50b690187a4d5799c188bae8b5f9d54a

     ໂຄງ­ການ​ທາງ​ດ່ວນ ນະ­ຄອນ­ຫຼວງ​ວຽງ​ຈັນ ໝາຍ​ເລກ 1 ຈະ​ເລີ່ມ​ລົງ­ມື​ກໍ່­ສ້າງ​ນັບ​ແຕ່​ມື້­ນີ້ພາຍ­ຫຼັງ​ທີ່​ໄດ້​ຈັດ​ພິ­ທີ​ວາງ​ສີ​ລາ​ລຶກ ວັນ​ທີ 20 ກຸມ­ພາ 2020 ທີ່​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງຄາດ​ວ່າ​ໂຄງ­ການ​ດັ່ງ­ກ່າວ​ຈະ​ໃຫ້​ສຳ­ເລັດ​ພາຍ​ໃນ 24 ເດືອນຄະ­ນະ​ທີ່​ການ​ຊົດ​ເຊີຍ​ທາງ​ບໍ­ລິ­ສັດ​ຈະ​ໃຫ້​ສຳ­ເລັດ​ອີກ 1 ເດືອນ​ຕໍ່­ໜ້າ.

    ທ່ານ ພູ​ຂົງ ບັນ­ນະ​ວົງ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນຜູ້​ຊີ້​ນຳ​ຂົງ­ເຂດ​ແຜນ­ການ ການ​ລົງ­ທຶນ-ພັດ­ທະ­ນາ​ຕົວ​ເມືອງກ່າວ​ໃນ​ພິ­ທີ​ດັ່ງ­ກ່າວ​ວ່າ: ໂຄງ­ການ​ທາງ​ດ່ວນ​ນະ­ຄອນ­ຫຼວງ​ວຽງ​ຈັນໝາຍ​ເລກ 1 ເປັນ​ໂຄງ­ການ​ຍຸດ​ທະ​ສາດ​ທີ່​ສຳ­ຄັນ​ຂອງ​ນະ­ຄອນ­ຫຼວງ​ວຽງ​ຈັນແນ­ໃສ່​ເພື່ອ​ແກ້​ໄຂ​ລົດ​ຕິດ ແລະເປັນ​ທາງ​ເລືອກ​ໃຫ້​ແກ່​ປະ­ຊາ­ຊົນ​ທີ່​ຈະ​ເດີນ­ທາງ​ໄປ​ຜ່ານ​ຖະ­ໜົນ​ໄກ­ສອນພົມ­ວິ­ຫານ ໄປ​ຫາ​ເຂດ​ໃຕ້ ແລະ ບໍ­ລິ­ເວນ​ອ້ອມ​ຮອບເພື່ອ​ໃຊ້​ເປັນ​ເສັ້ນ­ທາງ​ສຸກ​ເສີນ ຫຼື​ເວ­ລາ​ຮີບ​ດ່ວນທັງ​ເພື່ອ​ເປັນ​ການ​ພັດ­ທະ­ນາ​ລະ­ບົບ​ການ​ຂົນ­ສົ່ງ​ພາຍ​ໃນ​ນະ­ຄອນ­ຫຼວງໂດຍ​ສະ­ເພາະ ແມ່ນ​ການ​ເຊື່ອມ​ຕໍ່​ເຂົ້າ​ສູ່​ສະ­ໜາມ­ກິ­ລາ​ຊີ­ເກມສູນ​ກາງ​ສຳ­ນັກ­ງານ​ລັດ ທີ່­ຢູ່​ເຂດ​ເມືອງ​ໄຊ​ທາ­ນີ ເຂດ​ອຸດ­ສາ­ຫະ­ກຳ ຫຼັກ 21 ກໍ​ຄື ເພື່ອ​ອຳ­ນວຍ​ຄວາມ​ສະ­ດວກ ໃນ​ການ​ສັນ­ຈອນ​ໃຫ້​ແກ່​ປະ­ຊາ­ຊົນ ແລະນຳ​ການ​ພັດ­ທະ­ນາ​ໄປ​ສູ່​ເຂດ​ເທ­ສະ​ບານ​ເມືອງ​ໃນ​ອະ­ນາ­ຄົດ.

    ໂຄງ­ການ​ທາງ​ດ່ວນ ນະ­ຄອນ­ຫຼວງ​ວຽງ​ຈັນ ໝາຍ​ເລກ 1 ເປັນ​ການ​ລົງ­ທຶນ​ຂອງ​ເອ­ກະ​ຊົນ 100% ໃນ​ຮູບ​ແບບ BOT ອາ­ຍຸ​ສຳ​ປະ­ທານ 50 ປີມີ​ມູນ​ຄ່າ​ການ​ລົງ­ທຶນ ປະ­ມານ 200 ລ້ານ​ໂດ​ລາ ປະ­ມານ 1.778 ຕື້​ກີບ (ໃນ​ນີ້ ລວມ​ມີ­ຄ່າ​ຊົດ​ເຊີຍ ແລະ ທົດ​ແທນ​ມູນ​ຄ່າ​ເສຍ​ຫາຍໃຫ້​ຜູ້​ຖື​ສິດ​ນຳ​ໃຊ້ ແລະ ສິດ​ໃຊ້​ທີ່​ດິນທີ່​ຖືກ​ໂຄງ­ການ​ກວມ​ເອົາ​ປະ­ມານ 50 ລ້ານ​ໂດ​ລາ​ສະ­ຫະ­ລັດ).

    ໂຄງ­ການ​ທາງ​ດ່ວນ​ດັ່ງ­ກ່າວ ມີ​ຄວາມ​ຍາວ 15,30 ກິ­ໂລ­ແມັດ (ຂົວ​ລອຍ 3,95 ກິ­ໂລ­ແມັດ ທາງ​ດິນ 11,35 ກິ­ໂລ­ແມັດ) ກວ້າງ 54 ແມັດ (ຈຸດ​ກວ້າງ​ສຸດ​ແມ່ນ​ສະ­ຖາ­ນີ​ເກັບ​ເງິນ 100 ແມັດ) ສະ­ເພາະ​ໜ້າ​ທາງ​ກວ້າງ 23,6 ແມັດ ແລະ ເຂດ​ສະ­ຫງວນ 2 ເບື້ອງ ເບື້ອງ​ລະ 15,2 ແມັດ (ລວມ 30,4 ແມັດ)ປະ­ກອບ​ມີ 4 ເລນ ກວ້າງ​ເລນ​ລະ 3,6 ແມັດ ມີ​ໄຟ​ເຍືອງ​ທາງປ້າຍ​ຈະ­ລາ­ຈອນ​ຕ່າງໆ ແຄມ​ທາງ​ເປັນ​ເຂດ​ປູກ​ຫຍ້າ ແລະ ຕົ້ນ­ໄມ້​ປະ­ດັບ​ປະ­ດາແລະ ປ້າຍ​ໂຄ­ສະ­ນາ ທາງ​ດ່ວນ​ສາ­ມາດ​ຮອງ​ຮັບ​ລົດ​ໄດ້​ສູງ​ສຸດ 75.000 ຄັນຕໍ່​ມື້ ເປັນ​ມາດ­ຕະ­ຖານ​ທາງ​ດ່ວນ​ອາ​ຊຽນ ປະ­ເພດ 1 ປູ​ດ້ວຍ​ຄອນ​ກີດ ແລະ ຢາງມີ​ດ່ານ​ເກັບ​ເງິນ 2 ດ່ານ (ດ່ານ​ທີ 1 ຢູ່​ຮ່ອງ​ສຸ­ພາບ ກ່ອນ​ເຖິງ​ຖະ­ໜົນ 450 ປີ ດ່ານ​ທີ 2 ຢູ່​ທາງ​ເຂົ້າ-ອອກ​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ)ມີ​ທາງ​ຂຶ້ນ-ລົງ 8 ຈຸດ ຄື: 1. ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ (ຈຸດ​ເລີ່ມ​ຕົ້ນ) 2. ບ້ານ​ໂນນ​ສະ­ຫວ່າງ 3. ເມືອງ​ດອກ​ຈຳ­ປາ (ບ້ານ​ໂພນ​ພະ​ເນົາ ສູ່​ຖະ­ໜົນ​ໄກ­ສອນ) 4. ຕະ­ຫຼາດ​ອານ​ຈີ (ບ້ານ​ໜອງ​ໜ່ຽງ) 5. ຖະ­ໜົນ 450 ປີ (ບ້ານ​ໂຊກ​ໃຫຍ່-ນາ​ແຄ) 6. ບ້ານ​ໄຊ ຈຸດ​ຕັດ​ກັບ​ທາງ​ລົດ­ໄຟ 7. ຖະ­ໜົນ 13 ໃຕ້ (ບ້ານ​ໄຊ​ສະ­ຫວ່າງ) ແລະ 8. ບໍ­ລິ­ເວນ​ດົງ​ໝາກ­ຄາຍ (ຈຸດ​ສິ້ນ​ສຸດ).

    ສ່ວນ​ການ​ຊົດ​ເຊີຍ​ໃຫ້​ກັບ​ປະ­ຊາ­ຊົນ​ໃນ​ເຂດ​ສອງ​ເມືອງທີ່​ກວມ​ເອົາ​ເຖິງ 16 ບ້ານ​ນັ້ນ ທ່ານ ພຶດ­ສະ­ພາ ພູມ​ມະ​ສັກປະ­ທານ​ບໍ­ລິ­ສັດ​ທາງ​ດ່ວນ ນະ­ຄອນ­ຫຼວງ​ວຽງ​ຈັນ ໝາຍ​ເລກ 1 ຈຳ­ກັດ​ຜູ້​ດຽວກ່າວ​ວ່າ:ສຳ­ລັບ​ການ​ຊົດ​ເຊີຍ​ໃຫ້​ກັບ​ປະ­ຊາ­ຊົນ​ທີ່​ໄດ້​ຮັບ​ຕໍ່​ເນື່ອງ​ແມ່ນ​ເປັນ​ມູນ​ຄ່າ​ສູງ​ສົມ­ຄວນແຕ່​ກໍ​ຍ້ອນ​ຄວາມ​ຕັດ­ສິນ​ໃຈ​ສູງ​ຂອງ​ບໍ­ລິ­ສັດ​ເຮັດ​ໃຫ້​ຜົນ​ການ­ຈັດ­ຕັ້ງ​ປະ­ຕິ­ບັດ​ການ​ຊົດ​ເຊີຍ​ມີ​ຄວາມ​ຄືບ​ໜ້າ​ຫຼາຍ​ກວ່າ 70% ຄາດ​ວ່າ​ໃນ​ອະ­ນາ­ຄົດ​ອັນ​ໃກ້​ນີ້​ທາງ​ບໍ­ລິ­ສັດ​ຈະ​ໄດ້​ສືບ­ຕໍ່​ຊົດ​ເຊີຍ​ໃຫ້​ກັບ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ​ຈາກ​ໂຄງ­ການ​ໃຫ້​ໄດ້ 100% ສຳ­ລັບ​ການ​ກໍ່­ສ້າງ​ແມ່ນ​ຈະ​ໄດ້​ເລີ່ມ​ລົງ­ມື​ນັບ​ແຕ່​ມື້​ວາງ​ສີ​ລາ​ລຶກ​ເປັນ­ຕົ້ນ​ໄປຄາດ​ວ່າ​ຈະ​ສຳ­ເລັດ​ພາຍ​ໃນ 24 ເດືອນ ພິ­ເສດເພື່ອ​ເປັນ​ຜົນ­ງານ​ໃຫ້​ກັບ​ພັກ-ລັດ ເພື່ອ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ຄັ້ງ​ທີ XI ຂອງ​ພັກທາງ​ບໍ­ລິ­ສັດ​ຈະ​ໄດ້​ສຸມ​ໃສ່​ໃຫ້​ສຳ­ເລັດ​ໄລ­ຍະ​ບຶງ​ທາດ­ຫຼວງ ຫາ​ຖະ­ໜົນ 450 ປີ.

ເຂົ້າ​ຮ່ວມ​ໃນ​ພິ­ທີ​ວາງ​ສີ​ລາ​ລຶກ​ໂຄງ­ການ​ທາງ​ດ່ວນ​ນະ­ຄອນ­ຫຼວງ​ວຽງ​ຈັນໝາຍ​ເລກ 1 ມີ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນມີ​ບັນ­ດາ​ລັດ­ຖະ­ມົນ­ຕີ ກະ­ຊວງ ພະ­ແນກ­ການ ແລະ ພາກ­ສ່ວນ​ກ່ຽວ­ຂ້ອງ.

 

 

ໜັງສືພິມວຽງຈັນໃໝ່

ຄົ້ນຫາ

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 77

ຈຳນວນຜູ້ເຂົ້າຊົມວານນີ້ 84

ຈຳນວນຜູ້ເຂົ້າຊົມອາທິດນີ້ 77

ຈຳນວນຜູ້ເຂົ້າຊົມເດືອນນີ້ 2060

ຈຳນວນຜູ້ເຂົ້າຊົມທັງໝົດ 62497

Currently are 17 guests and no members online