92684758 1132592877095912 2742988384078135296

ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ໄດ້​ຖະ­ແຫຼງ​ຂ່າວ​ວັນ​ທີ 10 ເມ­ສາ 2020 ທີ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ (ນວ) ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ມາດ​ຕະ­ການ​ໂຕ້​ຕອບ ການ​ແຜ່​ລະ­ບາດ​ເຊື້ອ​ພະ­ຍາດ​ອັກ­ເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່ (COVID-19) ວ່າ:

    ເພື່ອ​ແກ້​ໄຂ​ຈຸດ​ອ່ອນ ແລະ ຂໍ້­ຄົງ­ຄ້າງ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ມາດ​ຕະ­ການ​ຄຳ​ສັ່ງ​ເລກ​ທີ 06/ນຍ ຄຳ​ສັ່ງ​ເລກ​ທີ 07/ຄລສພ ຂອງ​ຄະ­ນະ​ເລ­ຂາ­ທິ­ການ​ສູນ​ກາງ​ພັກ ກໍ​ຄື​ຄຳ​ແນະ­ນຳ​ຕ່າງໆ​ຂອງ​ຂະ­ແໜງ­ການ​ກ່ຽວ­ຂ້ອງ ໃນ​ການ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະ­ບາດ​ເຊື້ອ​ພະ­ຍາດ COVID-19 ດັ່ງ­ນັ້ນ ພວກ​ເຮົາ​ໄດ້​ວາງ​ມາດ​ຕະ​ການ­ຈັດ­ຕັ້ງ​ປະ­ຕິ­ບັດ ຕາມ​ການ​ຊີ້​ນຳ​ຂອງ​ກອງ​ປະ­ຊຸມ​ຄະ­ນະ​ສະ­ເພາະ​ກິດ​ຂັ້ນ ນວ ໄດ້​ຈັດ​ຕັ້ງ​ກອງ​ປະ­ຊຸມ​ຖອດ​ຖອນ​ບົດ­ຮຽນ ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ດັ່ງ­ກ່າວ ໂດຍ​ຜັນ​ຂະ­ຫຍາຍ​ອອກ​ບົດ​ແນະ­ນຳ​ຂອງ ນວ ໃຫ້​ເປັນ​ອັນ​ລະ­ອຽດ​ຄື:

    1) ຫ້າມ​ບໍ່​ໃຫ້​ປະ­ຊາ­ຊົນ​ອອກ​ຈາກ​ເຮືອນ-ທີ່​ພັກ​ອາ­ໄສ​ຂອງ​ຕົນ​ເອງ ໃນ​ຂໍ້ 3 ຂອງ​ຄຳ​ສັ່ງ​ເລກ​ທີ 06/ນຍ ຖ້າ​ຈຳ­ເປັນ​ແທ້ໆ ກໍ​ອອກ­ເຮືອນ​ໄດ້​ເຊັ່ນ: ໄປ​ໂຮງ­ໝໍ ໄປ​ຕະ­ຫຼາດ ຊື້​ເຄື່ອງ­ໃຊ້ ແຕ່​ໃຫ້​ແບ່ງ​ກັນ​ໄປ ຄອບ­ຄົວ​ໜຶ່ງ​ສາ­ມາດ​ອອກ­ເຮືອນ 1-2 ຄົນ.

    2) ວິ­ທີ​ຈັດ​ຕັ້ງ​ປະ­ຕິ­ບັດ ບ້ານ ແລະ ປກສ ບ້ານ ເຮັດ​ສັນ­ຍາ​ກັບ​ແຕ່​ລະ​ຄົວ​ເຮືອນ ອອກ​ໜັງ­ສື​ຢັ້ງ­ຢືນ​ໃຫ້​ປະ­ຊາ­ຊົນ​ຢູ່​ພາຍ​ໃນ​ບ້ານ​ຂອງ​ຕົນ ຍົກ­ເວັ້ນ​ຜູ້​ທີ່​ໄປ​ປະ­ຕິ­ບັດ​ໜ້າ­ທີ່ ກຳ­ລັງ​ປະ­ກອບ​ອາ­ວຸດ ປະ­ຈຳ­ການ​ຢູ່​ສຳ­ນັກ­ງານ ແມ່ນ​ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ເປັນ​ຜູ້​ອອກ​ບັດ​ໃຫ້ ສຳ­ລັບ​ຜູ້​ທີ່​ໄປ​ເຮັດ​ການ​ຜະ­ລິດ​ກະ­ສິ­ກຳ ການ​ປູກ-ການ​ລ້ຽງ ແຕ່​ບໍ່​ໃຫ້​ເກີນ 10 ຄົນ.

    3) ຫ້າມ​ບຸກ­ຄົນ​ເດີນ­ທາງ​ໄປ​ທ້ອງ­ຖິ່ນ​ອື່ນ ເຂດ​ທີ່​ມີ​ການ​ຕິດ­ເຊື້ອ ຫຼື​ເຂດ​ທີ່​ມີ​ຄວາມ​ສ່ຽງ ຍົກ­ເວັ້ນ​ຜູ້​ທີ່​ໄດ້​ຮັບ​ອະ­ນຸ­ຍາດ​ຈາກ​ອົງ­ການ​ປົກ­ຄອງ​ທ້ອງ­ຖິ່ນ ໃນ​ຂໍ້ 4 ຂອງ​ຄຳ​ສັ່ງ 06/ນຍ ແມ່ນ​ໃຫ້​ຕັ້ງ​ດ່ານ​ເພື່ອ​ກວດ​ສຸ­ຂະ­ພາບ ກວດ​ເຫັນ​ໃຜ​ເປັນ­ໄຂ້ ໃຫ້​ສົ່ງ​ໄປ​ໂຮງ­ໝໍ ບໍ່​ໃຫ້​ເຂົ້າ​ມາ ນວ ໃນ​ດ່ານ​ກວດ​ສຸ­ຂະ­ພາບ ໃຫ້​ມີ​ປ້າຍ​ຊີ້​ບອກ​ການ​ກວດ​ເຊື້ອ​ພະ­ຍາດ ກວດ­ກາ​ຕ້ອງ​ສຸມ​ໃສ່​ກວດ​ລົດ​ທີ່​ສາ­ມາດ​ບັນ­ຈຸ​ຫຼາຍ​ຄົນ ສຳ­ລັບ​ບ້ານ​ທີ່​ມີ​ຄົນ​ຕິດ­ເຊື້ອ​ຕ້ອງ​ໄດ້​ປິດ ແນ­ໃສ່​ປິດ​ຄອບ­ຄົວ​ທີ່​ຕິດ­ເຊື້ອ ຄອບ­ຄົວ​ໃກ້​ຄຽງ ແຕ່​ໃຫ້​ກຳ­ນົດ​ວົງ​ລັດ­ສະ­ໝີ​ທີ່​ຈະ​ຈຳ­ກັດ ໂດຍ​ໃຫ້​ຕັ້ງ​ປ້າຍ​ກຳ­ນົດ​ຈຸດ​ຄັກ­ແນ່ ມີ​ການ​ປ້ອງ​ກັນ​ເວນ­ຍາມ ອະ­ນຸ­ຍາດ​ຄອບ­ຄົວ​ໜຶ່ງ​ສາ­ມາດ​ອອກ​ໄປ​ຊື້​ເຄື່ອງ­ໃຊ້​ຈຳ­ເປັນ ແລະ ອາ­ຫານ​ກິນ​ໄດ້​ແຕ່ 1 ຄົນ​ຕໍ່​ມື້ ແລະ ຕ້ອງ​ໃສ່­ເຄື່ອງ​ປ້ອງ​ກັນ​ຕົວ​ເອງ.

    4) ຫ້າມ​ຈັດ​ກິດ­ຈະ­ກຳ​ປະ­ຊຸມ ຫຼື​ໂຮມ​ຊຸມ­ນຸມ​ຕ່າງໆ ມີ​ຜູ້​ເຂົ້າ​ຮ່ວມ​ຫຼາຍ​ກວ່າ 10 ຄົນ ໃນ​ຂໍ້ 7 ຂອງ​ຄຳ​ສັ່ງ​ເລກ​ທີ 06/ນຍ ແມ່ນ​ນັບ​ແຕ່​ວັນ​ທີ 10-19 ເມ­ສາ 2020 ບໍ່​ໃຫ້​ຈັດ​ກິດ­ຈະ­ກຳ​ຫຍັງ ງົດ​ການ​ຈັດ​ງານ​ປະ­ເພ­ນີ​ຫົດ­ສົງ​ພະ​ປີ​ໃໝ່​ລາວ ຕາມ​ແຈ້ງ​ການ​ເລກ​ທີ 175/ອພສ ລົງ​ວັນ​ທີ 7 ເມ­ສາ 2020 ບໍ່​ໃຫ້​ຫຼິ້ນ​ການ​ພະ­ນັນ​ທຸກ​ປະ­ເພດ ທັງ​ໃນ​ເຮືອນ​ດີ ເຮືອນ​ກຳ ຫຼື​ນັ່ງ​ໃກ້​ກັນ ໄປ​ສົ່ງ­ສະ­ການ​ກໍ​ໃຫ້​ຍ່າງ ຫຼື​ຢູ່​ໄກ​ກັນ 2 ແມັດ.

    5) ສືບ­ຕໍ່​ປິດ​ດ່ານ​ປະ­ເພ­ນີ ແລະ ດ່ານ​ທ້ອງ­ຖິ່ນ ສຳ­ລັບ​ດ່ານ​ສາ­ກົນ​ຫ້າມ​ບຸກ­ຄົນ​ເຂົ້າ-ອອກ​ເດັດ­ຂາດ ອະ­ນຸ­ຍາດ​ໃຫ້​ແຕ່​ຂົນ­ສົ່ງ​ສິນ­ຄ້າ​ໃນ​ຂໍ້ 8 ຂອງ​ຄຳ​ສັ່ງ 06/ນຍ.

    6) ໃຫ້​ສືບ­ຕໍ່​ປິດ​ກິດ​ຈະ​ການ­ບັນ­ເທິງ ຮ້ານ​ຄາ​ຣາ​ໂອ​ເກະ ຮ້ານ​ອົບ​ນວດ ສາ­ລາ​ເບຍ ໃນ​ຂໍ້ 9 ຂອງ​ຄຳ​ສັ່ງ 06/ນຍ ສະ­ເພາະ​ຮ້ານ​ອາ­ຫານ ຮ້ານ​ເຝີ-ຮ້ານ​ໝີ່ ໃຫ້​ເປີດ​ຂາຍ​ໄດ້ ແຕ່​ໃຫ້​ຊື້​ໄປ​ກິນ​ຢູ່​ເຮືອນ ແລະ ຫ້າມ​ນັ່ງ​ກິນ​ຊຸມ​ແຊວ 3 ຄົນ​ຂຶ້ນ​ໄປ.

    7) ສືບ­ຕໍ່​ກິດ­ຈະ­ການ​ຕະ­ຫຼາດ​ກະ­ສິ­ກຳ ຮ້ານ​ຂາຍ­ເຄື່ອງ ຮ້ານ​ຄ້າ (ຊຸບ​ເປີ​ມາກ​ເກັດ) ໃນ​ຂໍ້ 10 ຂອງ​ຄຳ​ສັ່ງ 06/ນຍ ແຕ່​ໃຫ້​ອອກ​ລະ­ບຽບ​ການ​ຊື້-ຂາຍ ເປັນ­ຕົ້ນ ລະ­ຫວ່າງ​ຜູ້​ຂາຍ-ຜູ້​ຊື້​ໃຫ້​ຫ່າງ​ກັນ 2 ແມັດ ມີ​ເຄື່ອງ​ປ້ອງ​ກັນ​ຕົນ​ເອງ ບໍ່​ໃຫ້​ຫຸ້ມ​ກັນ ສຳ­ລັບ​ໜ່ວຍ​ກວດ­ກາ​ແມ່ນ​ມອບ​ໃຫ້ ປກສ ໄປ​ປະ­ຈຳ​ແຕ່​ລະ​ຈຸດ.

 

ໜັງສືພິມວຽງຈັນໃໝ່

ຄົ້ນຫາ

ປະຕິທິນ

May 2021
S M T W T F S
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 37

ຈຳນວນຜູ້ເຂົ້າຊົມວານນີ້ 54

ຈຳນວນຜູ້ເຂົ້າຊົມອາທິດນີ້ 176

ຈຳນວນຜູ້ເຂົ້າຊົມເດືອນນີ້ 216

ຈຳນວນຜູ້ເຂົ້າຊົມທັງໝົດ 79925

Currently are 10 guests and no members online