Get Adobe Flash player
ເຊີດຊູຄວາມສາມາດນຳພາຂອງຄະນະພັກ ເພີ່ມທະວີຄວາມສັກສິດຂອງການບໍລິຫານລັດ ເສີມຂະຫຍາຍປະຊາທິປະໄຕປະຊາຊົນ ເສີມສ້າງສັງຄົມສາມັກຄີປອງດອງ ປຸກລະດົມກຳລັງແຮງທົ່ວສັງຄົມ ພັດທະນານະຄອນຫຼວງວຽງຈັນ ໃຫ້ເປັນນະຄອນທີ່ໜ້າຢູ່ ແລະ ຍືນຍົງ !

ຂ່າວເດັ່ນ

3 ຫຼຸດ 3 ເພີ່ມ 3 ຂະບວນການ
ຍິນດີຕ້ອນຮັບ ສູ່ປີທ່ອງທ່ຽວລາວ ປີ 2018, Welcome to Visit LAOS Year 2018

ນິຕິກຳສຳຄັນ

ຂ່າວສານໜ້າສົນໃຈ

37135333 616667175379911 7415517218458304512 n
    
ເນື່ອງ​ໃນ​ໂອກາດ​ວັນ​ປ່ອຍ​ປາ ​ແລະ ອະນຸລັກ ສັດ​ນ້ຳ-​ສັດປ່າ​ແຫ່ງ​ຊາດ​ໃນວັນ​ທີ 13 ກໍ ລະກົດ 2018 ຫ້ອງການກະຊວງ​ກະສິກຳ​ແລະ ປ່າ​ໄມ້ຮ່ວມ​ກັບ​ນະຄອນຫລວງ​ວຽງຈັນ​​ແລະ ສູນ​ກາງ​ຊາວໜຸ່ມ ປປ ລາວໄດ້​ຈັດ​ພິທີ​ປ່ອຍ​ລູກປາ ຫລາຍ​ຊະນິດ ​ຈຳນວນ 150.000 ​ໂຕລົງ​ສູ່​ແຫ​ລ່ງນ້ຳ​ທຳ​ມະ​ຊາດ ອ່າງ​ນ້ຳ​ຫຸມ​ເມືອງ​ນາ​ຊາຍ​ທອງ​ນະຄອນຫລວງ​ວຽງຈັນ, ມີ ປາປາກ, ປາ​ເກັດ​ແລບ, ປາມະ​ລີ​ການ, ປາ​ນິນ ແລະປາ​ໄນ.ພ້ອມ​ນີ້, ຍັງ​ໄດ້ປ່ອຍພໍ່​ແມ່​ພັນປາພື້ນ​ເມືອງ, ມີ ປາກົດ, ປາສ້ອຍ, ປາ​ເຄິງ ​ແລະ ປາ​ເໝັ້ນ ຫລາຍ​ກວ່າ 1.000 ​ໂຕ.ໃຫ້ກຽດ​ເຂົ້າຮ່ວມ​ພິທີ​ປ່ອຍ​ປາ​ຄັ້ງ​ນີ້, ​ໂດຍ​ ທ່ານ ທອງ​ລຸນ ສີ​ສຸ​ລິດນາຍົກລັດຖະມົນຕີ, ມີ​ບັນດາ​ລັດຖະມົນຕີ, ​ທ່ານ ສິນລະວົງ ຄຸດໄພທູນ ເຈົ້າ​ຄອງ​ ນະຄອນຫລວງ​ວຽງຈັນ, ຜູ້ຕາງໜ້າອົງການ​ຈັດ​ຕັ້ງ​ສາກົນ, ພະ​ແນ​ກການ​ຕ່າງໆ ​ແລະ ພໍ່​ແມ່​ປະຊາຊົນ ​ເຂົ້າ​ຮ່ວມ.

   37118545 616666688713293 3361357245412540416 n

     ທ່ານ ລຽນ ທິ​ແກ້ວ ລັດຖະມົນຕີກະຊວງ​ກະສິກຳ ​ແລະ ປ່າ​ໄມ້ກ່າວ​ວ່າ:ເນື່ອງ​ໃນ​ໂອກາດ​ວັນ​ປ່ອຍ​ປາ ​ແລະ ອະນຸລັກ ສັດ​ນ້ຳ-​ສັດປ່າ​ແຫ່ງ​ຊາດໄດ້ຮຽກຮ້ອງ​ມາ​ຍັງ​ພາກສ່ວນ​ຕ່າງໆທັງ​ພາກ​ລັດ ​ແລະ ​ເອກະ​ຊົນ​ໃນ​ທົ່ວ​ສັງຄົມຈົ່ງ​ພ້ອມ​ກັນ​ຮ່ວມ​ແຮງ​ຮ່ວມ​ໃຈຄຸ້ມ​ຄອງ, ປົກ​ປັກ​ຮັກສາ​ແລະ ພັດທະນາ ສັດ​ນ້ຳ-​ສັດປ່າ​ໃຫ້​ຫລາຍ​ຂຶ້ນ. ທັງນີ້, ເພື່ອແນ​ໃສ່​ເພີ່ມ​ຄວາມ​ອຸດົມສົມບູນ ທາງ​ດ້ານ​ຊະນິດ​ພັນ​ແລະ ຈຳນວນ​ປະຊາກອນ​ຂອງ​ສັດ​ນ້ຳ-​ສັດປ່າທີ່​ເປັນ​ມໍລະດົກ​ທຳ​ມະ​ຊາດ​ອັນ​ລ້ຳ​ຄ່າ​ຂອງ​ຊາດ ​ໃຫ້​ມີ​ການ​ຂະຫຍາຍຕົວ​ແລະ ​ໄດ້​ຊົມ​ໃຊ້​ແບບ​ຍືນ​ນານ.ສຳລັບການ​ປ່ອຍປາ​ປີ​ນີ້, ກະຊວງ​ກະສິກຳ ​ແລະ ປ່າ​ໄມ້​ໄດ້​ສົມທົບ​ກັບ​ອົງການ​ປົກຄອງ​ທ້ອງ​ຖິ່ນທົ່ວ​ປະ​ເທດກະກຽມ​ແນວ​ພັນ​ປາ​ຫລາຍ​ຊະນິດ​ແລະ ຈັດ​ພິທີ​ປ່ອຍ​ປາ​ໃຫ້​ເປັນ​ຂະ​ບວນຟົດຟື້ນ, ​ເຊິ່ງຄາດໝາຍລວມທັງໝົດໃຫ້​ໄດ້ຢ່າງໜ້ອຍ 45 ລ້ານ​ໂຕ​​ເພື່ອ​ປ່ອຍ​ລົງ​ສູ່​ແ​ຫລ່ງນ້ຳທຳ​ມະ​ຊາດຕ່າງໆເປັນ​ຕົ້ນ​ແມ່​ນ້ຳຂອງ ​ແລະ ສາຂາ, ອ່າງ​ເກັບ​ນ້ຳ​ເຂື່ອນ​ໄຟຟ້າ, ອ່າງ​​ເກັບ​ນ້ຳຊົນລະ​​ປະທານ, ໜອງ ​ແລະ ບຶງ​ທຳ​ມະ​ຊາດ, ໜອງປາ​ຊຸມ​ຊົນ ​ແລະດິນ​ບໍລິ​ເວນ​ນ້ຳ​ປະ​ເພດຕ່າງໆ.

ລັດຖະມົນຕີກະຊວງ​ກະສິກຳ ​ແລະ ປ່າ​ໄມ້ຊີ້​ໃຫ້​ເຫັນ​ວ່າ:ສປປ ລາວ​ເປັນ​ປະ​ເທດ​ອຸດົມ​ຮັ່ງມີ​ໄປ​ດ້ວຍ​ຊັບພະຍາກອນ​ທຳ​ມະ​ຊາດຊັບ​ໃນ​ດິນສິນ​ໃນ​ນ້ຳ, ມີ​ພັນ​ປາພື້ນ​ເມືອງ​ຫລາຍ​ກວ່າ 500 ຊະນິດ​, ​ເປັນ​ບ່ອນ​ອາ​ໄສ​ຂອງ​ສັດປ່າ​ທີ່​ຫາ​ຍາກ​ແລະ ​ໃກ້ຈະ​ສູນພັນ​ຂອງ​ໂລກ​ເຊັ່ນ:​ໂຕ​ເສົາ​ລາ, ​ໂຕ​ຂະ​ຍຸ, ຊ້າງ, ​ເສືອ​ໂຄ່ງ ​ແລະ ຊະນິດ​ອື່ນໆ.ສັດ​ນ້ຳ-​ສັດປ່າ ດັ່ງກ່າວ, ​ແມ່ນ​ມີ​ຄວາມ​ສຳຄັນ ຕໍ່ການ​ຮັກສາ​ຄວາມ​ອຸດົມສົມບູນ, ຄວາມ​ສົມ​ດູ​ນ​ໃນ​ລະບົບ​ນິ​ເວດ​​ທຳ​ມະ​ຊາດ, ທັງ​ເປັນ​ທ່າ​ແຮງ​ໃຫ້​ແກ່​ການ​ພັດທະນາ​ເສດຖະກິດ-​ສັງຄົມ​ແລະ​ເປັນ​ເງື່ອນ​ໄຂ​ທີ່​ດີ​ ໃຫ້​ແກ່​ການ​ດຳລົງ​ຊີວິດ ປະຊາຊົນ​ບັນດາ​ເຜົ່າ.ຍ້ອນ​ເຫັນ​ຄວາມ​ສຳຄັນ​ດັ່ງກ່າວ, ພັກ-​ລັດຖະບານ ຈຶ່ງ​ໄດ້​ກຳນົດ​ເອົາ​ວັນ​ທີ 13 ກໍລະກົດຂອງ​ທຸກ​ປີ ​ເປັນວັນ​ປ່ອຍ​ປາ​ແລະ ອະນຸລັກ ສັດ​ນ້ຳ-​ສັດປ່າ​ແຫ່ງ​ຊາດ, ​ເຊິ່ງກົງ​ກັບ​ວັນ​ຄ້າຍ​ວັນ​ເກີດ​ຂອງປະທານ​ ສຸພາ​ນຸວົງ.

ທັງ​ນີ້, ​ເພື່ອເປັນການຈົດ​ຈຳ​ລ້ຳ​ລຶກຄຸນງາມຄວາມດີ​ ​ແລະຜົນງານ​ອັນ​ໃຫຍ່​ຫລວງ ຂອງ​ເພິ່ນ, ​ເປັນ​ການ​ປູກ​ຈິດ​ສຳນຶກ​ແກ່​ອະນຸຊົນ, ​ເຍົາວະ​ຊົນ​ຂອງ​ຊາດ ກໍ​ຄື ຜູ້​ເກີດ​ໃໝ່​ໃຫຍ່​ລຸນ ໃຫ້​ຮູ້​ຮັກ ​ແລະຫວງ​ແຫນສັດ​ນ້ຳ ​ແລະ ສັດປ່າ, ທັງ​ເປັນ​ການ​ສືບ​ສານ​ຮີດຄອງ​ປະ​ເພນີ​ໃນ​ໄລຍະ​ເຂົ້າ​ພັນ​ສາ ບໍ່ຂ້າ​ສັດ​ຕັດ​ຊີວິດນັ້ນ​ໃຫ້​ມີ​ຄວາມໝາຍສຳຄັນ​ຍິ່ງໆ​ຂຶ້ນ.​ໃນ​ໄລຍະ​ຜ່ານ​ມາ ສປປ ລາວ​ໄດ້​ເຄື່ອນ​ໄຫວ​ວຽກງານອະນຸລັກ ສັດ​ນ້ຳ-​ສັດປ່າກໍ​ຄື​ການ​ປ່ອຍ​ປາ​ນັບ​ມື້​ເພີ່ມ​ຂຶ້ນ​ໂດຍ​ສະ​ເພາະແຕ່​ປີ 2015 ຮອດ 2017 ​ໄດ້​ປ່ອຍ​ປາ​ລົງ​ສູ່​ທຳ​ມະ​ຊາດ 100 ກວ່າ​ລ້ານ​ໂຕ, ມີ​ວັງສະ​ຫງວນກວ່າ 1.000 ວັງ, ຄຽງຄູ່​ກັນ​ນັ້ນ ຍັງ​ໄດ້​ປ່ອຍ​ສັດປ່າປະ​ເພດ​ນົກ, ສັດ​ເລືອ​ຄານ ​ແລະ ສັ​ດປະ​ເພດ​ອື່ນໆ​ ເພີ່ມ​ຂຶ້ນ.

#ແຫຼ່ງຂ່າວ: ຂ່າວສານປະເທດລາວ.

ຄົ້ນຫາ

ຜູ້ເຂົ້າຢ້ຽມຊົມ

ຈຳນວນຜູ້ເຂົ້າຊົມມື້ນີ 87

ຈຳນວນຜູ້ເຂົ້າຊົມວານນີ້ 101

ຈຳນວນຜູ້ເຂົ້າຊົມອາທິດນີ້ 589

ຈຳນວນຜູ້ເຂົ້າຊົມເດືອນນີ້ 1469

ຈຳນວນຜູ້ເຂົ້າຊົມທັງໝົດ 34457

Currently are 37 guests and no members online

ແຜນທີ່ນະຄອນຫຼວງວຽງຈັນ