ສະ­ຖາ­ນີ​ໂທລະ­ພາບ ນະ­ຄອນ­ຫຼວງ​ວຽງ​ຈັນ (ນວ) ເປັນ​ສື່​ເອ​ເລັກ​ໂຕຣ​ນິກ­ຂະ​ແໜງ​ໜຶ່ງ ພາຍ­ຫຼັງ​ທີ່ ນວ ໄດ້​ສ້າງ­ຕັ້ງ​ສະ­ຖາ­ນີ​ວິ­ທະ­ຍຸ​ກະ­ຈາຍ­ສຽງ​ແຫ່ງ​ທຳ​ອິດ ວັນ​ທີ 10 ພະ­ຈິກ 1980 ເປັນ​ລະ­ບົບ AM ຄວາມ​ຖີ່ 1.200 KHZ ປີ 2002 ນວ ກໍ​ໄດ້​ສ້າງ­ຕັ້ງ​ວິ­ທະ­ຍຸ​ລະ­ບົບ FM ຄວາມ​ຖີ່ 105,5 MHz ປີ 2009 ກໍ​ໄດ້​ສ້າງ­ຕັ້ງ​ວິ­ທະ­ຍຸ FM ຄວາມ​ຖີ່ 98,80 MHz ຂຶ້ນ​ຕື່ມ ຂະ­ນະ​ດຽວ​ກັນ ປີ 1993 ນວ ສ້າງ­ຕັ້ງ​ໜ່ວຍ​ງານ​ໂທລະ­ພາບ​ຂຶ້ນ ໂດຍ​ເບື້ອງ​ຕົ້ນ​ໄດ້​ຜະ­ລິດ​ລາຍ­ການ​ລາຍ​ສັບ­ປະ­ດາ ຄວາມ​ຍາວ 30 ນາ­ທີ ຊື່​ລາຍ­ການ ວຽງ​ຈັນ​ວັນ​ນີ້ ອອກ​ອາ­ກາດ​ທາງ​ໂທລະ­ພາບ​ແຫ່ງ​ຊາດ​ທຸກ​ວັນ​ພະ­ຫັດ ຍ້ອນ​ເສດ­ຖະ­ກິດ-ສັງ­ຄົມ​ຂະ­ຫຍາຍ­ຕົວ ຄວາມ​ຕ້ອງ­ການ​ໃນ​ການ​ບໍ­ລິ­ໂພກ​ສື່​ຂອງ​ສັງ­ຄົມ​ເພີ່ມ​ຂຶ້ນ ແລະ ເຫັນ​ໄດ້​ຄວາມ​ສຳ­ຄັນ​ຂອງ​ວຽກ​ງານ​ໂຄ­ສະ­ນາ​ຖະ­ແຫຼງ​ຂ່າວ ນວ ຈຶ່ງ​ໄດ້​ອະ­ນຸ­ມັດ​ໃຫ້​ສ້າງ­ຕັ້ງ​ເປັນ​ສະ­ຖາ­ນີ​ໂທລະ­ພາບ ນວ ໂດຍ​ໄດ້​ເຊັນ​ສັນ­ຍາ​ການ​ກໍ່­ສ້າງ ແລະ ສະ­ໜອງ​ອຸ­ປະ­ກອນ ຂຶ້ນ​ວັນ​ທີ 8 ກໍ­ລະ­ກົດ 2013 ມູນ​ຄ່າ​ເກືອບ 40 ຕື້​ກີບ ເພື່ອ​ແນ­ໃສ່​ໃຫ້​ສັງ­ຄົມ​ໄດ້​ຮັບ​ຂໍ້​ມູນ​ຂ່າວ­ສານ​ທີ່​ວ່ອງ­ໄວ​ດ້ວຍ​ລະ­ບົບ​ທີ່​ທັນ​ສະ­ໄໝ.

    ພິ­ທີ​ເປີດ​ນຳ​ໃຊ້​ສະ­ຖາ­ນີ​ໂທລະ­ພາບ ນວ ເປັນ​ທາງ​ການ ຈັດ​ຂຶ້ນ​ວັນ​ທີ 13 ທັນ­ວາ 2019 ຢູ່​ສະ­ຖາ­ນີ​ວິ­ທະ­ຍຸ-ໂທລະ­ພາບ ນວ ໂດຍ​ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ທ່ານ ພົນ​ໂທ ວິ­ໄລ ຫຼ້າ​ຄຳ​ຟອງ ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ (ຖວ​ທ ນວ) ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ສົມ​ປະ­ສົງ ສົມ​ພັກ­ດີ ຜູ້­ອຳ­ນວຍ­ການ​ສະ­ຖາ­ນີ​ວິ­ທະ­ຍຸ-ໂທລະ­ພາບ ນວ ກ່າວ​ວ່າ: ການ​ກໍ່­ສ້າງ​ສະ­ຖາ­ນີ​ໂທລະ­ພາບ ນວ ໄດ້​ເລີ່ມ​ແຕ່​ວັນ​ທີ 16 ສິງ­ຫາ 2013 ເປັນ­ຕົ້ນ​ມາ ເຊິ່ງ​ເປັນ​ອາ­ຄານ 3 ຊັ້ນ ເນື້ອ­ທີ່ 2.855 ຕາ​ແມັດ ປະ­ກອບ​ມີ 31 ຫ້ອງ ໃນ​ນີ້ ມີ​ຫ້ອງ​ສະ­ຕູ​ດີ​ໂອ 2 ຫ້ອງ ຫ້ອງ​ອອກ​ອາ­ກາດ 1 ຫ້ອງ ຫ້ອງ​ຕັດ​ຕໍ່ 1 ຫ້ອງ ແລະ ຫ້ອງ​ເຮັດ​ວຽກ​ອື່ນໆ​ອີກ ພ້ອມ​ທັງ​ໄດ້​ປະ­ກອບ​ອຸ­ປະ­ກອນ​ເຕັກ­ນິກ​ທີ່​ທັນ​ສະ­ໄໝ ມີ​ລະ­ບົບ​ຖ່າຍ​ທຳ​ທັງ​ໃນ ແລະ ນອກ​ສະ­ຖານ­ທີ່ ເພື່ອ​ອຳ­ນວຍ​ຄວາມ​ສະ­ດວກ​ໃຫ້­ການ​ປະ­ຕິ­ບັດ​ໜ້າ­ທີ່​ຂອງ​ພະ­ນັກ­ງານ​ວິ­ຊາ​ການ​ຂອງ​ສະ­ຖາ­ນີ ໄດ້​ຜະ­ລິດ​ລາຍ­ການ​ອອກ​ອາ­ກາດ​ປະ­ຈຳ​ວັນ​ຢ່າງ​ມີ​ປະ​ສິດ­ທິ​ຜົນ ເພື່ອ​ໃຫ້​ຜູ້​ຮັບ​ຊົມ​ໄດ້​ຮັບ​ຄວາມ​ພໍ­ໃຈ ແລະ ໄດ້​ຮັບ​ຜົນ​ປະ­ໂຫຍດ​ສູງ​ສຸດ ໂທລະ­ພາບ ນວ ເປັນ​ລະ­ບົບ​ໂທລະ­ພາບ​ຜ່ານ​ດາວ​ທຽມ​ກະ­ຈາຍ​ພາບ​ດ້ວຍ​ລະ­ບົບ HD ຜ່ານ​ດາວ​ທຽມ​ລາວ​ແຊັດ ໃນ​ຄວາມ​ຖີ່​ຊ່ອງ 9.

    ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ສັງ­ຄົມ ທັງ​ເປັນ​ການ​ພັດ­ທະ­ນາ​ຮູບ​ແບບ​ລາຍ­ການ​ໃຫ້​ມີ​ຄຸນ​ນະ​ພາບ ພະ​ແນກ ຖວ​ທ ນວ ໄດ້​ເຫັນ​ດີ​ໃຫ້​ໂທລະ­ພາບ ນວ ຮ່ວມ​ມື​ກັບ​ບໍ­ລິ­ສັດ 3 ເອັສ ພັດ­ທະ­ນາ ໂດຍ​ໄດ້​ເຊັນ​ສັນ­ຍາ ວັນ​ທີ 28 ຕຸ­ລາ 2019 ເພື່ອ​ຮ່ວມ​ພັດ­ທະ­ນາ​ລາຍ­ການ​ໂທລະ­ພາບ ນວ ໃຫ້​ມີ​ຫຼາຍ​ສີ­ສັນ​ຕາມ​ຄຳ​ຂວັນ​ທີ່​ວ່າ ທັນ​ສະ­ໄໝ ວ່ອງ­ໄວ ໃສ່­ໃຈ​ປະ­ຊາ­ຊົນ.

ໜັງສືພິມວຽງຈັນໃໝ່

ຄົ້ນຫາ

ປະຕິທິນ

July 2020
S M T W T F S
28 29 30 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 21

ຈຳນວນຜູ້ເຂົ້າຊົມວານນີ້ 35

ຈຳນວນຜູ້ເຂົ້າຊົມອາທິດນີ້ 487

ຈຳນວນຜູ້ເຂົ້າຊົມເດືອນນີ້ 316

ຈຳນວນຜູ້ເຂົ້າຊົມທັງໝົດ 66329

Currently are 13 guests and no members online