ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ ມາ​ຊາ​ຣຸ ມຸ​ຣະ​ໂກ​ໂຊະ ປະ­ທານ​ບໍ­ລິ­ສັດ​ຍີ່­ປຸ່ນ ຊັງ​ໂກ ກໍ່­ສ້າງ ແລະ ຂົວ​ທາງ ຈຳ­ກັດ ພ້ອມ​ຄະ­ນະ ວັນ​ທີ 17 ທັນ­ວາ 2019 ຢູ່​ຫ້ອງ​ວ່າ­ການ​ປົກ­ຄອງ ນວ ໃນ​ໂອ­ກາດ​ທີ່​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ນວ.

   ທ່ານ ສິນ​ລະ​ວົງ ຄຸດ​ໄພ­ທູນ ໄດ້​ຕີ​ລາ­ຄາ​ສູງ​ຕໍ່​ການ​ມາ​ລົງ­ທຶນ​ຂອງ​ບໍ­ລິ­ສັດ​ ຍີ່­ປຸ່ນ​ຊັງ​ໂກ ກໍ່­ສ້າງ ແລະ ຂົວ​ທາງ ຈຳ­ກັດ ຢູ່​ໃນ ສປປ ລາວ ໂດຍ​ສະ­ເພາະ ບໍ­ລິ­ສັດ​ຈະ​ມາ​ລົງ­ທຶນ​ສ້າງ​ໂຮງ­ງານ​ຜະ­ລິດ​ຄອນ​ກຣີດ​ສຳ­ເລັດ​ຮູບ ເຊິ່ງ​ເປັນ​ການ​ປະ­ກອບ­ສ່ວນ​ໃນ​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ຂອງ ສປປ ລາວ ໃຫ້​ມີ​ຄວາມ​ເຂັ້ມ­ແຂງ​ຍິ່ງ​ຂຶ້ນ ພ້ອມ​ນີ້ ທ່ານ​ເຈົ້າຄອງ​ຍັງ​ໄດ້​ແນະ­ນຳ​ໃຫ້​ບໍ­ລິ­ສັດ​ດັ່ງ­ກ່າວ ເອົາ­ໃຈ­ໃສ່​ຮັກ­ສາ​ສິ່ງ­ແວ­ດລ້ອມ ພ້ອມ​ທັງ​ໃຫ້​ເຊີນ­ຊວນ​ບັນ­ດາ​ຫົວ­ໜ່ວຍ​ທຸ­ລະ​ກິດ​ຂອງ​ຍີ່­ປຸ່ນ ມາ​ລົງ­ທຶນ​ໃນ​ຂະ­ແໜງ​ກະ­ສິ­ກຳ​ຢູ່ ສປປ ລາວ ເພື່ອ​ໃຫ້​ສາ­ມາດ​ແຂ່ງ­ຂັນ​ກັບ​ປະ­ເທດ​ອື່ນໆ​ທີ່​ມາ​ລົງ­ທຶນ​ໃນ ສປປ ລາວ ກໍ​ຄື ນວ ໃຫ້​ນັບ​ມື້​ຫຼາຍ​ຂຶ້ນ.

   ທ່ານ ມາ​ຊາ​ຣຸ ມຸ​ຣະ​ໂກ​ໂຊະ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ການ​ຕ້ອນ­ຮັບ​ອັນ​ອົບ​ອຸ່ນ​ຂອງ​ທ່ານ​ເຈົ້າ​ຄອງ ນວ ໃນ​ຄັ້ງ​ນີ້ ບໍ­ລິ­ສັດ ​ຍີ່­ປຸ່ນ​ຊັງ​ໂກ​ກໍ່­ສ້າງ ແລະ ຂົວ​ທາງ ຈຳ­ກັດ ໄດ້​ສ້າງ­ຕັ້ງ​ໂຮງ­ງານ​ຜະ­ລິດ​ຄອນ​ກຣີດ​ສຳ­ເລັດ​ຮູບ ຢູ່​ນະ­ຄອນ​ປາກ​ເຊ ແຂວງ​ຈຳ­ປາ​ສັກ ມາ​ໄດ້​ຫຼາຍ​ປີ​ແລ້ວ ເພື່ອ​ເປັນ​ການ​ປະ­ກອບ­ສ່ວນ​ໃນ​ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ຂອງ ສປປ ລາວ ໃຫ້​ມີ​ຄຸນ​ນະ​ພາບ ສາ­ມາດ​ນຳ​ໃຊ້​ໄດ້​ດົນ ພ້ອມ​ນີ້ ຍັງ​ໄດ້​ສົ່ງ​ພະ­ນັກ­ງານ​ທີ່​ເຮັດ​ວຽກ​ຢູ່​ນະ­ຄອນ​ປາກ​ເຊ ໄປ​ເຝິກອົບ­ຮົມ​ວິ­ຊາ​ການ​ດ້ານ​ເຕັກ­ນິກ​ຕ່າງໆ​ຢູ່​ປະ­ເທດ​ຍີ່­ປຸ່ນ ແລະ ຮຽກ­ຮ້ອງ​ໃຫ້​ທ່ານ​ເຈົ້າ​ຄອງ ນວ ສະ­ໜັບ­ສະ­ໜູນ ແລະ ອຳ­ນວຍ​ຄວາມ​ສະ­ດວກ​ດ້ານ​ຕ່າງໆ ເນື່ອງ​ຈາກ​ບໍ­ລິ­ສັດ​ມີ​ແຜນ­ທີ່​ຈະ​ມາ​ສ້າງ­ຕັ້ງ​ໂຮງ­ງານ​ຜະ­ລິດ​ຄອນ​ກຣີດ​ສຳ­ເລັດ​ຮູບ ຢູ່​ເຂດ​ພັດ­ທະ­ນາ​ກວມ​ລວມ​ໄຊ​ເສດ​ຖາ ເພື່ອ​ແນ­ໃສ່​ປະ­ກອບ­ສ່ວນ​ພັດ­ທະ­ນາ​ພື້ນ­ຖານ​ໂຄງ​ລ່າງ​ຂອງ ສປປ ລາວ ໃຫ້​ເຂັ້ມ­ແຂງ​ຂຶ້ນ ທັງ​ເປັນ​ການ​ສ້າງ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ ນອກ​ນັ້ນ ຍັງ​ມີ​ແຜນ­ທີ່​ຈະ​ປັບ­ປຸງ​ພື້ນ­ຖານ​ໂຄງ​ລ່າງ​ຢູ່​ສີ່​ແຍກ​ໄຟ​ແດງ​ທາດ­ຫຼວງ ​ໃຫ້​ໄດ້​ມາດ­ຕະ­ຖານ ເວ­ລາ​ຝົນ­ຕົກ​ບໍ່​ໃຫ້​ມີ​ນ້ຳ​ອັ່ງ​ຂັງ.

   ນອກ​ນີ້ ວັນ​ທີ 16 ທັນ­ວາ 2019 ທ່ານ ອາດ​ສະ­ພັງ​ທອງ ສີ​ພັນ​ດອນ ຮອງ​ເຈົ້າ​ຄອງ ນວ ກໍ​ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ ຫູ ຊູ​ຮວາ ຮອງ​ປະ­ທານ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ຫວູ​ຫັ້ນ ແຂວງ​ຫູ​ເປີ້ຍ ສປ ຈີນ ພ້ອມ​ຄະ­ນະ ໃນ​ໂອ­ກາດ​ທີ່​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ນວ ວັນ​ທີ 15-18 ທັນ­ວາ​ນີ້.

   ທ່ານ ອາດ​ສະ­ພັງ​ທອງ ສີ​ພັນ​ດອນ ໄດ້​ລາຍ​ງານ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ ນວ ພ້ອມ​ທັງ​ໄດ້​ຕີ​ລາ­ຄາ​ສູງ​ຕໍ່​ການ​ມາ​ຢ້ຽມ­ຢາມ ແລະ ເຮັດ​ວຽກ​ຂອງ ຫູ ຊູ​ຮວາ ພ້ອມ​ຄະ­ນະ ເຊິ່ງ​ເປັນ​ການ​ຮັດ​ແໜ້ນ​ຄວາມ​ສາ­ມັກ­ຄີ ​ເສີມ​ຂະ­ຫຍາຍ​ສາຍ​ພົວ­ພັນ​ປະ­ເທດ​ເພື່ອນ​ມິດ ຄູ່​ຮ່ວມ​ຍຸດ​ທະ​ສາດ​ທີ່​ມີ​ມາ​ແຕ່​ດົນ​ນານ ໂດຍ​ສະ­ເພາະ ການ​ເສີມ​ຂະ­ຫຍາຍ​ການ​ຮ່ວມ​ມືລະ­ຫວ່າງ​ນະ­ຄອນ­ຫຼວງ​ວຽງ​ຈັນ ແລະ ນະ­ຄອນ​ຫວູ​ຫັ້ນ ໃນ​ການ​ເພີ່ມ​ທະ­ວີ​ການ​ພັດ­ທະ­ນາ​ເສດ­ຖະ­ກິດ​ຂອງ​ສອງ​ນະ­ຄອນ ​ໃຫ້​ນັບ​ມື້​ຂະ­ຫຍາຍ­ຕົວ​ຢ່າງ​ບໍ່​ຢຸດ​ຢັ້ງ.

   ທ່ານ ຫູ ຊູ​ຮວາ ໄດ້​ສະ­ແດງ​ຄວາມ​ຂອບ­ໃຈ​ຕໍ່​ທ່ານ​ຮອງ​ເຈົ້າ​ຄອງ ນວ ທີ່​ໄດ້​ໃຫ້­ການ​ຕ້ອນ­ຮັບ​ຢ່າງ​ອົບ​ອຸ່ນ ການ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ນວ ຄັ້ງ​ນີ້ ເປັນ​ການ​ເປີດ​ກວ້າງ​ການ​ຮ່ວມ​ມື​ນະ­ຄອນ­ຫຼວງ​ຫວູ​ຫັ້ນ ແລະ ນວ ປະ­ກອບ­ສ່ວນ​ໃນ​ການ​ປະ­ຕິ­ບັດ​ຕາມ​ນະ­ໂຍ­ບາຍ​ໜຶ່ງ​ແລວ ໜຶ່ງ​ເສັ້ນ­ທາງ ໃຫ້​ປາ­ກົດ​ຜົນ​ເປັນ​ຈິງ ແລະ ເປັນ​ຮູບ​ປະ​ທຳ.

   ໃນ​ວັນ​ດຽວ​ກັນ ທ່ານ ບຸນ​ທ່ຽງ ຂຸນ​ສີ ປະ­ທານ​ແນວ​ລາວ​ສ້າງ​ຊາດ ນວ ຍັງ​ໄດ້​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ ຫວາງ ຢ້າ ລີ້ນ ຮອງ​ປະ­ທານ​ສະ­ພາ​ທີ່​ປຶກ­ສາ​ການ­ເມືອງ ແຂວງ​ຕີ​ເບດ ສປ ຈີນ ໃນ​ໂອ­ກາດ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ນວ.

   ທ່ານ ບຸນ​ທ່ຽງ ຂຸນ​ສີ ໄດ້​ຕີ​ລາ­ຄາ​ສູງ​ຕໍ່​ການ​ມາ​ຢ້ຽມ­ຢາມ ແລະ ເຮັດ​ວຽກ​ຂອງ​ຄະ­ນະ​ຜູ້​ແທນ​ສະ­ພາ​ທີ່​ປຶກ­ສາ​ການ­ເມືອງ ແຂວງ​ຕີ​ເບດ ສປ ຈີນ ເຊິ່ງ​ເປັນ​ການ­ຈັດ­ຕັ້ງ​ຜັນ​ຂະ­ຫຍາຍ ແລະ ຕົວ​ແບບ​ທີ່​ດີ​ໃນ​ການ​ຮັດ​ແໜ້ນ​ສາຍ​ພົວ­ພັນ​ມິດ­ຕະ­ພາບ ການ​ຮ່ວມ​ມື​ແບບ​ຄູ່​ຮ່ວມ​ຍຸດ​ທະ​ສາດ ແລະ ຄູ່​ຮ່ວມ​ຊາ­ຕາ­ກຳ ລະ­ຫວ່າງ ລາວ-ຈີນ ໃນ​ໄລ­ຍະ​ໃໝ່ ໂດຍ​ສະ­ເພາະ ສາຍ​ພົວ­ພັນ​ຄວາມ​ສາ­ມັກ­ຄີ​ລະ­ຫວ່າງ ນວ-ແຂວງ​ຕີ​ເບດ ໃຫ້​ນັບ​ມື້ແໜ້ນ​ແຟ້ນ​ຍິ່ງ​ຂຶ້ນ ພ້ອມ​ນີ້ ຍັງ​ໄດ້​ເຊີນ­ຊວນ​ການ​ນຳ ແລະ ປະ­ຊາ­ຊົນ​ເຂດ​ປົກ­ຄອງ​ຕົນ​ເອງ​ຊົນ­ເຜົ່າ ຈີ​ຈ່າງ​ຕິ​ເບດ ມາ​ຢ້ຽມ­ຢາມ ແລະ ເຮັດ​ວຽກ​ຢູ່ ນວ ໃຫ້​ຫຼາຍ​ຂຶ້ນ ເຊິ່ງ ນວ ມີ​ຄວາມ​ຍິນ​ດີ​ແລກ­ປ່ຽນ​ການ​ຮ່ວມ​ມື​ໃນ​ຂະ­ແໜງ­ການ​ຕ່າງໆ ທີ່​ທັງ​ສອງ​ຝ່າຍ​ມີ​ທ່າ­ແຮງ ແລະ ມີ​ຄວາມ​ສົນ­ໃຈ​ຮ່ວມ​ກັນ.

ໜັງສືພິມວຽງຈັນໃໝ່

ຄົ້ນຫາ

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 46

ຈຳນວນຜູ້ເຂົ້າຊົມວານນີ້ 23

ຈຳນວນຜູ້ເຂົ້າຊົມອາທິດນີ້ 46

ຈຳນວນຜູ້ເຂົ້າຊົມເດືອນນີ້ 1430

ຈຳນວນຜູ້ເຂົ້າຊົມທັງໝົດ 58283

Currently are 24 guests and no members online