Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

28058374 534649013581728 5881644505921236289 n

      ຕອນເຊົ້າຂອງວັນທີ 16 ກຸມພາ 2018 ທີ່ສະໂມສອນຂອງພະແນກການເງິນນະຄອນຫຼວງວຽງຈັນ ໄດ້ຈັດກອງປະຊຸມກອງປະຊຸມສະຫຼູບວຽກງານການເງິນ ປະຈໍາປີ 2017 ແລະ ທິດທາງແຜນການ ປີ 2018 ຂອງນະຄອນຫຼວງວຽງຈັນ. ເປັນກຽດເຂົ້າຮ່ວມເປັນປະທານໂດຍທ່ານທ່ານ ປອ ສິນລະວົງຄຸດໄພທູນ ກຳມະການກົມການເມືອງສູນກາງພັກ-ເຈົ້າຄອງນະຄອນຫຼວງວຽງຈັນ; ເຂົ້າຮ່ວມມີ ທ່ານ ສີລາ ວຽງແກ້ວ, ຮອງລັດຖະມົນຕີກະຊວງການເງິນ, ບັນດາເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າພະແນກການ, ຫ້ອງການ, ພະນັກງານຂອງພະແນກກການເງິນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

28055782 534649073581722 3203916446340468095 n

     ພາຍຫຼັງກ່າວຈຸດປະສົງ ແລະ ເປີfພິທີ ກອງປະຊຸມໄດ້ຮັບຟັງການລາຍງານບົດສະຫຼຸບປະຈຳປີ 2017 ແລະ ທິດທາງແຜນການປະຈຳປີ 2018 ໂດຍທ່ານ ຄຳພັນ ມາລາບັນດິດ, ຄະນະປະຈຳພັກ ນວ, ຫົວໜ້າພະແນກການເງິນ ເນື້ອໃນບາງຕອນວ່າ: ພະແນກການເງິນນະຄອນຫຼວງວຽງຈັນເປັນພະແນກການໜື່ງທີ່ມີສາຍຕັ້ງຂື້ນກັບກະຊວງການເງິນສາຍຂວາງຂື້ນກັບນະຄອນຫຼວງວຽງຈັນປະກອບດ້ວຍ 06 ຫ້ອງການອ້ອມຂ້າງ,ເປັນຄະນະພັກນື່ງ ຊີ້ນຳນາພາ ກວມເອົາ 6 ຫ້ອງການ ແລະ 3 ຂະແໜງການສາຍຕັ້ງ ຄື ( ພາສີ,ສ່ວຍສາອາກອນ ນະຄອນຫຼວງວຽງຈັນ, ຄັງເງິນແຫ່ງຊາດ ປະຈຳນະຄອນຫຼວງ)ດ້ານວຽກວິຊາສະເພາະເຊິ່ງເຄື່ອນໄຫວວຽກງານຕາມພາລະບົດບາດຂອບເຂດສິດແລະ ໜ້າທີຂອງໃຜລາວ.

     ສຳລັບສະພາບການເຄື່ອນໄຫວທົ່ວໄປໂດຍລວມໃນປະຈຸບັນແມ່ນໄດ້ເຮັດສຳເລັດການປັບປຸງກົງຈັກການຈັດຕັ້ງພາຍໃນຂະແໜງກາານເງິນ,ສ່ວຍສາອາກອນນະຄອນຫຼວງ,ບັນດາຫ້ອງການອ້ອມຂ້າງພະແນກການເງິນນະຄອນຫຼວງວຽງຈັນ ແລະຫ້ອງການ-ການເງິນເມືອງຈຳນວນນຶ່ງ; ໄດ້ສຳເລັດ ເປີດບັ້ນດຳເນີນຊິວິດການເມືອງປັບປຸງປົວແປງພັກ ພາຍໃນຄະນະພັກຮາກຖານພະແນກການເງິນ ນະຄອນຫຼວງວຽງຈັນ; ໄດ້ສຳເລັດການແຈ້ງຊັບສີນ ແລະ ລາຍຮັບເທື່ອທີ່ສອງຂອງພະແນກການເງິນນະຄອນຫຼວງວຽງຈັນ ແລະ ສາມຂະແໜງການສາຍຕັ້ງ (ສ່ວຍສາອາກອນ,ຄັງເງິີນແຫ່ງຊາດປະຈຳນະຄອນຫຼວງວຽງຈັນ,ກອງຄຸ້ມຄອງພາສີ V ); ພິເສດໃນທ້າຍປີ 2017 ນີ້ໂດຍປະຕິບັດຕາມຂໍ້ຕົກລົງຂອງທ່ານຮອງນາຍົກລັດຖະມົນຕີກະຊວງການເງິນສະບັບເລກທີ4177/ກງ,ລົງວັນທີ 29 ພະຈິກ 2017 ວ່າດ້ວຍການຈັດຕັ້ງ ແລະການເຄື່ອນໄຫວ ຂອງພະແນກການເງິນແຂວງ, ນະຄອນຫຼວງ; ບັນດາຫ້ອງການອ້ອມຂ້າງພະແນກການເງິນໃນເມື່ອກ່ອນ ຊື່ເກົ່າເອີ້ນເປັນຫ້ອງການ ໄດ້ປ່ຽນມາເປັນຂະແໜງປະກອບດ້ວຍດ້ວຍ 5 ຂະແໜງອ້ອມຂ້າງພະແນກການເງິນຄຶ :ຂະແໜງຈັດຕັ້ງ-ບໍລິຫານ,ຂະແໜງງົບປະມານແຫ່ງລັດ,ຂະແໜງບັນຊີ,ຂະແໜງກວດກາ,ຂະແໜງຄຸ້ມຄອງຊັບສີນຂອງລັດເຊີ່ງໄດ້ໂຮມເອົາວຽກຂອງຫ້ອງການຄຸ້ມຄອງການເງິນລັດວິສາຫະກິດມາເຂົ້າກັບຂະແໜງຄຸ້ມຄອງຄອງຊັບສີນຂອງລັດ; ຂໍ້ຕົກລົງຂອງທ່ານຮອງນາຍົກລັດຖະມົນຕີກະຊວງການເງິນສະບັບເລກທີ4178/ກງ,ລົງວັນທີ29 ພະຈິກ 2017 ວ່າດ້ວຍການຈັດຕັ້ງ ແລະການເຄື່ອໄຫວຂອງຫ້ອງການ-ການເງິນເມືອງ,ເທດສະບານ,ນະຄອນຫຼວງ.

ປະຈຸບັນຈຳນວນພະນັກງານສົມບູນຂະແໜງການເງິນນະຄອນຫຼວງ ມີທັງໝົດ 886 ຄົນ, ຍິງ 290 ຄົນ. ໃນນັ້ນ : ຊັ້ນຕົ້ນ 3 ຄົນ, ຍິງ 2 ຄົນ; ຊັ້ນກາງ 23 ຄົນ, ຍິງ 7ຄົນ. ຊັ້ນສູງ 87 ຄົນ, ຍິງ 21 ຄົນ. ປະລິນຍາຕີ 340 ຄົນ, ຍິງ 117 ຄົນ. ປະລິນຍາໂທ 11 ຄົນ, ຍິງ 7 ຄົນ.

ສຳລັບສະພາບການສະພາບການຈັດຕັ້ງປະຕິບັດແຜນງົບປະມານປະຈໍາປີ 2017 ນະຄອນຫຼວງວຽຈັນໄດ້ຮັບມອບໝາຍ ຈາກກະຊວງການເງິນ ໃຫ້ຈັດຕັ້ງປະຕິບັດແຜນການລາຍຮັບປີ 2017 ເບື້ອງຕົ້ນ ແມ່ນ 1.100,7 ຕື້ກີບ,ທຽບໃສ່ປີຜ່ານມາເພີ້ມຂື້ນ 2,9 % ໃນນີ້,ເຊີ່ງໄດ້ຮັບແຜນດັດແກ້ລວມ 1.103,911 ຕື້ກີບ.ຜ່ານການຈັດຕັ້ງປະຕິບັດລາຍຮັບຕົວຈິງ ປີ 2017 ແຕ່ວັນທີ 1/1/2017-31/12/2017 ສາມາດຈັດຕັ້ງການຈັດເກັບລາຍຮັບເຂົ້າງົບປະມານໄດ້ທັງໝົດ 1.038,966 ຕື້ກີບເທົ່າກັບ 94,12 % ທຽບໃສ່ແຜນປີ.

ດ້ານຕົວເລກລາຍຈ່າຍ:
ແຜນລາຍຈ່າຍທີ່ກະຊວງການເງິນ ມອບໃຫ້ນະຄອນຫຼວງ ປະຈໍາປີ 2017 ເທົ່າກັບ 672,05 ຕື້ກີບ ສະນັ້ນ ຜ່ານການຈັດຕັ້ງປະຕິບັດໃນປີ 2017 ( 01/1/2017-31/12/2017 ) ປະຕິບັດລາຍຈ່າຍທັງໝົດ : 657,333 ຕື້ກີບ,ເທົ່າກັບ 97,81 % ຂອງແຜນການປີ; ການດຸ່ນດ່ຽງ ນະຄອນຫຼວງວຽງຈັນໄດ້ດຸ່ນດ່ຽງໃຫ້ສູນກາງຈໍານວນ 338,58 ຕື້ກີບ,ເທົ່າກັບ 78,29 % ຂອງແຜນປີ.

ພາຍຫຼັງຮັບຟັງການລາຍງານແລະ ການປະກອບຄຳເຫັນຈາກແຕ່ລະພາກສ່ວນ, ຜູ້ແທນທີ່ເຂົ້າຮ່ວມປະຊຸມ ທ່ານ ປອສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນກໍໄດ້ມີທິດຊີ້ນຳກ່ຽວກັບທິດທາງແຜນການເກັບລາຍຮັບ-ລາຍຈ່າຍ ງົບປະມານ ສົກປີ 2018 ເຊີ່ງມີເນື້ອໃນດັ່ງນີ້:
-
ສຳລັບຄາດໝາຍສໍາຄັນຂອງ ປີ 2018 ແມ່ນ:
+
ສຸມໃສ່ປະຕິບັດມະຕິ VI ຂອງອົງຄະນະພັກ ນວ ຕາມຄາດໝາຍກວມ ລວມແມ່ນ ເຮັດໃຫ້ ນວສືບຕໍ່ກາຍເປັນໃຈກາງເສດຖະກິດຂອງປະເທດທີ່ມີຈັງຫວະເຕີບໂຕສູງ...ສ້າງສະຖານະການເງິນທີ່ສາມາດເປັນເຈົ້າຕົນເອງໃນຂັ້ນພື້ນຖານ ... ແລະ ຂໍ້ຕົກລົງຂອງເຈົ້າຄອງ ນວວ່າດ້ວຍການການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານປະຈຳປີ 2018 ຂອງ ນວ ສະບັບເລກທີ: 0171ລົງວັນທີ: 15 ກຸມພາ 2018, ມາດຕາ 12, 13, 14, 15 ໝວດທີ III ໃຫ້ບັນລຸຄາດໝາຍທີ່ວາງໃວ້.

+ ສືບຕໍ່ສູ້ຊົນເຮັດໃຫ້ວຽກງານການເງິນ-ງົບປະມານ ຂອງ ນວ ມີຄວາມໜັກແໜ້ນເຂັ້ມແຂງ, ປະຕິບັດແຜນງົບປະມານລາຍຮັບໃຫ້ໄດ້ຕາມແຜນ ຫຼື ລື່ນແຜນ ແລະຄຸ້ມຄອງລາຍຈ່າຍໃຫ້ໄປຕາມກົດໝາຍ ແລະລະບຽບການກໍານົດ, ປະຕິບັດນະໂຍບາຍປະຢັດມັດທະຍັດຢ່າງເຂັ້ມງວດ.

- ສຳລັບແຜນວຽກຕົ້ນຕໍ:
ໂດຍລວມແມ່ນໃຫ້ປະຕິບັດຕາມແຜນວຽກທີ່ໄດ້ກໍານົດໃວ້ໃນຂໍ້ຕົກລົງຂອງເຈົ້າຄອງ ນວວ່າດ້ວຍການການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານປະຈຳປີ 2018 ຂອງ ນວ ສະບັບເລກທີ 0171ລົງວັນທີ: 15 ກຸມພາ 2018, ມາດຕາທີ: 20, ໝວດທີ V ດັ່ງນີ້:

1.ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັງານລັດຖະກອນ ທົ່ວຂະແໜງການເງິນ ຢ່າງເລິກເຊິ່ງ ແລະແທດເຖິງກວ່າເກົ່າ, ຍົກສູງຄວາມຮູ້-ຄວາມສາມາດ, ສະຕິຕື່ນຕົວຕໍ່ການປະຕິບັດວິໄນການເງິນ, ປະຕິບັດຕາມຄຳແນະນຳສະບັບເລກທີ 4040/ກງ, ລົງວັນທີ 21 ພະຈິກ 2017 ກ່ຽວກັບການຄຸ້ມຄອງວຽກງານ ພາສີ, ສ່ວຍສາອາກອນ ແລະ ຄັງເງິນແຫ່ງຊາດ.

2.ເຜີຍແຜ່ແຜນງົບປະມານ ປະຈຳປີ 2018 ແລະ ອອກບົດແນະນຳວ່າດ້ວຍການຈັດຕັ້ງປະຕິບັດແຜນງົບ ປະມານ ປະຈຳປີ 2018 ເປັນອັນລະອຽດ.

3.ສືບຕໍ່ຈັດຕັ້ງປະຕິບັດຄຳສັ່ງ ເລກທີ 40/ນຍ, ລົງວັນທີ 19 ກັນຍາ 2016 ວ່າດ້ວຍ ການເກັບກຳ ແລະ ສຳຫລວດຖານລາຍຮັບງົບປະມານຄືນໃໝ່ ໃຫ້ສຳເລັດ, ເພີ່ມທະວີວຽກງານຕິດຕາມກວດກາການເກັບລາຍຮັບຂອງພາສີ, ອາກອນ, ທີ່ດິນ, ຄ່າທຳນຽມ, ຄ່າບໍລິການວິຊາການ, ຄ່າເຊົ່າ-ສຳປະທານ, ຄ່າຊັບພະຍາ ກອນທຳມະຊາດ, ບັນດາຫົວໜ່ວຍລັດວິສາຫະກິດ ແລະ ລາຍຮັບອື່ນໆ ໃຫ້ຄົບຖ້ວນ, ສະກັດກັ້ນການລັກລອບຫລົບຫລີກພາສີ-ອາກອນ ແລະ ການຄ້າຂາຍເຖື່ອນ.

4.ເພີ່ມທະວີການປະຕິບັດກົດໝາຍ ແລະ ນິຕີກຳລຸ່ມກົດໝາຍຂອງຂະແໜງການຂອງຕົນທີ່ໄດ້ປະກາດໃຊ້ແລ້ວ ລວມທັງໝວດທີ II ມາດຕາ 11 (ຂໍ້ 11.2) ແລະ ໝວດທີ III ມາດຕາ 12, 13, 14, 15 ຂອງ ຂໍ້ຕົກລົງສະບັບນີ້ ໃຫ້ມີຄວາມເດັດຂາດ ແລະເຂັ້ມງວດ, ເສີມຂະຫຍາຍໃນການໂຄສະນາເຜີຍແຜ່ ໃຫ້ພະນັກງານລັດຖະກອນ, ທຸລະກິດ ແລະພາກສ່ວນທີ່ກ່ຽວຂ້ອງຢ່າງທົ່ວເຖິງ.

5.ສືບຕໍ່ຂະຫຍາຍການນຳໃຊ້ລະບົບເຕັກໂນໂລຊີ ເຂົ້າໃນການຄຸ້ມຄອງຈັດເກັບລາຍຮັບ ແລະປະຕິບັດລາຍຈ່າຍຢູ່ຂັ້ນນະຄອນຫລວງ, ບັນດາດ່ານສາກົນ ດ້ວຍການນຳໃຊ້ລະບົບໂປຣແກຣມ (GFISf, Smart-Tax Easy-Tax...) ໃນປີ 2018 ໃຫ້ຂະຫຍາຍເອົາລົງໄປນຳຊ້ຢູ່ຂັ້ນເມືອງທີ່ມີເງື່ອນໄຂ ແລະສືບຕໍ່ຕິດຕັ້ງເຄື່ອງບັນທຶກການຂາຍ (POS) ໃຫ້ແກ່ຫົວໜ່ວຍທຸລະກິດທີ່ຂຶ້ນກັບການຄຸ້ມຄອງຂອງສ່ວຍສາອາກອນ ນະຄອນຫລວງ ແລະ ບັນດາເມືອງ ໃຫ້ໄດ້ 318 ເຄື່ອງ; ສືບຕໍ່ຫັນເອົາຖານຂໍ້ມູນລາຍຮັບເຂົ້າສູ່ການຄຸ້ມຄອງດ້ວຍເຄື່ອງມືທັນສະໄໝ ໃຫ້ນັບມື້ນັບຫລາຍຂຶ້ນ ແລະຫັນເອົາການຊຳລະພັນທະພາສີອາກອນ ແລະ ຄ່າທຳນຽມຕ່າງໆ ຜ່ານລະບົບທະນາຄານ.

6.ສືບຕໍ່ສົມທົບກັບພາກສ່ວນທີ່ກ່ຽວຂ້ອງ ສ້າງກົດໝາຍວ່າດ້ວຍອາກອນຕົວເມືອງ (TAX-THE CITY) ໃຫ້ສໍາເຫຼັດ.

7.ສັງລວມ, ເກັບກຳຂໍ້ມູນ ແລະ ຕິດຕາມບັນຊີຊັບສິນຂອງລັດ ໃຫ້ຄົບຖ້ວນພ້ອມກັນນີ້ ກໍ່ຕ້ອງໄດ້ສັງລວມບັນຊີ ແລະ ເຕົ້າໂຮມຊັບສິນຕ່າງໆທີ່ສານຕັດສິນຮິບເປັນຂອງລັດ ໃຫ້ຄົບຖ້ວນຕາມຄຳສັ່ງ ສະບັບເລກທີ 07/ນຍ, ລົງວັນທີ 5 ເມສາ 2017.

8.ເຂັ້ມງວດກັບການປະຕິບັດກົດໝາຍກ່ຽວກັບການປະຕິບັດລາຍຈ່າຍງົບປະມານ ຕ້ອງໄປຕາມແຜນ ຂອງສະພາໄດ້ຮອງຮັບເອົາ, ທັງຖືກຕ້ອງຕາມສາລະບານງົບປະມານ, ລະຫັດຄັງເງິນ ແລະຕ້ອງນຳໃຊ້ລະບົບໂປຣແກຼມຂອງບັນຊີ GFIS. ປະຕິບັດການເຄື່ອນຍ້າຍເງິນພູດສູນກາງແລະ ດຸນດ່ຽງໃຫ້ຄັງເງິນເມືອງ ຕາມແຜນທີ່ກຳນົດໃຫ້ທັນເວລາ.ສືບຕໍ່ພັດທະນາວຽກງານການບັນຊີຄັງເງິນຂັ້ນນະຄອນຫລວງ, ຄັງເງິນເມືອງໃຫ້ເປັນລະບົບຄົບຊຸດ, ສ້າງກົນໄກການປະສານງານກັບພາກສ່ວນທີ່ກ່ຽວຂ້ອງ ແລະປັບປຸງການບໍລິການດ້ວຍຄວາມວ່ອງໄວ, ຈັດຕັ້ງປະຕິບັດຄຳສັ່ງ ສະບັບເລກທີ 09/ນຍ, ວ່າດ້ວຍການປະຕິບັດລາຍຈ່າຍງົບປະມານຂອງລັດ ໃຫ້ເປັນຮູບປະທຳ ແລະ ໄດ້ຮັບຜົນດີ.

9.ສືບຕໍ່ສ້າງແຜນການຍົກລະດັບດ້ານວິຊາສະເພາະ, ວິຊາການກວດກາໃຫ້ສູງຂຶ້ນຕື່ມກ້າວໜຶ່ງ, ເພີ່ມຈຳນວນພະນັກງານກວດກາຕອບສະໜອງໃຫ້ໄດ້ທັນກັບສະພາບການ ໃນການກວດກາຕາມແຜນ, ກວດກາແບບກະທັນຫັນ ແລະກວດກາຕາມຄຳແນະນຳ, ຕາມການຕົກລົງຂອງຂັ້ນເທິງ. ຄົ້ນຄວ້າຈັດວາງພະນັກງານການເງິນລົງເລິກຮັບຜິດຊອບເປັນແຕ່ລະຂະແໜງການເພື່ອຮັບປະກັນການປະຕິບັດຕາມແຕ່ລະເປົ້າໝາຍກວດກາ ເຊັ່ນ:ກວດກາການປະຕິບັດງົບປະມານ ຂອງບັນດາເມືອງອ້ອມຂ້າງ ນວ, ບັນດາຂະແໜງການທີ່ນຳໃຊ້ງົບປະມານຂອງລັດເພື່ອເລັ່ງໃສ່ການກວດກາຊຸກຍູ້ການປະຕິບັດລະບຽບກົດໝາຍໃຫ້ຖືກຕ້ອງ, ຊຸກຍູ້ການມອບພັນທະເຂົ້າງົບປະມານ ໃຫ້ຖືກຕ້ອງຄົບຖ້ວນ, ທັນເວລາ ແລະຖືເປັນວຽກບູລິມະສິດອັນດັບໜຶ່ງ.

10.ລະດົມໃຫ້ປະຊາຊົນພົນລະເມືອງ, ຫົວໜ່ວຍວິສາຫະກິດ ຕາມສິດຄຸ້ມຄອງ ຂອງນະຄອນຫລວງ, ຂອງເມືອງ ແລະ ບ້ານ ເຂົ້າໃຈ, ໂລ່ງໃຈ ແລະ ເຫັນຄວາມຈໍາເປັນຕໍ່ການປະຕິບັດພັນທະໃຫ້ລັດ;

11.ຊຸກຍູ້ການເກັບລາຍຮັບຈາກລາຍຮັບວິຊາການຈາກຂະແໜງການທ່ອງທ່ຽວ ແລະລາຍຮັບຈາກຂະແໜງ ການຕ່າງໆ; ຈັດເກັບລາຍຮັບຈາກການຈັດສັນທີ່ດິນ 8 ປະເພດໂດຍລົງເລິກປະເພດທີ່ດິນ ກະສິກຳ-ປ່າໄມ້, ຊົນລະ ປະທານ, ທີ່ດິນພື້ນຖານໂຄງລ່າງ...

12.ຄົ້ນຄ້ວານໍາສະເໜີລາຍຮັບຈາກ ການເກັບອາກອນຕົວເມືອງ ແລະ ລາຍຮັບອື່ນໆ ທີ່ກົດໝາຍ ແລະ ນະໂຍບາຍ ເປີດທາງໃຫ້ໄດ້...

13.ຂະຫຍາຍລະບົບ ICT ໃນຂະແໜງການເງິນ.

14. ພັດທະນາ ແລະ ແກ້ໄຂບັນຫາດ້ານອະສັງຫາລິມະຊັບ; ການຫັນຊັບສິນເປັນທຶນ, ການເຊົ່າ ແລະ ສຳປະທານເຮັດໃຫ້ມີການເຄື່ອນໄຫວແຂງແຮງຂຶ້ນຕື່ມ, ທັງຖືກທິດຖືກທາງ, ມີປະສິດທິຜົນ ແລະປະຊາຊົນ ສ່ວນໃຫຍ່ໄດ້ຮັບຜົນປະໂຫຍດ.

15. ຄົ້ນພິຈາລະນາແກ້ໄຂ ຂໍ້ແນະນຳຂອງ ອົງການກວດສອບ ປະຈຳພາກກາງ ປະຈຳປີ 2017 ໃຫ້ຄົບຖ້ວນ.

#ວຽງຈັນວັນໃໝ່ຂ່າວສານທັນສະໄໝເພື່ອຊາວວຽງ.

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 28

ຈຳນວນຜູ້ເຂົ້າຊົມວານນີ້ 60

ຈຳນວນຜູ້ເຂົ້າຊົມອາທິດນີ້ 160

ຈຳນວນຜູ້ເຂົ້າຊົມເດືອນນີ້ 924

ຈຳນວນຜູ້ເຂົ້າຊົມທັງໝົດ 27723

Currently are 52 guests and no members online

ແຜນທີ່ນະຄອນຫຼວງວຽງຈັນ