5fda24c48e12af337397d25e2d9d5ad7

   ພິທີ​ເຊັນ​ບົດ​ບັນທຶກ​ລະຫວ່າງ​ອົງການ​ປົກຄອງ​ນະຄອນຫຼວງ​ວຽງ​ຈັນ (ນວ) ກັບ​ສະຖານທູດ​ຈີນ ປະຈຳ​ລາວ ກ່ຽວ​ກັບ​ໂຄງການ​ຍົກ​ລະດັບ​ໄຟຟ້າ ນວ ຈັດ​ຂຶ້ນ​ວັນ​ທີ 6 ທັນວາ 2019 ທີ່​ປົກຄອງ ນວ ຮ່ວມ​ລົງ​ນາມ​ລະຫວ່າງ​ທ່ານ ອາດ​ສະພັງ​ທອງ ສີ​ພັນ​ດອນ ຮອງ​ເຈົ້າ​ຄອງ ນວ ແລະ ທ່ານ ຫວາງ ຊີ​ຮຸຍ ທີ່​ປຶກສາ​ເສດຖະກິດ​ການ​ຄ້າ ສະຖານທູດ​ຈີນ ປະຈຳ​ລາວ ມີ​ບັນດາ​ຮອງ​ເຈົ້າເມືອງ ຮອງ​ຫົວໜ້າ​ພະແນກການ ແລະ ຂະແໜງການ​ກ່ຽວຂ້ອງ ເຂົ້າ​ຮ່ວມ.

   ອີງ​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ລັດຖະບານ​ລາວ ທາງ​ຝ່າຍ​ລັດຖະບານ​ຈີນ​ໄດ້​ຕົກລົງ​ເຫັນ​ດີ​ໃນ​ການ​ດຳເນີນ​ການ​ສຶກ​ສາ​ຄວາມ​ເປັນ​ໄປ​ໄດ້​ໂຄງການ​ແສງ​ສະຫວ່າງ ດ້ວຍ​ການ​ຊ່ວຍເຫຼືອ​ລ້າ​ຂອງ ​ສປ ຈີນ ໂຄງການ​ດັ່ງກ່າວ​ເຊິ່ງ​ສ່ວນ​ໜຶ່ງ​ຢູ່​ໃນ​ເຂດ​ຕົວ​ເມືອງ ແລະ ສ່ວນ​ໜຶ່ງ​ຢູ່​ເຂດ​ຊານເມືອງ ນວ ໂດຍ​ແມ່ນ​ອົງ ການ​ຮ່ວມ​ມື​ສາກົນ​ເພື່ອ​ການ​ພັດທະນາ​ແຫ່ງ​ຊາດ​ຈີນ​ເປັນ​ຜູ້​ມອບ​ໝາຍ​ໃຫ້​ກຸ່ມ​ບໍລິສັດ​ອອກ​ແບບ​ທາງ​ລົດໄຟ​ລາວ-ຈີນ ສົ່ງ​ຄະນະ​ທີມ​ງານ​ລົງ​ສຳ​ຫຼວດ​ຕົວ​ຈິງ​ທີ່ ນວ ແຕ່​ວັນ​ທີ 21 ເມສາ ຫາ​ວັນ​ທີ 17ພຶດສະພາ 2019 ໃນ​ການ​ສຳ​ຫຼວດ​ທາງ​ດ້ານ​ເຕັກນິກ​ໄດ້​ຮັບ​ການ​ເຫັນ​ດີ​ຈາກ​ສຳນັກງານ​ທີ່​ປຶກສາ​ດ້ານ​ເສດຖະກິດ-ການ​ຄ້າ​ສະຖານທູດ​ຈີນ​ປະຈຳ​ລາວ ເປັນ​ຜູ້ຕາງໜ້າ​ຝ່າຍ​ລັດຖະບານ​ຈີນ ແລະ ພະ​ແນກ​ພະລັງງານ ແລະ ບໍ່​ແຮ່ ນວ ຕາງໜ້າ​ຝ່າຍ​ລັດຖະບານ​ລາວ.

    ສຳລັບ​ໂຄງການ​ແມ່ນ​ຍົກ​ລະດັບ​ລະບົບ​ໄຟຟ້າ​ເຂດ​ເທສະ​ບານ ແລະ ຊານເມືອງ​ໃນ​ຕົວ​ເມືອງ ນວ ເພື່ອ​ຮັບປະກັນ​ຄວາມ​ສະຖຽນ​ລະ​ພາບ​ຂອງ​ການ​ສະໜອງ​ໄຟຟ້າ​ເຂດ​ເທສະ​ບານ 100 ບ້ານ ມີ​ພົນ​ລະ ເມືອງ 4 ແສນ​ກວ່າ​ຄົນ​ທີ່​ຕິດ​ພັນ​ກັບ​ການ​ປັບປຸງ​ຍົກ​ລະດັບ​ໄຟຟ້າ​ແຮງ​ກາງ 22 ກິ​ໂລ​ໂວນ ແລະ ໝໍ້​ແປງ 22/0,4 ກິ​ໂລ​ໂວນ ຈະ​ມີ​ການ​ປັບປຸງ​ຍົກ​ລະດັບ​ນ້ຳພຸ ແສງ​ໄຟ ສຽງ​ເພງ ແລະ ລະບົບ​ການ​ຫົດ​ນ້ຳ​ສວນ​ຫຍ້າ ຕົ້ນໄມ້ ເພີ່ມ​ແສງ​ສະຫວ່າງ​ເຍືອງ​ປະຕູ​ໄຊ ແລະ ບໍລິເວນ​ເຂດ​ສວນ​ປະຕູ​ໄຊ​ແຈ້ງ​ຂຶ້ນ ເພີ່ມ​ຄວາມ​ປອດ​ໄພ ຄວາມ​ສະດວກ​ສະບາຍ​ໃຫ້​ປະຊາຊົນ ແລະ ນັກ​ທ່ອງ​ທ່ຽວ​ທີ່​ມາ​ທ່ຽວ​ຊົມ ຍົກ​ລະດັບ​ໄຟ​ແສງ​ສະຫວ່າງ ໄຟ​ເຍືອງ​ທາງ​ໃນ​ເທສະ​ບານ ເພື່ອ​ຮັບປະກັນ​ຄວາມ​ປອດ​ໄພ ແລະ ຂະຫຍາຍ​ໂອກາດ​ໃນ​ການ​ເຮັດ​ວຽກ​ພາກ​ຄ່ຳ​ຂອງ​ປະຊາຊົນ​ໃນ 100 ບ້ານ ເປັນຕົ້ນ ເຂດ 30 ກວ່າ​ບ້ານ​ທີ່​ສຳ​ຫຼວດ​ແລ້ວ​ຕາມ 7 ເສັ້ນທາງ.

   ສ່ວນ​ໂຄງການ​ຍົກ​ລະດັບ​ແສງ​ສະຫວ່າງ​ເຍືອງ​ທາງ 30 ກວ່າ​ບ້ານ ຝ່າຍ​ຈີນ​ເປັນ​ຜູ້​ຮັບຜິດຊອບ​ຕິດ​ຕັ້ງ​ໄຟ​ເຍືອງ​ທາງ ແລະ ຕິດ​ຕັ້ງ​ກ້ອງ​ວົງ​ຈອນ​ປິດ​ໃຫ້​ໃໝ່ ພ້ອມ​ທັງ​ຂຸດ​ເຈາະ​ຮ່ອງ​ສາຍ​ໄຟ ເສັ້ນທາງ ແລະ ການ​ປັບ​ໜ້າດິນ​ຄືນ ການ​ເດີນ​ສາຍ​ໄຟຟ້າ ການ​ກໍ່ສ້າງ​ສູນ​ຄວບ​ຄຸມ​ໄຟ​ທາງ​ການ​ຈັດ​ຊີ້ ຕິດ​ຕັ້ງ ແລະ ທົດ​ລອງ​ອຸປະກອນ ແລະ ຝ່າຍ​ລາວ​ເປັນ​ຜູ້​ຮັບຜິດຊອບ​ຍົກຍ້າຍ​ຈັດ​ສັນ​ທີ່​ດິນ ແລະ ການ​ຮື້​ຖອນ ເຊັ່ນ: ການ​ຮື້​ຖອນ​ລະບົບ​ໄຟ​ທາງ​ເກົ່າ ລວມ​ທັງ​ອຸປະກອນ​ສິ່ງ​ກີດຂວາງ​ຕ່າງໆ ໃຫ້​ຫ້ອງ​ຄວບ​ຄຸມ ການ​ຫຍັບ​ຍ້າຍ​ພະນັກ ງານ​ໃນ​ຫ້ອງການ ການ​ສະໜອງ​ນ້ຳ ແລະ ພະລັງງານ​ໄຟຟ້າ.    

 

ໜັງສືພິມວຽງຈັນໃໝ່

ຄົ້ນຫາ

ສະຖານທີ່ທ່ອງທ່ຽວ

ພະທາດຫຼວງ
ປະຕູໄຊ
ຫໍພະເແກ້ວ
ວັດຊຽງຄວນ
ວັດສີສະເກດ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 48

ຈຳນວນຜູ້ເຂົ້າຊົມວານນີ້ 23

ຈຳນວນຜູ້ເຂົ້າຊົມອາທິດນີ້ 48

ຈຳນວນຜູ້ເຂົ້າຊົມເດືອນນີ້ 1432

ຈຳນວນຜູ້ເຂົ້າຊົມທັງໝົດ 58285

Currently are 18 guests and no members online