດຫຼວງ ເມືອງໄຊເຊດຖາ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມນໍາພາພິທີຫຼອມຄໍາ ໂດຍທ່ານ ທອງລຸນ ສີສຸລິດ ກໍາມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ.ລາວ ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ເລຂາຄະນະບໍລິຫານງານພັກ ເຈົ້າຄອງນະຄອນຫຼວງວຽງຈັນ ປະທານຄະນະຮັບຜິດຊອບລະດັບຊາດເພື່ອປະຕິສັງຂອນ ພິພິທະພັນພະທາດຫຼວງ ຄັ້ງທີ IV ມີການນໍາພັກ-ລັດ ຄອບຄົວການນໍາຂັ້ນສູງ ຜູ້ຊົງຄຸນວຸດທິ ບັນດາແຂກຖືກເຊີນ ພ້ອມດ້ວຍປະຊາຊົນຊາວນະຄອນຫຼວງວຽງຈັນ ໂຮມທັງພໍ່ແມ່ພີ່ນ້ອງທີ່ມາຈາກບັນດາແຂວງອ້ອມຂ້າງເຂົ້າຮ່ວມຢ່າງຫຼວງຫຼາຍ.

ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ຮອງປະທານຄະນະກໍາມະການປະຕິສັງຂອນພິພິທະພັນພະທາດຫຼວງ ໃຫ້ຮູ້ວ່າ ການປະຕິສັງຂອນພິພິທະພັນພະທາດຫຼວງ ໃນຄັ້ງທີ IV ນີ້ ແມ່ນໄດ້ເລີ່ມດຳເນີນແຕ່ປີ 2008 ໃນໂອກາດກະກຽມສະເຫຼີມສະຫຼອງວັນວຽງຈັນເປັນນະຄອນຫຼວງ ຄົບຮອບ 450 ປີເປັນຕົ້ນມາ ແລະ ໄດ້ສຳເລັດການບູລະນະ ປັບປຸງກົມມະລຽນ ຍົກລະດັບເດີ່ນພະທາດຫຼວງ ຍົກລະດັບສະໜາມຫຼວງແຫ່ງຊາດ ສ້າງສວນເຈົ້າໄຊເຊດຖາ ປັບປຸງໜອງສະພັງເລັນ ກໍ່ສ້າງອະນຸສາວະລີນິລະນາມ ແລະ ອື່ນໆ ໂຮມເປັນມູນຄ່າຫຼາຍກ່ວານຶ່ງຮ້ອຍຕື້ກີບ ມາຮອດປັດຈຸບັນແມ່ນໄດ້ປະຕິສັງຂອນພະທາດຫຼວງ ສະເພາະເນື້ອທີ່ຂອງເດີ່ນພະທາດຫຼວງ ມີປະມານ 39.817 ຕາແມັດ.

ສຳລັບການປະຕິສັງຂອນໃນຄັ້ງນີ້ ແມ່ນເປັນການສືບຕໍ່ໂຄງການ ໂດຍຈະໄດ້ປັບປຸງ ບູລະນະ 8 ກິດຈະການ ເຊັ່ນ ໂອບຄໍາຈອມພະທາດ ໂບກຮອຍແຕກແຫງອົງພະທາດ ແລະ ຫໍໄຫວ້ທັງສີ່ເບື້ອງ ທາສີຄຳອົງພະທາດໃຫຽ່-ທາດນ້ອຍສາມສິບລູກ – ພະທາດທຳມະສີຫາຍໂສກ ແລະ ຫໍກວມ ບູລະນະຫຼັງຄາກົມມະລຽນຄືນໃໝ່ ສ້ອມແປງຊຸ້ມປະຕູໃຫຽ່ທັງສີ່ເບື້ອງ ປັບປຸງພື້ນ ແລະ ລະບົບລະບຽງ ປັບປຸງຮ່ອງນໍ້າອ້ອມຂ້າງ ແລະ ປັບປຸງລະບົບໄຟຟ້າ ເຊິ່ງໂຮມມູນຄ່າການກໍ່ສ້າງໃນຄັ້ງນີ້ປະມານ 15 ຕື້ກວ່າກີບ ປັດຈຸບັນ ການດຳເນີນໂຄງການໃນພາກປະຕິບັດໂຕຈິງ ແມ່ນໄດ້ສຳເລັດການຕັ້ງນັ່ງຮ້ານແລ້ວ 100% ອະນາໄມ 80% ປາດຮອຍແຕກ ແລະ ໂປ້ແຕ່ງໄດ້ 15% ສ່ວນແຜນວຽກຕໍ່ໄປ ແມ່ນຈະສືບຕໍ່ດໍາເນີນໜ້າວຽກຕ່າງໆໃຫ້ສຳເລັດຕາມແຜນການທີ່ວາງໄວ້.

ເມື່ອສໍາເລັດໂຄງການປະຕິສັງຂອນໃນຄັ້ງນີ້ແລ້ວ ກໍຈະເປັນການສ້າງຄຸນຄ່າໃຫ້ແກ່ມໍລະດົກທາງດ້ານວັດທະນະທຳ ແລະ ປະຫວັດສາດ ເຊິ່ງແມ່ນສະຖາປະຕິມາກຳຊິ້ນເອກຂອງຊາດທີ່ໄດ້ຮັບການບູລະນະສ້ອມແປງ ປົກປັກຮັກສາອົງພະທາດຫຼວງ ແລະ ກິດຈະການອ້ອມຂ້າງໃຫ້ມີຄວາມຍືນຍົງຕະຫຼອດໄປໃນພາຍພາກໜ້າ ພ້ອມດຽວກັນນັ້ນກໍເພື່ອເປັນການສະເຫຼີມສະຫຼອງການກໍ່ສ້າງອົງພະທາດຫຼວງ ຄົບຮອບ 450 ປີ (ຄສ 1566-ຄສ 2016) ເຊິ່ງຈະຈັດຂຶ້ນໃນລະຫວ່າງວັນທີ 12-14 ທັນວາ 2016 ນີ້ຢ່າງຄຶກຄື້ນ ໂດຍໃນງານນີ້ພວກເຮົາຈະຈັດຢ່າງຍິ່ງໃຫຽ່ອະລັງການ ແລະ ມີສີສັນວັດທະນະທຳທີ່ງົດງາມ ສ່ວນດ້ານທຶນຮອນໃນການປະຕິສັງຂອນຜ່ານມາ ໄດ້ມີການຊ່ອຍເຫຼືອຂອງຕ່າງປະເທດ ການລົງທືນຂອງພາກລັດ ພາກເອກະຊົນ ແລະ ການປະກອບສ່ວນຂອງຊາວນະຄອນຫຼວງວຽງຈັນ ທັງນີ້ເນື່ອງຈາກຍັງມີຫຼາຍກິດຈະກໍາທີ່ຈະດໍາເນີນໃຫ້ສໍາເລັດ ຈິ່ງຂໍເພິ່ງສັດທາທີ່ບໍລິສຸດໃຈເປັນ ວັດຖຸ ເງິນ ຄຳ ຂອງປະຊາຊົນລາວ ທັງຢູ່ພາຍໃນ ແລະ ຕ່າງປະເທດ ໂດຍສະພາະຊາວນະຄອນຫຼວງວຽງຈັນ ໂຮມທັງຍາດມິດຕ່າງປະເທດເຂົ້າໃນການປະຕິສັງຂອນ ເຊິ່ງຄວາມຮຽກຮ້ອງຕ້ອງການທຶນທັງໝົດແມ່ນ 15 ຕື້ກວ່າກີບ ໂດຍການໂມທະນາບໍລິຈາກ ມາເຖິງປັດຈຸບັນໄດ້ມີເຈົ້າສັດທາທັງຫຼາຍປະກອບສ່ວນໄປແລ້ວເປັນ ຄໍາ ຈໍານວນ 11 ກິໂລກຣາມ 24 ບາດ 3 ສະຫຼຶງ 5 ຫຸນ ເປັນເງິນກີບຈຳນວນ 167.750.000 ກີບ ເງິນບາດ 2.052.940 ບາດ ເງີນໂດລາ 345 ໂດລາ ເງິນຢວນ 500 ຢວນ ແຕ່ຍັງບໍ່ທັນພຽງພໍກັບຄວາມຕ້ອງການເທື່ອ ຈິ່ງຮຽກຮ້ອງ ແລະ ເຊີນຊວນຊາວສາສະໜິກະຊົນ ທ່ານຜູ້ໃຈບຸນທັງຫຼາຍ ປະຊາຊົນລາວທຸກຖ້ວນໜ້າ ຈົ່ງພ້ອມພຽງຮຽງໜ້າກັນມາບໍລິຈາກວັດຖຸປັດໄຈດ້ວຍຄວາມເຫຼື້ອມໃສຂອງຕົນເອງເຂົ້າໃນການບູລະນະປະຕິສັງຂອນຄັ້ງນີ້ດ້ວຍ ໂດຍຄະນະກໍາມະການຮັບຜິດຊອບ ຈະໄດ້ບັນທຶກຈົດຈຳຄຸນງາມຄວາມດີຂອງທ່ານໄວ້ໃນສີລາຈາລຶກ ປື້ມບັນທຶກຄຳ ບັນທຶກເງິນ ຂອງພິພິທະພັນພະທາດຫຼວງ ແລະ ສະເໜີລັດຖະບານຍ້ອງຍໍຕາມລະບຽບການຕໍ່ໄປ.

ພາບ: The.jack
ຂ່າວ: ເທບພະວົງ
ໂດຍ: vtetoday.la

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 26

ຈຳນວນຜູ້ເຂົ້າຊົມວານນີ້ 41

ຈຳນວນຜູ້ເຂົ້າຊົມອາທິດນີ້ 26

ຈຳນວນຜູ້ເຂົ້າຊົມເດືອນນີ້ 823

ຈຳນວນຜູ້ເຂົ້າຊົມທັງໝົດ 48683

Currently are 14 guests and no members online

ແຜນທີ່ນະຄອນຫຼວງວຽງຈັນ